Ebərəje 6 - Mbede Lə Luba Kone Gə Sigi

¹ Gəl-e gə nee ɓa, ar-si j-ḭya̰je dɔngɔr nendo gə ɔji dɔ Kirisi le, ɗaa j-ore kəm-si ndəng dɔ ye gə kar tɔgə ne gə, to gə kunda gəl nendoje gə nee to gə sigi ang: ꞌturuje kəji dɔ neje gə a kuji yo gə ta kagə Luba,

² netɔji gə ɔji dɔ batɛmje, kila ji dɔ gə, tar ce buwa yo gə lə nje gə d-uy gə gangə tar gə gə dɔbo̰.

³ To gə ɓo Luba ar-si ɗəw nama neje gə nee ɓa j-a ɗa.

⁴ Tar gə ɔji dɔ nje gə kəm-je unja nam, gə ꞌna nekarə baa gə dara ngaɓa d-inga Njil Njerɔsangə nam,

⁵ ꞌna tar lə Luba d-o ɗɔdə ngaɓa ꞌgərəje singamongə gə ɔji dɔ ndɔ gə bara nam,

⁶ ɓa ꞌtəl d-oso le, ɗəw gə ɗangə gə d-a təl turu ne kəji lə-je to gə sigi le godo. Mba ꞌtəl ꞌɓərə ngon lə Luba kagə dəsə gə to gə sigi gə kar-jejee ja cibi ngaɓa d-unda-a gə ne taji gadəmagay gə.

⁷ Be ɓa, logə dɔ nangə inga man nji taar-taar ɓa ar ko ndɔje tɔgə ar nje gə ꞌndɔ ɔji dɔ-je le, to gə ndu tɔr lə Luba.

⁸ Ngaa to gə ɓo kunje gə hayaje ɓa uba nama d-o to gə ndɔɔl uwa dɔ-ɛ, ɗaa d-a tuj-e gə kɔrɔ ngaɓa d-a ro-e nəm tɔ.

⁹ Ngan ko̰-si gə j-a njigi-si ya̰, le j-a pa tar to gə be ja kara, ye gə ɔji dɔ sisəy le j-a gərə gə maj-ɛ to gə unje ɗəw gə may, ɗəw gə a ce gə si lo kaji gə.

¹⁰ Mba Luba to njebuguru ɓa m-e a kuy dɔ kula ɗa si ang nəm, gə nuji gə uwaje gə ri-a ɗəw məmay gə ꞌɗaje gə njerɔsangəje ngaɓa aw ꞌɗaje saar ɓisine.

¹¹ Ngaa sijee j-a njigi ya̰ mba kar na-na kara uwa gədərə dɔ kula gə nee le, mba kar ne kunda mə lə-a ɔr ne sṵra̰ njal,

¹² ɓo ꞌdabəje dɔ-ɛ gə ang ngaa may kar-si ꞌndəjije kəm nje gə d-uwa gədərə gə go takagə gə ɓa d-inga ne nenduba gə d-uwa dɔ gɔl-ɛ le.

¹³ Mba logə Luba uwa dɔ gɔl ne ar Abəraham le, dəw gə ɗangə gə to ɓəəl unda-a gə n-a ɓar ri-a naji ne le godo ɗaa, naji gə ri-a ye gə ja,

¹⁴ n-pa nena: Tɔgərɔ ja, m-a tɔr ndu-m dɔ-i gə ngaɓa m-a kar gəl kuji-i uji mar-ɛ gə kede-kede.

¹⁵ Be ɓa mba Abəraham uwa gədərə le ɗaa, inga ne gə d-uwa dɔ gɔl-ɛ d-ar-ɛ le.

¹⁶ Mba dəwje d-aw naji gə ri dəw gə to ɓəəl unda-je, ɗaa tar gə ce ta-je gə le, ɗa ar dəw ma̰y ne gə je tar ang,

¹⁷ To gə be ɓa Luba kara njigi tɔji nje gə uwa dɔ gɔl ne ar-je to gə ndu-e a turu ang ɗaa naji dɔ darɔ-ɛ ye gə,

¹⁸ be ɓa ɗəw gə lə neje gə joo gə ndu-e a turu kəne ang mba Luba asə pa tar gə ɗəgərə ang, a kar singa gə boy, ngaɓa lokiya rɔ mba cḭya̰ ne dɔ ne kunda mə gə d-uwa dɔ gɔl-ɛ d-ar-si.

¹⁹ Nekunda mə nee le uwa nangə baa-baa to gə ngaw lar gə ɔy gə ꞌtɔ man gə be, mba təbə lə-si. N-riba bal dɔ gə mə kəy gə lə Luba gə to dara, n-andə no kɔgə gə,

²⁰ j-andə logə Jeju andə kəne mba-si gə njekɔr no-si, təl ne buba njekapolo gə gə ndɔ gə ndɔ gə ɗəw gə gəl Mɛləkisedɛk gə.