Ebərəje 10 - Mbede Lə Luba Kone Gə Sigi

¹ Be ɓa torondu le, njil neɗa gə may bula gə a kaw ɗe to kəne, ɗaa to neje gə tɔgərɔ ja ang; gəl-e gə nee ɓa ndɔ kara baa be ja kara, gə go nepolo gə to gə be, gə ɓal nama d-un taar-taar nee ɓa, a kar nje gə ꞌɗəm gə rɔ Luba gə d-a may ne pɛdə ang baa.

² Ɓo be ang nama d-a kunda ngang-e ngaa, mba nje kun nepoloje nee le d-a karə ngadə ja gə dɔbo̰ ngaa m-a, tar neɗaje gə kṵra̰y lə-je a kuwa dɔ-je cibi wa?

³ Ngaa gə go nepoloje nee le, ɓal kara ja taar nama to nekole mə dɔ neɗaje gə kṵra̰y gə.

⁴ Mba ɗəw gə məsə bɔ mangəje gə məsə bɔ badəmje a kɔr ne tar neɗa gə kṵra̰y dɔ dəw gə le godo.

⁵ Gəl-e gə nee ɓa logə Kirisi a kaw ɗe dɔ nangə gə nee le pa na: Nepolo ta kəm-i ang nəm, nenuji ta kəm-i ang nəm; Ngaa ꞌi unda darɔ-m.

⁶ Nepolo gə ꞌɗo ta kəm-i ang nəm, nepolo mba neɗa gə kṵra̰y kara ta kəm-i ang nəm tɔ.

⁷ Be ɓa m-pa na: ꞌMa m-ɗe, ꞌƊa mə mbede gə ɔji dɔ-m Mba kar, əy Luba, m-ɗa mə njigi lə-i.

⁸ N-pa kede nam: Nepolo ta kəm-i ang nəm, nenuji ta kəm-i ang nəm, nepolo gə ꞌɗo ang nəm, nepolo gə kar neɗa gə kṵra̰y, gə d-un gə go torondu le, ꞌi njigi ang nəm ngaɓa ta kəm-i ang nəm tɔ.

⁹ Cibi n-pa na: O, m-ɗe mba ɗa mə njigi lə-i. N-tuji ji nepolo gə ləw ɗaa n-unda ꞌye gə sigi.

¹⁰ Be ɓa gə go mə njigi gə nee le ꞌtogo-si ne, gə mbɔr dɔ darɔ Jeju Kirisi gə un gə nenuji, gɔl kara ja gə dɔbo̰.

¹¹ Njekapolo gə ɗa-ɗa kara ar ta kula gə lə-a gə ndɔ-ndɔ ja ngaɓa un nepolo gə asə kɔr neɗa gə kṵra̰y ang nəm ja baa lɔgɛ-lɔgɛ.

¹² Ngaa ꞌne le, logə n-un nepolo mba neɗa gə kṵra̰y gɔl kara ja ɗaa, n-isi dɔ ji kɔl Luba gə gə ɓal-ɓal,

¹³ ngaɓa ɓisine n-aw n-ngina kar d-a təl njeba̰a̰je lə-a gə lo kum gɔl-ɛ gə dɔbo̰ ja.

¹⁴ Mba gə go nepolo gə kara baa ja n-təl ne njekɔr ne tar neɗa gə kṵra̰y dɔ-je gə gə dəwje gə may pɛdə gə dɔbo̰.

¹⁵ Tar gə nee le Njil Njerɔsangə kara pa ar-si tɔ. Mba logə n-pa na:

¹⁶ Kone gə m-a riya gə je ɓa to nee, Mbayɓe pa na: Go ndɔje gə nee ɗaa, M-a kunja torondu-mje dɔ ɓəngərə-je gə Ngaɓa m-a kunja kəji negərə gə lə-je

¹⁷ Ngaɓa mə-m a kuy dɔ neɗaje gə kṵra̰y lə-je gə dɔ kal tar lə-je yom ja.

¹⁸ Be ɓa, logə d-ɔr tar neɗa gə kṵra̰y dɔ dəw gə nam ɗaa, ɗəw kun nepolo mba neɗa gə kṵra̰y godo ngaa.

TAR NDƏJIJE DANG-DANG Kuwa gədərə dɔ takagə gə

¹⁹ Be ɓa ngan ko̰-mje, məsə Jeju ɔr ta ɗəw kandə no ngɔ losangə gə ila tagəra kar j-andə kəne gə ɓəəl ang,

²⁰ ta ɗəw gə Jeju ɔr ar-si le, to ɗəw gə sigi gə to kəm baa gə go bal dɔ gə mə kəy nepolo gə n-unda n-riya dana, ye gə nee le pa na to darɔ-ɛ;

²¹ ɗaa d-unda buba njekapolo dɔ kəy gə lə Luba d-ar-si.

²² Gəl-e gə nee ɓa, j-ulaje kudu-si gə kede gə mə gə tɔ joo ang, ngaa gə takagə gə tɔgərɔ, gə mə gə ꞌtogo kəji gə kṵra̰y kəne ngaɓa gə darɔ gə ꞌtogo gə man gə arə ngadə tɔ.

²³ J-ar singa-si ɔr ang ɗaa j-a pa tar məkunda lə-si gə ɗaga, mba nje kuwa dɔ gɔl ne le to dəw gə gadə-gadə.

²⁴ J-a tɔsə-je kəm-si dɔ naa gə gə yo gə nee, j-a ndəjije naa dɔ nuji gə ngaɓa gə dɔ kula ɗaje gə may gə.

²⁵ J-ubaje mbo̰ naa lə-si j-ḭya̰-je to to gə nje gə kɛm d-aw ꞌɗa ne be ang, ngaa ar-si j-ula-je jingaw mə naa gə gə yo gə nee, mba oje to gə dɔ ndɔ nay əw ang baa.

²⁶ Mba logə j-a gərə tar gə tɔgərɔ nam ɓa j-ḭ j-a ɗa neɗa gə kṵra̰y gə mə njigi lə-si ja nama, nepolo gə a kɔr tar-ɛ dɔ si gə godo,

²⁷ ngaa j-a ngina gangə tar gə boy ngaɓa gə pər gə to ɓəəl gə a ko̰ nje dɔ ngangəje ngaa.

²⁸ To gə ɓo dəw al dɔ torondu Moyiji nama ꞌtɔl-ɛ lal ko kəmtondoo lə-a, gə go tar naji lə dəwje joo ose munda.

²⁹ Ɓədə ɓa, kar dəw gə tuba ngon lə Luba nangə gə gɔl-ɛ, gə o məsə riya kone gə ꞌtogo-e ne gə ne ang ngaɓa taji Njil gə to gəl mənuji nama, d-a bɛ̰ t-ɛ kar-ɛ al dɔ lo.

³⁰ Mba j-a gərəje dəw gə pa na: Dal ba̰a̰ to kar ꞌma, kɔr gira to kar ꞌma. Cibi na: Mbayɓe a gangə tar dɔ dəwje gə lə-a.

³¹ To ɓəəl ya̰ kar dəw oso mə ji Luba gə nje kisi kəm baa gə!

³² Ngaa ar-je mə-si ole dɔ dɔngɔr ndɔ gə, logə kəm-si unja le, ɔsəje gəl ɗɔ gə kədərə gə ko ꞌməsərə,

³³ ꞌtaji-si gə d-ula kəm-si ndoo gadəmagay gə, ngaɓa ɗa gə ɗa si to gə be le, təl to gə mə kara gə ꞌɗaje gə nje gə ꞌɗa-je to to gə bənəng tɔ.

³⁴ Mba oje kəmtondoo lə nje gə to kəy kula gə, ngaɓa d-uwa si nemayje lə-si ꞌta kara to si ang nəm, mba ꞌgərəje to gə ingaje nemayje gə to ɓəəl gə a to gə ɓal-ɓal nam.

³⁵ Undaje mə-si gə maj-ɛ dɔ kuga gə lə-si, ɓo ḭya̰je go-e ang!

³⁶ Ne gə kəm kar-si ꞌɗaje ja to kuwa gədərə, mba logə ꞌɗaje mə njigi lə Luba nam ɗaa a kingaje ne gə d-uwa dɔ gɔl-ɛ mba-si ja.

³⁷ Mba ꞌpa na: Dɔ kar nay ɓəəl baa, cibi nay njɛ̰ baa be! Ɗaa nje ɗe le a ɗe, n-a ngə̰y ang.

³⁸ Ɗaa dəw lə-m gə gadə-gadə a kaw kəm baa ɗəw gə lə takagə. Ngaa to gə ɓo n-ɔr rɔ-ɛ gə gugu nama, kəm lə-m a kinga rɔləl dɔ-ɛ gə ang.

³⁹ Sijee le, j-a to dəwje gə d-ɔr rɔ-je mba tuji ang, ngaa j-a to dəwje gə ta kagə mba kar kəm lə-si aji ne.