Ebərəje 2 - Mbede Lə Luba Kone Gə Sigi

¹ Gəl-e gə nee ɓa j-a ngom-je tar gə ꞌpa d-ar-si le gə maj-ɛ mba kar j-a ndəəm ang.

² Mba to gə ɓo tar gə anjije pa ɓa ɗa kula nama, kal tar gə ɗa-ɗa gə kunda tar gə ɗa-ɗa kara d-a kuba tuj-e to gə tɔgərɔ,

³ ngaa sijee, to gə ɓo j-a dabə kaji gə boy dasəra le, j-a kuba tuji ang to gə ban wa? Kaji nee le Mbayɓe ila mbər-e dɔngɔr, ngaɓa nje gə d-o t-ɛ gə kara d-ila mbər-e tɔ,

⁴ Luba ore kudu tar naji lə-je gə netɔjije, gə nemisije ngaɓa neje dang-dang gə kəm dəw o ndɔ kara ang, gə gusu-eje gə n-ar-je ɗəw gə lə Njil Njerɔsangə to gə m-e njigi.

⁵ Be ɓa tar gə ɔji dɔ dəwje gə dɔ ndɔ gə bara gə j-a pa tar-ɛ le, anjije ɓa Luba a kar d-o̰ dɔ-je ang.

⁶ Ngaa dəw kara pa tar naji mə mbede gə lə Luba gə na: Dəw to ɗi ja ɓa, mə-i ole dɔ-ɛ gə wa? Ngon lə dəw kara to ɗi ja ɓa, ꞌtɔsə kəm-i dɔ-ɛ gə wa?

⁷ ꞌI ar-ɛ n-oso kul no anjije gə kur-e əw ɓəəl baa be, Ula rɔnduba dɔ-ɛ gə ngaɓa ꞌɗɔy-ɛ,

⁸ ꞌI um neje tɔ̰y no gɔl-ɛ gə. Ar neje tɔ̰y d-oso-kul no-ɛ gə, ne kara gə oso kul ang le godo. Be ɓa ɓisine j-o to gə neje tɔ̰y d-oso-kul no-ɛ ang ɓi.

⁹ Ngaa nje koso kul no anjije gə kur-e əw ɓəəl baa le, Jeju gə j-o rɔnduba gə d-ula dɔ gə, gə ɗɔy gə ꞌɗɔy-ɛ, mba ꞌməsərə yo gə n-o, be ɓa gə go mənuji lə Luba ɓa n-o ne yo gə rɔ-ɛ mba-si tɔ̰y.

¹⁰ Be ɓa ꞌne gə neje tɔ̰y ɗe ɗəw gə lə-a ngaɓa neje tɔ̰y to ɔji dɔ-ɛ, cibi n-ar ngan-ɛ bula d-inga rɔnduba ɗaa nje gəl kaji lə-je n-ar-ɛ ɗe gə dəw gə may pɛdə ɗəw ko ꞌməsərə gə.

¹¹ Mba ꞌne ja ɓa n-togo-je n-ar d-ar ngadə ngaɓa ꞌjejee gə d-ar ngadə le, ngira-je kara baa ja. Gəl-e gə nee ɓa n-ɓar-je ngan ko̰-e nama rɔ kul uwa-a ang,

¹² Logə n-pa na: M-a pa tar lə-i kar ngan ko̰-m, M-a kɔsə gaji lo mbo̰ naa gə.

¹³ Cibi ngaɓa: M-a kunda mə-m dɔ-ɛ gə. Cibi: Ye a m-ar nee, ꞌma gə nganje gə Luba ar-m.

¹⁴ Be ɓa mba nganje d-um naa gə kara ɗəw məsə gə ɗəw darɔ gə ɗaa, ꞌne kara to to gə be ja n-um ne gə je naa gə ɗəw kuy gə lə-a mba guru ne singa ꞌye gə singamongə yo to ji-a gə, gə to ꞌSɛ̰ngərɛ̰,

¹⁵ ngaɓa mba kɔr ne ꞌjejee tɔ̰y gə ɓəəl yo uwa-je gə ɓərə logə d-isi ne kəm baa kila-je taar.

¹⁶ Mba n-ɗe mba la gə anjije ang ngaa n-ɗe mba la gə gəl kuji Abəraham.

¹⁷ Cibi ɓa ɗəw neje gə tɔ̰y ja n-a təl ta naa gə ngan ko̰-ɛ kəne ɓa gə mba təl to buba njekapolo gə nje ɗa məmay, gə dəw gə gadə-gadə, ɗəw kula gə lə Luba kɔr ne tar neɗa gə kṵra̰y dɔ dəw mə ɓeje gə.

¹⁸ Mba n-o ꞌməsərə gə nena le ɗaa ɗəw kara baa ja tɔ n-a kasə mba la gə nje gə nena inga-je tɔ.