Ebərəje 1 - Mbede Lə Luba Kone Gə Sigi

KONE GƏ SIGI TO ƁƏƏL YA̰ Kuma kud-e

¹ Kede ləw le, Luba pa tar ar ka-sijee gə ndu pajambərəje gə ɗəwje dang-dang gɔl bula,

² ngaa dɔ ɗudu ndɔje gə nee ɗaa n-pa gə si tar gə ndu ngon-e. N-unda-a gə njekuwa nduba neje tɔ̰y, ngaɓa n-unda neje tɔ̰y ɗəw gə lə-a.

³ ꞌNe gə n-to ndogo rɔnduba lə-a, n-tɔji lo kunda rɔ lə-a, n-ɗa neje tɔ̰y gə singamongə tar gə t-ɛ gə, logə n-togo neɗaje gə kṵra̰y tɔ̰y ɗaa, n-aw n-isi dɔ ji kɔl Luba gə dara,

⁴ mba n-to ɓəəl n-unda anjije ɗaa n-no ri gə may ya̰ unda ri-je.

Jeju Kirisi to ɓəəl unda anjije

⁵ Anji gə ɗa ɓa Luba pa tar gə nee ar-ɛ ndɔ kara wa? Tar gə na: ꞌTo ngon-m, ꞌMa ja m-uji-i ɓogəne. Cibi ꞌMa ja m-a to Bɔ-ɛje, Ɗaa ꞌne n-a to ngon-m.

⁶ Cibi, logə n-a kaw kula ngon-e gə to dəər dɔ nangə nee ɗaa, n-pa na: May kar anjije lə Luba tɔy ja d-ɔsə takəji-je nangə no-ɛ gə

⁷ Ngaɓa n-pa tar dɔ anjije gə na: N-təl anjije lə-a gə ləl gə ula Ngaɓa njekulaje lə-a gə ndo̰ pər gə o̰ bilim-bilim.

⁸ Ngaa kar ngon-e ɗaa n-pa na: Ngəndəng mbay lə-i, əy Luba, to saar gə no. Ngaɓa, Miya̰ ko̰ mbay lə-i kara o̰ ne ɓe gə dɔ gɔl-ɛ.

⁹ Ne gə dana gadə-gadə ɓa ꞌnjigi, ɗaa ꞌnjigi ne gə dɔ buguru ang gə kɔrɔ; Gəl-e gə nee ɓa, əy Luba, Luba lə-i um ne ubu dɔ-i gə Ubu rɔləl gə n-um dɔ-i gə le, n-unda-i ne dang gə njeba-ɛje lə-i.

¹⁰ Cibi ngaɓa Mbayɓe, to ꞌi ja ɓa un kud-e unda dɔ nangə, ngaɓa dara gə neɗa ji-i;

¹¹ D-a tuji ngaa ꞌi le a kisi gə no-i; D-a ngisi tɔ̰y to to gə kubu be;

¹² A ɓiri-je ngoməlo̰-ngoməlo̰ to to gə ngon dara be, Ngaɓa d-a mbəl rɔ-je to gə dəw mbəl ne kubu rɔ-ɛ gə be, Ngaa ꞌi le, ꞌmbəl rɔ-i ang, ngaɓa isi gə ɓal-i ɓal-i.

¹³ Ngaɓa anji gə ɗa ɓa horo mar-eje gə n-pa n-ar-ɛ ndɔ kara na: Isi dɔ ji kɔl-m gə nee, Saar kar m-turu njeba̰a̰je lə-i kar-i n-nja dɔ-je gə.

¹⁴ Anjije nee tɔ̰y le, ꞌto njilje gə Luba aw ula-je ang baa wa? Luba aw ula-je mba kar ꞌla gə nje d-a kuwa kaji gə neduba.