Ebərəje 3 - Mbede Lə Luba Kone Gə Sigi

Jeju Kirisi to ɓəəl unda Moyiji je gə Josuye

¹ Gəl-e gə nee ɓa, ngan ko̰-mje gə njerɔsangəje, sisəy gə Luba ɓar-si gə njeba kulaje le, may kar oje Jeju gə j-a gər-eje ɗang-ɗang le, to gə Luba ja ula-a gə njeka̰ykula ngaɓa gə buba njekapolo le, ꞌne ja n-to gəl takagə lə-si.

² N-ila kuji dɔ njekunda-a ta kula gə to to gə Moyiji ɗa ne mə kəy gə lə Luba.

³ Be ɓa d-o-e to gə n-asə kinga riɓar gə nday Moyiji, to gə ꞌɗɔy njekunda kəy ya̰ d-unda darɔ kəy.

⁴ Mba kəy gə ɗa-ɗa kara dəw ja ɓa unda, ngaa njekunda neje tɔ̰y to Luba.

⁵ Ye gə ɔji dɔ Moyiji le ɗaa, Moyiji to njekula gə gadə-gadə mə kəy gə lə Luba tɔ̰y gə mba ɗa ne tar naji lə ne gə Luba ila mbər-e.

⁶ Ngaa Kirisi turu rɔ-ɛ gə Ngon mə kəy lə-a ye ja. Sijee j-a to kəy lə-a, to gə ɓo j-uwa gədərə ngaɓa j-a ɗa ne kunda mə lə-si gə ne gədə rɔ nama a to ne kunda kar lə-si.

⁷ Gəl-e gə nee ɓa, gə go tar gə Njil Njerɔsangə pa na: To gə ɓo oje ndu-e ɓogəne nama,

⁸ Ar-je mə-si kədərə to to gə dɔ ndɔ dɔ ngangə gə kede le ang, Dɔ ndɔ nena gə ndag lo gə,

⁹ Logə ka-sijee ꞌna mə-m kəne d-o Ɗaa d-o kula ɗa-mje saar ɓal dɔg sɔɔ.

¹⁰ Gəl-e gə nee ɓa wungu to-m ne dɔ gəl kuji dəwje gə dɔ ɓal-ɛ gə əng Be ɓa m-pa na: Mə-je to gadə-gadə ang ja jaga-jaga, Ngaɓa ꞌgərə kila ɗəwje lə-m ang.

¹¹ M-ugu rɔ-m gə wungu m-pa na: D-a kila gɔl-je lo kuwa kɔr gə lə-m ndag ang.

¹² Oje gə maj-ɛ ɓa, ngan ko̰-mje, kar dəw kara horo-si gə m-e ndul gə takagə lə-a godo ngaɓa mbadə Luba gə nje kisi kəm baa ang.

¹³ Ngaa ꞌndəjije naa gə ndɔ-ndɔ, saar kar ꞌpa na: Ɓogəne, mba kar mə dəw kara kara horo-si gə kədərə dɔ neɗa gə kṵra̰y gə ang.

¹⁴ Mba sijee le j-a to njeba-ɛje lə Kirisi, to gə ɓo j-ar njang dɔ məkunda gə lə-si gə dɔngɔr,

¹⁵ To gə ꞌpa nena: To gə ɓo oje ndu-e ɓogəne nama, Ar-je mə-si kədərə to to gə dɔ ndɔ dɔ ngangə gə kede le ang.

¹⁶ Nje gə ɗa ɓa d-o ndu-e ɓa mə-je kədərə le wa? Ngaa se to ꞌjejee tɔ̰y gə Moyiji ɔrəje ce gə je Ejipətə ang wa?

¹⁷ Nje gə ɗa ɓa wungu to-e dɔ-je gə ɓal dɔg sɔɔ wa? Wungu to-e dɔ njeneɗaje gə kṵra̰y gə d-uy mburugu-mburugu ndag lo gə le ang wa?

¹⁸ Nje gə ɗa ɓa n-ugu rɔ-ɛ n-ar-je na d-a kila gɔl-je lo kuwa kɔr gə lə-a ang le wa? N-ugu rɔ-ɛ n-ar njekunda tarje le ang cibi wa?

¹⁹ Be ɓa j-oje to gə d-ila gɔl-je kəne ang mba məkədərə lə-je ja tɔ.