Colossiendjé 4 - Mbede Lə Luba Kone Gə Sigi

¹ ꞌƁəəje, mba ꞌgərəje to gə Ꞌɓəə sisəy-je kara isi dara əng le ɗaa, may kar ar-je ngan njekulaje lə-si ne gə ɔji dɔ-je gadə-gadə ngaɓa gə dɔ gɔl-ɛ.

Ɗudu tar ndəjije

² Uwaje dəji Luba gədərə, oreje kəm-si ndəng kəne ꞌɗaje ne oyo.

³ ꞌDəjije mba sijee tɔ, mba kar Luba ɔr ta ɗəw pa tar ar-si, mba kar m-ila ne mbərə lə Kirisi gə dəwje ꞌgər-e ang ɓi, mb-ɛ ye ja ɓa d-uwa-m ne d-ila-m ne kəy kula gə,

⁴ ɗaa kar m-pa ngadə gə go ɗəb-e gə m-a pa ne ja ɓa.

⁵ ꞌNjaje horo nje gə ꞌgərə Kirisi ang ɓi le, gə kəm karə, ḭya̰je dɔ kar ar-ɛje nday baa ang.

⁶ Ar-je tar gə ta-si ləl gə ləl dɔro, ilaje kadə dɔ tar gə lə-si, mba kar ꞌgərəje ne ɗəw kila ne dəw tar gə.

⁷ Neje gə ɔji dɔ-m ꞌma ɗaa, ngon ko̰-m gə m-njig-e ya̰, njekula gə gadə, njeba kula lə-m gə ɗəw gə lə Mbayɓe, gə ri-a na Tisikə ɓa a pa tɔ̰y kar-si oje.

⁸ M-o som ja m-ula-a ɓə lə-si mba kar ꞌgərəje ne pa kisi gə j-isi ngaɓa mba kar n-ula ne jingaw mə-si gə tɔ.

⁹ M-ula-a naa gə kara baa gə Onejim, gə to ngon gə ila kuji ngaɓa ngon ko̰-si gə m-njig-e ya̰ ngaɓa n-to nje baa ɓe lə-si. D-a paje tar neje gə aw nday nee tɔ̰y kar-si oje.

¹⁰ Arisətarəkə gə d-uwa-a sə-m pa na m-o-si m-ar ꞌne, ngaɓa Marəke gə njenuji lə Barənabas kara nəm. ꞌNe le ꞌpa tar lə-a d-ar-si kede nam a ɓo n-ce dɔ-si gə nama uwa-aje gə maj-ɛ gə rɔ-si gə.

¹¹ Jeju gə ꞌɓar-ɛ Jusətus na m-o-si m-ar ꞌne tɔ. ꞌJejee nee ja gə kar-je baa ꞌto Jiibije gə njetakagə kirisije gə ꞌɗa sə-m kula mba ɓeko̰ lə Luba, ɗaa m-uba ne singa ya̰.

¹² Epapəras gə to nje baa ɓe lə-si kara na m-o-si m-ar ꞌne tɔ. N-to njekula lə Kirisi Jeju, n-ɗa ɗɔ mba tar lə-si ngɔɔgɔ-ngɔɔgɔ ɗəw dəji gə, mba kar uwaje ne gədərə ꞌmayje ne pɛdə ꞌɗaje ne ne gə mə Luba njigi ja tɔ̰y.

¹³ M-ɗa tar naji gə nee le mba n-jɔgə rɔ-ɛ ya̰ mba tar lə-si, gə nje gə Lawdise gə nje gə Yerapolis tɔ.

¹⁴ Lugu gə to dɔgətoro, ngon ko̰-si gə m-njig-e ya̰, na m-o-si m-ar ꞌne, ngaɓa Demas tɔ.

¹⁵ Oje ngan ko̰ naaje gə Lawdise ar-mje, ngaɓa Nimpa gə Mbo̰ naa lə njetakagəje gə to kəy lə-a.

¹⁶ Ngaɓa logə d-a tura mbede gə nee ɓe lə-si ɗaa, ꞌɗaje gaa ar-je ꞌtura lo mbo̰ naa lə njetakagəje gə Lawdise tɔ, ngaɓa sisəy kara may kar ꞌtura ye gə a kḭ ɓə lə nje gə Lawdise ɓə lə-si tɔ.

¹⁷ Be ɓa ꞌpaje ar-je Arəsipə: ꞌTɔsə kəm-i dɔ kula gə Mbayɓe um ji-i gə le gə maj-ɛ gə mba ɗa.

¹⁸ ꞌMa Pɔl ja, m-ɗa mbede nee gə ji-m: m-o ne si. Ar-je mə-si ole dɔ-m gə lo to kəy kula gə. May kar mənuji nay gə si!