Apocalypse 8 - Mbede Lə Luba Kone Gə Sigi

Bəngə ji gə njekum gə siri gə ku ba̰y kəndə mambo̰

¹ Lo gə Ngon badəm ɔr ta bəngə ji gə njekum gə siri ɗaa, ndu lo pa kəng mə dara gə asə ngan kar dɔg mundaje əng be.

² M-o anjije gə siri gə d-ar no Luba gə; d-ar-je kuul siri tɔ.

³ Anji gə ɗangə kara ɗe d-ar dɔ ngəndəng mbay gə; n-uwa ku ba̰y kəndə mambo̰ gə to gə maa ji-a gə. D-ar-ɛ ba̰y kəndə mambo̰ gə kobəre mba kar n-mbo̰ naa gə kara baa gə dəjije lə njerɔsangəje tɔ̰y n-aw ne no kɔgə maa gə, no ngəndəng mbay gə.

⁴ Sa ba̰y kəndə mambo̰ uba ji anji gə ngug-ngug gə taar no Luba gə, naa gə kara baa gə dəjije lə njerɔsangəje.

⁵ Cibi, anji təl un ku ba̰y kəndə mambo̰ um pər gə to no kɔgə kəne tubu ɗaa bḭ ila nangə ɗaa təl to nji, ndangə, ndu ɓar, nji təl, gə dɔ nangə ye tɔ.

⁶ Be ɓa anjije gə siri gə d-uwa kuulje gə siri ji-je gə le ꞌgɔl rɔ-je mba to tɔ.

Kuulje misa̰ gə dɔngɔr

⁷ Ye gə dɔngɔr to kuul lə-a: kuji gə pər gə polo naa gə məsə wɛgəsɛ-wɛgəsɛ toso nangə. Dɔ nangə gə ꞌkay dana ɓe munda le, dəb-e gə kara o̰ pər kərəng, ꞌkay kagəje dana ɓe munda ɗaa dəb-eje gə ɓe kara o̰ pər kərəng ngaɓa mə kɔr gə ndul gə man ngɔ̰y-ngɔ̰y le o̰ pər kərəng tɔ.

⁸ Anji gə njekum gə joo to kuul lə-a, o ɗa pa na dɔ mbal gə bo gə o̰ pər ɓa d-ɔr-ɛ d-ila-a dan man babo gə. Babo gə ꞌkay dana ɓe munda le dəbe gə kara təl məsə.

⁹ Nekundaje gə d-aw dan man babo gə le, ꞌkay-je dana ɓe munda ɗaa, dəɓə-je gə ɓe kara d-uy kərəng ngaɓa toje gə ꞌkay-je dana ɓe munda le, ꞌtuji dəb-eje gə ɓe kara pugudu.

¹⁰ Anji gə njekum gə munda to kuul lə-a ɗaa ndɛ̰ndərɛ̰ndɛ̰je gə boy ya̰ d-ḭ dara ꞌtoso nangə d-o pər to gə ngəəl be toso dɔ dəbə baa gə kara gə ꞌkay dana ɓe munda gə dɔ kəm ɗəw manje gə.

¹¹ Ndɛ̰ndərɛ̰ndɛ̰ le ri-a na man kadə koso. ꞌKay manje dana ɓe munda ɗaa ye gə ɓe kara təl to gə man kadə koso ngaɓa dəwje bula d-uy mba manje gə ꞌtəl d-adə mbagə-mbagə.

¹² Anji gə njekum gə sɔɔ to kuul lə-a ɗa dəbə kar gə ꞌkay dana lo munda, gə dəbə nay gə ꞌkay dana lo munda, gə dəbə ndɛ̰ndərɛ̰ndɛ̰je gə ꞌkay-je dana lo munda le ꞌtuji-je pugudu. Dəb-eje gə ɓe kara ndogo ang magə. ꞌKay lokarə dana ɓe munda ɗaa dəb-e gə ɓe kara unda mburugu ngaɓa londul kara to gə bənəng tɔ.

¹³ Be ɓa m-a lo ɗaa m-o ndu gera gə ḭ bagə midi-midi mə dara gə taar ɗa ne gə ndu-e gə boy na: Tuji! Tuji! Tuji to ɔji dɔ dəwje gə dɔ nangə gə nee, mba ndu kuulje lə anjije gə munda gə a ꞌɓar le ja cibi!