Ebərəje 4 - Mbede Lə Luba Kone Gə Sigi

¹ Ar-si j-a ɓəəlje ɓa, mba dɔ gɔl lo kuwa kɔr lə-a gə n-uwa le to kɔb ɓi ɗaa, may kar dəw kara horo-si gə əji to gə n-lal ɗɔdə ang.

² Mba d-ila mbərə Tar gə May d-ar-sijee nəm, d-ila d-ar ꞌjejee nəm. Ngaa tar gə d-o-je le, kara kara ɗa kula rɔ-je ang, mba ꞌɗa mə kara gə nje gə d-o le dɔ takagə gə ang.

³ Ɔji dɔ sijee gə j-a ta kagə le ɗaa, j-andə lo kuwa kɔr gə to gə n-pa tar-ɛ na: M-ugu rɔ-m gə wungu m-pa na: D-a kila gɔl-je lo kuwa kɔr gə lə-m ndag ang. Luba ɗa kulaje lə-a un kud-e lo kunda dɔ nangə gə ləw baa ja;

⁴ mba n-pa lo kara kəne əng, ɔji dɔ ndɔ gə njekum gə siri na: Ndɔ gə njekum siri ɗaa Luba uwa kɔr-ɛ ta kulaje gə lə-a.

⁵ Ngaɓa ꞌtəl pa to gə sigi nee na: D-a kila gɔl-je lo kuwa kɔr gə lə-m ndag ang.

⁶ Be ɓa, d-ɔr ta ɗəw d-ar nje gə kɛm kar d-andə kəne ja ngaa, nje gə Tar gə May nee oso mbi-je gə dɔngɔr ja d-andə kəne ang mba ko tar ang lə-je,

⁷ cibi n-təl n-ila ndɔ to gə sigi na ɓogəne, ꞌpa ne gə ndu Dabidi ləw baa ja, to to gə ꞌpa ne kede əng le na: To gə ɓo oje ndu-e ɓogəne nama, Ar-je mə-si kədərə ang.

⁸ To gə ɓo Josuye ar-je lo kuwa kɔr nama d-a təl pa tar ɔji dɔ ndɔ gə ɗangə ang ngaa.

⁹ Kuwa kɔr nay mba dəwje lə Luba ja ɓi. Kuwa kɔr nee le ta naa gə kuwa kɔr gə ndɔ gə njekum gə siri.

¹⁰ Mba dəw gə andə lo kuwa kɔr gə lə Luba nama, a kuwa kɔr-ɛ dɔ kulaje gə lə-a tɔ, to to gə Luba kara uwa ne kɔr-ɛ dɔ k-ɛ ye gə be tɔ.

¹¹ Be ɓa ar-si ja ndəbə-je ndəbə kandə lo kuwa kɔr gə kən le, mba kar dəw kara ja kara ndəji kəm ko tar ang gə njekara le ja uba ne tuji to gə ka-sijee ang.

¹² Mba tar lə Luba le to kəm baa ngaɓa mii, adə unda kiya bayi gə t-ɛ ɓe joo gə adə pəm-pəm; n-andə mə kəm gə kɔrɔgə, n-andə mə njil gə kɔrɔgə, n-asə gangə lokurugo̰je gə kandə dan ubu gə mə singa gə; n-təgə ɓo neje gə tar kəjije gə to mə dəw gə n-um ɗaga.

¹³ Ɓa nekunda kara gə iya rɔ-ɛ ta kəm-e gə godo: Dəw gə ja tura go ne no-ɛ gə le, ne tɔ̰y ja to gadəmagay gə ngaɓa to təgəsə ta kəm-e gə.

Jeju Kirisi to ɓəəl unda buba njekapoloje gə gəl kone gə ləw gə

¹⁴ Mba Jeju gə to buba njekapolo lə-si gə dɔ dara gə taar, gə to ngon lə Luba le, ɓo j-a taje kag-e nam ɗaa may kar j-uwaje ngəng.

¹⁵ Mba buba njekapolo lə-si le a kasə kum gə si naa gə dɔ ɗəəm gə lə-si ja, gəl-e gə ne ɓa ꞌne kara nena ce dɔ-ɛ gə ɗəw kara baa to to gə sijee be ja tɔ, ngaa n-ɗa neɗa gə kṵra̰y ang.

¹⁶ Be ɓa j-ulaje kudu-si gə kede gə ɓəəl ang, gə mbɔr ngəndəng mbay mənuji gə, mba kinga ne məmay, gə mənuji ngaɓa mba kar logə ne dum dɔ-si nama, n-la gə si kəne.