Colossiendjé 1 - Mbede Lə Luba Kone Gə Sigi

Ko̰ naa gə ɗa oyo

¹ ꞌMa Pɔl, njeka̰ykula lə Kirisi Jeju gə go mə njigi lə Luba, gə ngon ko̰-si Timoce,

² m-ɗa mbede nee m-ar njerɔsangəje ngaɓa ngan ko̰-si gə njetakagə Kirisije gə tɔgərɔ, gə d-isi Kɔlɔsə: May kar Luba gə Bɔ-sijee ar-si mənuji gə ɗɛgɛgɛ!

³ J-a ɗa oyo Luba gə Bɔ Mbayɓe-je lə-si Jeju Kirisi ngaɓa j-a dəji-e ngɔɔgɔ-ngɔɔgɔ mba sisəy;

⁴ Logə tar ta gə ꞌtaje kagə Kirisi Jeju ngaɓa njigi gə ꞌnjigije njerɔsangəje tɔ̰y oso mbi-sijee gə,

⁵ mba ne kunda mə gə d-ar aw ngina si mə dara gə, gə go Tar gə May gə to tar gə tɔgərɔ gə ꞌpa d-ar-si ꞌgərəje kede le.

⁶ Tar gə May gə nee le aw ce ɓə lə-si, ɗəw kara baa to gə kand-e to ngaɓa ta dɔ nangə tɔ̰y ja to to gə to ne horo-sisəy gə kede ləw dɔ ndɔ gə oje ne tar mənuji lə Luba gə dɔgɔr-ɛ ja ngaɓa ꞌgərəje tar mənuji nee le to gə tar gə tɔgərɔ ja,

⁷ Gə go nendo gə ngon ko̰-si Epapəras, njeba kula ndoo-si, ɗaa ꞌne n-to dəw gə ɗa kula lə Kirisi gə maj-ɛ ja n-ta nee toro sijee,

⁸ ngaɓa ꞌne ɓa n-kila tar njigi gə Njil ɗa ne kula mə-si gə n-ar ja gərə.

Njeka̰y kula dəji Luba

⁹ Gəl-e gə nee ɓa sijee kara, un kud-e dɔ ndɔ gə j-o ne tar-ɛ ja, j-a dəji Luba ngɔɔgɔ-ngɔɔgɔ mba sisəy ngaɓa j-a dəji-e mba kar n-ar gərə mə njigi lə-a ɗusu mə-si, gə kəm karə gə negərə tɔ̰y gə ɗəw Njil gə,

¹⁰ mba kar pa nja-si to ne gə may gə asə ləl Mbayɓe dan neje gə tɔ̰y, mba kar ꞌɗaje ne kulaje gə may-may ja tɔ̰y ngaɓa kar ꞌtɔgəje ne dɔ gərə Luba gə gə kede-kede nəm tɔ.

¹¹ Mba kar ubaje ne singa gə go singamongə riɓar lə-a, kar uwaje ne gədərə ngaɓa ilaje ne mə-si dɔ mar-ɛ gə tɔ.

¹² Cibi ꞌɗaje oyo Bɔ dəwje gə rɔləl, gə ɗa ar asə kingaje ne neduba gə njerɔsangəje dan lokarə gə.

¹³ N-ɔr si lo gə cil ciməri o̰ ɓe kəne, ɗaa n-odo-si n-um-si mə ɓeko̰ gə lə ngon-e gə njigi-e gə maj-ɛ,

¹⁴ Mbɔr dɔ-ɛ ꞌne ja ɓa j-inga ne kaji ngaɓa tar neɗaje gə kṵra̰y ɔr ne dɔ-si gə.

¹⁵ N-to ndaji Luba gə kəm dəw o-e ang, ngaɓa n-to dər nekundaje tɔ̰y.

¹⁶ Mba ꞌɗa ne ne tɔ̰y mə dara gə, gə dɔ nangə nee ɗəw gə lə-a, ne gə kəm dəw o gə ye gə kəm dəw o ang, ngəndəng mbay, nje dum dɔ loje, njeko̰ dɔ loje gə njesingamongəje. Neje tɔ̰y nee le ꞌne ja n-ɗa ngaɓa ɔji dɔ-ɛ ja.

¹⁷ N-ga̰ kede no neje gə tɔ̰y ngaɓa mbɔr dɔ-ɛ ꞌne ja ɓa neje tɔ̰y to ne tɔ.

¹⁸ ꞌNe ja n-to dəw dɔ Mbo̰ naa lə njetakagəje to to gə dɔ dəw o̰ ne dɔ darɔ be. N-to kun kud-e, n-to dɔngɔr dəw horo nje gə d-uy gə, mba ce ne no-je gə dɔngɔr tɔ̰y.

¹⁹ Mba Luba njigi kar n-un darɔ-ɛ ye ja mɔgɔgɔ,

²⁰ ngaɓa mba n-gɔl neje tɔ̰y n-ar um sə-a ꞌne ja naa gə, neje gə dɔ nangə nee gə neje gə mə dara gə, kar ɗɛgɛgɛ ɗe ne ɗəw gə lə-a gə ɗəw məs-e gə kagə dəsə gə.

²¹ Sisəy kara, kede le ꞌtoje mbaje kəm Luba gə ngaɓa ꞌtoje njeba̰a̰je lə-a gə go kəjije lə-si, gə go kula ɗaje lə-si gə kṵra̰y,

²² ngaa ɓisine n-um gə si naa gə ɗəw kuy gə lə darɔ-ɛ, mba kar ꞌceje ar-je ne no-ɛ gə gə njerɔsangəje gə may pɛdə ngaɓa tar uwa dɔ-si ang;

²³ Ne kara baa le ɗaa, may kar ar-je dɔ takagə gə, ꞌɓərəje ngira-si kəne, gə ar-je njang, awje əw gə kunda mə gə Tar gə May pa tar-ɛ ar-si le ang. Tar gə May gə ꞌpa d-ar nekundaje tɔ̰y gəl dara gə, ngaɓa ꞌma Pɔl m-təl m-to nje kul-ɛ tɔ.

Kulaje gə ɗɔje lə Pɔl

²⁴ Ɓisine ɗaa m-ɗa rɔləl dan ꞌməsərə gə m-o ɔji dɔ-si ngaɓa ɗəw darɔ-m gə ɗaa m-tɔl ta kɛsə ꞌməsərə gə Kirisi o ɔji dɔ darɔ-ɛ gə to Mbo̰ naa lə njetakagəje.

²⁵ Mbo̰ naa le njetakagəje nee le ja m-təl m-to njekula kəne. Luba um kula ji-m gə mba kar m-ila mbərə tar lə-a gə n-pa n-ar-si.

²⁶ Tar gə nee le iya rɔ-ɛ ləw baa ja kəm dəwje gə tɔ̰y ngaa ɓogəne ꞌkila gə ɗaga d-ar njerɔsangəje tɔ̰y,

²⁷ Sijee gə Luba njigi kila kar-si ja gərə ne riɓar gə nebaw gə nee, gə iya rɔ-ɛ horo dəwje gə ꞌgərə Luba ang gə, Kirisi ga̰ horo-si gə, to nekunda mə kar riɓar!

²⁸ ꞌNe ja j-ila mbərə lə-a, j-a ndəji ne dəwje kara kara ngaɓa j-a ndo dəwje kara kara gə kəm karə tɔ̰y, mba kar na-na kara to ne dəw gə may pɛdə ɗəw gə lə Kirisi.

²⁹ Mba ye gə nee ɓa m-ɗa ne kula, m-ɗɔ ne gə singa-a gə ɗa kula rɔ-m gə gə mong-e.