Apocalypse 9 - Mbede Lə Luba Kone Gə Sigi

¹ Anji gə njekum gə mi to kuul lə-a ɗaa m-o ndɛ̰ndərɛ̰ndɛ̰je d-ḭ dara ꞌtoso nangə. Ɗaa d-ar-ɛ lakɛrɛ gə kar kudu ta buwa wəl gə sṵra̰ godo.

² Ndɛ̰ndərɛ̰ndɛ̰ le ɔr ta buwa wəl gə sṵra̰-a godo ɗa sə-a pər ce kəne ta naa gə sa pər gə o̰ bilim-bilim be, ɗa udu kəm kar gə kəm ləl libi.

³ Ɗa ꞌbɛdɛje ꞌce mə sa gə nee le ꞌta dɔ nangə tɔlɛ-tɔlɛ ngaɓa d-ar-je singamongə gə ta naa gə kar ḭje gə dɔ nangə gə be.

⁴ ꞌPa d-ar-je gə mba kar ꞌɗa məyɛr kara be gə mu gə dɔ nangə gə ang nəm, gə kagə kara be ang nəm, ngaa gə dəwje gə bəngə ji Luba to ngo no-je gə ang ja baa.

⁵ D-ar ɗəw gə mba kar ꞌtɔl-je gə tɔl ang ngaa, mba kar d-ula kəm-je ndoo kəm nay mi. Kəm-je gə d-a kula ndoo le a kasə naa kara baa gə dəw gə yḭ unda-a be.

⁶ Mə ndɔ-ɛje gə əng le, dəwje d-a sangə yo ngaa d-a kinga-a ang. D-a njinga rɔ-je gə mba kuy ngaa yo a ka̰y-je gə ka̰y.

⁷ ꞌBɛdɛje nee le d-unda rɔ kundaje gə d-um neɗɔje rɔ-je gə mba kaw ne gə ɗɔ gə, ne gə to dɔ-je gə le, o nama ta naa gə jɔgə gə ꞌɗa gə maa be, ngaɓa ta kəm-je kara ta naa gə kəm dəwje be tɔ.

⁸ Bḭ dɔ-je ta naa gə bḭ dɔ jeneje be, ngaɓa ngangə-je ta naa gə ngangə ꞌnam be.

⁹ D-ula kubu ɗɔ gə ngira king-king to gə ngaw lar be kar-je ɗaa kɔr bagə-je ɓar ta naa gə kɔr pusu ɗɔ gə kundaje bula ɓa ꞌndɔr d-aw ne gə ɗɔ gə be.

¹⁰ Ɓongə-je ta naa gə ɓongə yḭ be, tər lə-je ɗusu tub-tub, ngaɓa ɓongə-je le, singamongə ɗa məyɛr dəwje kəm nay mḭ to kəne.

¹¹ Mbay lə-je gə to gə anji gə mə buwa wəl gə, gə ri-a gə tar Ebərə na Abadon, ngaɓa gə tar gərɛk na Apoliyo̰ gə kɔr gəl-e na Nje tuji lo.

¹² Tuji gə dɔngɔr ɗaa nday ngaa. A o, tujije joo ꞌɗe d-uwa go-e ja cibi.

¹³ Anji gə njekum gə misa̰ to kuul lə-a ɗaa m-o ndu ḭ kil no kɔgə gə sɔɔ gə ꞌɗa gə maa, gə to no Luba gə.

¹⁴ Ndu le pa ar anji gə njekum gə misa̰ gə uwa kuul ji-a gə na: ꞌTudu anjije gə sɔɔ gə ꞌtɔ-je gə ngaw lar dɔ babo Əpəratə gə um-je taar.

¹⁵ Ɗa ꞌtudu anjije gə sɔɔ gə d-ar pɛrɛrɛ ɔji dɔ kar-ɛ, gə ndɔ-ɛ, gə nay-ɛ, gə ɓal-ɛ gə d-a tɔl ne dəbə dəwje gə kara gə kay-je dana lo munda le.

¹⁶ M-tuga mbi-m ɗaa m-o kɔr njeɗɔje gə d-al kunda gə ꞌdum tura.

¹⁷ To gə be ɓa, gə ɗəw ko ne gə lo kiya gə ɗaa, m-o kundaje gə njekal-jeje: d-ula kubu ɗɔ gə ngira king-king gə un ndaji pər, gə ndul gidiri ngaɓa to gə bu madə be tɔ. Dɔ kundaje le ta naa gə dɔ ꞌnam be, ngaɓa ta-je tomɛ pər, gə sa pər gə sori.

¹⁸ Pər, gə sa pər, gə sori gə ce ta kundaje gə le, to gə tujije munda. Ɗəw gə lə tujije gə munda nee le ja ɓa dəwje gə ꞌkay-je dana lo munda le, dəɓə-je gə ɓe kara ꞌbusu ne ragə tɔ.

¹⁹ Mba singamongə lə kundaje le to mə kil-je gə ngaɓa to ɓongə-je gə. To gə be ɓa ɓongə-je ta naa gə lije, ɗaa dɔ-je kəne, ye ɓa d-asə mba ɗa ne dəwje məyɛr.

²⁰ Ɔji dɔ kɛsə dəwje gə ꞌnay ɗaa, nje gə d-uy yo tuji gə oso ang le, ꞌturu kəji lə-je ɔji dɔ kula ɗa-je ang, ꞌpolo njilje gə kṵra̰y dɔ-je gə kede-kede, magəje gə maa ose gə lar kasə, gə lar kasə gə ər ose gə kagəje gə d-asə ko lo ndɔ kara be ang nəm, ko tar ndɔ kara ang nəm ɓa, nja ndɔ kara ang nəm tɔ.

²¹ ꞌTuru kəji lə-je dɔ tɔl dəwje gə lə-je ang nəm, dɔ ɗa mbɛ̰je gə lə-je ang nəm, dɔ kayaje gə lə-je ang nəm, dɔ ɓogoje gə lə-je ang nəm tɔ.