Ebərəje 11 - Mbede Lə Luba Kone Gə Sigi

Tar gə ɔji dɔ takagə

¹ Takagə to ne gə kəm dəw o ang ja ngaa unda m-e kəne to gə ne le ga̰ tɔgərɔ ja.

² Gə go takagə lə nje gə ləw le ɓa ꞌpa ne tar naji lə-je gə maj-ɛ.

³ Gə go takagə ɓa j-a gərə ne to gə Luba unda ne dara gə nangə gə tar gə t-ɛ gə, ar j-o to gə ne gə kəm dəw ang ja ce to ɗaga.

⁴ Ɗəw gə lə takagə ɓa Abɛl un ne nepolo gə to ɓəəl may unda kar Ka̰yi ar Luba; gə go ɗəb-e nee ja d-o-e ne gə dəw gə gadə-gadə, ar Luba ja kara pa tar naji dɔ nenuji gə lə-a ngaɓa ɗəw gə kara baa ne ja n-uy ja ngaa gə go takagə lə-a ɗaa, n-aw n-pa tar ja ɓi.

⁵ Gə go takagə ɓa d-un ne Enɔgə kəm baa lal kar-ɛ uy, ar d-o-e ang magə, mba Luba un-e. Mba nam ɓa kar d-un-e le, ꞌɗa tar naji lə-a to gə n-ta kəm Luba.

⁶ Be ɓa ɓo takagə godo nama ɗəw gə dəw a ta ne kəm-e godo tɔ. Dəw gə njigi ɗəm gə rɔ Luba gə nama may kar takagə to gə n-ga̰ ngaɓa nje gə ꞌsang-e nama nuga dɔji-je.

⁷ Ɗəw gə lə takagə ɓa Luba pa ne tar ne gə dəw o ndɔ kara ang baa ɓi ar Nowe ɗaa Nowe ɓəəl ila ne kɔji ɗa ne to mba kaji lə nje gə kəy lə-a, ngaɓa n-gangə ne tar dɔ dəwje gə cibi ɓa n-to ne njekuwa nduba neɗa gə gadə-gadə ɗəw gə lə takagə lə-a.

⁸ Gə go takagə ɓa Abəraham njigi ne ɓar lə Luba ɔdə aw ne gə ɓe gə a kuwa gə nenduba ɗaa n-aw lal gərə lo gə n-aw dɔ-ɛ gə kəne.

⁹ Ɗəw gə lə takagə le ja ɓa n-ɗe n-ɗa ne ɓe dɔ nangə gə d-uwa dɔ gɔl-ɛ gə to to gə ɓe mba, n-isi kəy lo gə, to to gə Ijagə je gə Jakobo gə ꞌto nje baa kuwa sə-a nduba ne gə d-uwa dɔ gɔl-ɛ le.

¹⁰ Mba n-ngina ɓe gə ngira-a uwa nangə rig-rig, ye gə Luba ja to njekunda gəl-e.

¹¹ Ɗəw gə lə takagə le ɓa Sara gə to ꞌkaw kadə, ye ja kara ɓuga ya̰ ja, ngaa d-ar-ɛ inga singa unda ne gəl kuji kara, mba n-unda m-e to gə dəw gə nje kuwa dɔ gɔl ne le to dəw gə gadə-gadə.

¹² Gəl-e gə nee ɓa dəw gə kara baa nee ja, gə to dəw gə ɓuga ya̰ ja, ngaa unda gəl kuji dəwje bula to to gə ndɛ̰ndərɛ̰ndɛ̰je gə dara ngaɓa ꞌbula to to gə ꞌnangəra̰ gə ta babo kadə gə gə dum tura be.

¹³ ꞌJejee tɔ̰y gə d-uy ɗəw takagə gə lal kar d-inga neje gə d-uwa dɔ gɔl-ɛ ngaa d-o neje nee le dɔ ji ndə̰w̰ ngaɓa ꞌgərə to gə d-a ɗe ja, ꞌpa ne to gəꞌto mbaje gə nje kaw taarje dɔ nangə nee.

¹⁴ Nje gə pa tar to gə be le, tɔji ngadə gə dəwje gə d-aw ꞌsangə ɓe.

¹⁵ Ngaɓa to gə ɓo mə-je ole dɔ ɓe gə d-ɔdə kəne a ɓo dɔ kar-ɛ asə nama d-a təl kaw kəne.

¹⁶ Ngaa ɓisine ɗaa mə-je to dɔ ɓe gə may gə, gə to ɓe gə dara. Gəl-e gə nee ɓa ꞌɓar Luba gə Luba lə-je nama, o gə ne rɔ kul ang; n-gɔl ɓe mba je.

¹⁷ Gə go takagə ɓa ꞌna ne Abəraham d-ar un ne Ijagə gə nepolo. ꞌNe gə d-uwa dɔ gɔl ne d-ar-ɛ le ja, ngon-e gə to ngon kara baa ja, ngaa n-un-e gə nepolo,

¹⁸ ꞌne ja cibi ꞌpa d-ar-ɛ na: Ɗəw gə lə Ijagə ja a kinga ne gəl kuji dəwje gə ri-i a to dɔ-ɛ gə.

¹⁹ Mba n-unda m-e to gə Luba asə ndol ngon-e horo nje gə d-uy gə. Gəl-e gə nee ɓa Luba təl ne gə ngon-e gugu ar-ɛ, ɗaa to gə kuji tar.

²⁰ Gə go takagə ɓa Ijagə tɔr ne ndu dɔ Jakobo je gə Esaw gə ɔji dɔ neje gə a ɗe.

²¹ Gə go takagə ɓa logə Jakobo o to gə ndɔ kuy lə-a aw asə ɗaa tɔr ndu dɔ ngan lə Jəjəb gə, ngaɓa gədə rɔ-ɛ dɔ kagə tɔsə gə lə-a unda ꞌburamba polo Luba.

²² Gə go takagə ɓa logə Jəjəb o to gə kisi kəm baa lə-a a kaw kunda ngang-e ɗaa pa tar gə ɔji dɔ ce lə ngan Ijirayɛlje ngaɓa un ne ndu ɔji dɔ singa rɔ-ɛje.

²³ Gə go takagə ɓa logə d-uji Moyiji ɗaa nje kuj-eje d-iya-a nay munda; mba n-to ngon gə may ngaw ta kəm-je ya̰ ɗaa ꞌɓəəl ndu gə mbay un le ang.

²⁴ Ɗəw gə lə takagə le ɓa logə Moyiji tɔgə ɗaa mbadə kar d-o-e to gə ngon lə Parawo̰ gə jene ɓa uji-e,

²⁵ mba n-njigi kar d-ula kəm-e ndoo naa gə gə dəwje lə Luba, may unda ɗa rɔləl gə kur-e a kəw ang gə to kar neɗa gə kṵra̰y.

²⁶ Moyiji o rɔ kul gə d-a kila dɔ Kirisi gə le to nekinga gə to ɓəəl unda nekingaje gə Ejipətə, mba n-unda m-e dɔ kuga gə lə Luba.

²⁷ Gə go takagə ɓa Moyiji ɓəəl ne wungu lə mbay ang, n-ɔdə ne Ejipətə; mba n-uwa ngəng, to to gə n-o ne gə kəm dəw o ang be.

²⁸ Gə go takagə ɓa Moyiji ɗa ne pagə ngaɓa n-tusu ne məsə ta ɗəw kəyje gə mba kar anji gə nje tuji lo ɗe tuji ngan dəər Ijirayɛlje gə jingaw ang.

²⁹ Gə go takagə ɓa lo tudu ne kurum dan babo kadə gə kasə gə ar ꞌnday kəne ngaa dəwje gə Ejipətə gə ꞌna mba nday kəne le man ta-je yaləm.

³⁰ Gə go takagə ɓa logə ꞌnja ꞌgugu dɔ ndogo bɔrɔ gə Jeriko asə ndɔ siri ɗaa ndogo le unda nangə.

³¹ Gə go takagə ɓa Rahabə gə to jene kaya inga ne tuji gə nje məkədərəje ang mba kuwa gə uwa nje tən loje gə rɔ-ɛ gə gə rɔləl.

³² Ngaɓa ɗi gə ɗangə ɓa m-a pa cibi wa? Mba kar godo ɗaa lo kar m-pa ne tar lə nje gə ri-je to nee godo: Jedeyo̰, Barak, Samso̰, Jɛpəte, Dabidi, Samɛl ngaɓa pajambərəje

³³ gə go takagə ja ꞌdum ne dɔ ɓeko̰je, ꞌɗa ne ne gə gadə-gadə, d-inga ne ne gə d-uwa dɔ gɔl-ɛ, d-uwa ne ta ꞌnamje,

³⁴ ꞌtɔl ne pər gə o̰ gigigi, ꞌce ne ta kiya bayi gə, d-uba ne nangə tuwa rɔko̰ gə d-ḭ taar, ꞌto nebaw ɗɔje d-ɔsə ne njeɗɔje gə ɗangə ngərəng.

³⁵ Jeneje ꞌtəl d-inga ne njekar-jeje d-uy ɓa ndol. Nje gə kɛm ꞌmbḭrḭ-je ngaa ꞌnjigi kar d-ɔr-je d-ila-je taar ang mba njigi kuy gə ndol ndol gə dum dɔ lo.

³⁶ Nje gə ꞌɗa-je ꞌkogo ne gə ꞌlabə-je tarara-tarara, ꞌtɔ-je gə kula lar ngaɓa d-umje kəy kula gə.

³⁷ ꞌTila-je gə kɔr ər, d-unja-je gə ragəda, ꞌtɔl-je gə kiya bayi, d-aw gə yo gə nee, d-ɔɔ ngira badə gə ngira biya̰, d-isi dan ndoo gə, d-ula kəm-je ndoo ngaɓa ꞌɗa-je məyɛr,

³⁸ ꞌJejee d-asə may ta kəm dəwje gə dɔ nangə nee ang, ꞌnja gə ndag lo lo, dɔ ərje gə, mə bolo ərje gə, ngaɓa d-andə mə bujaje gə.

³⁹ Be ɓa ꞌjejee nee tɔ̰y gə ꞌpa tar naji lə-je gə maj-ɛ ɗəw takagə lə-je nee le, d-inga ne gə d-uwa dɔ gɔl-ɛ d-ar-je le ang.

⁴⁰ Mba Luba aw gɔl ne gə may al dɔ lo mba sijee, mba kar ꞌjejee ꞌtəl may pɛdə lal sijee ang.