Apocalypse 7 - Mbede Lə Luba Kone Gə Sigi

Dəwje gə bəngə ji Luba to ɓida noje gə

¹ Go-e gə gugu ɗa m-o anjije sɔɔ gə d-ar taar kil nangə gə sɔɔ. D-uwa ləlje gə sɔɔ ngangə mba kar ləl kara ula dɔ nangə gə ang nəm, dɔ babo gə ang nəm, ngaɓa dɔ kagə gə kara be ang nəm tɔ.

² Ɗaa m-o anji gə ɗangə kara ḭ lo ce gə lə kar. Bəngə ji Luba gə nje kisi kəm baa to ji-a gə. Ɗaa n-uru ꞌkuwi gə ndu-e gə boy n-ar anjije gə sɔɔ gə d-ar-je singamongə mba kar ɗa məyɛr dɔ nangə gə babo,

³ n-pa na: Əw-je rɔ-si mba ɗa məyɛr dɔ nangə, babo, ose kagəje, saar gə mba kar-si j-ɔsə bəngə ji ɓida no njekulaje gə lə Luba kede nam ɓa.

⁴ Ngaɓa m-tuga mbi-m m-o ne kɔr nje gə d-ɔsə bəngə ji rɔ-je gə: Tɔl-tɔl dɔg lo tɔl gə gir-je gə tɔl-tɔl dɔg lo dɔg sɔɔ (144 000) gə d-ɔsə bəngə ji rɔ-je gə, d-ḭ gəl kuji tɔ̰y gə ɔji dɔ nganje lə Ijirayɛl:

⁵ Gəl kuji lə Juda tɔl-tɔl dɔg lo dɔg gə gir-je gə joo gə d-ɔsə bəngə ji ɓida noje gə, gəl kuji lə Ruben tɔl-tɔl dɔg lo dɔg gə gir-je gə joo; gəl kuji lə Gadə tɔl-tɔl dɔg lo dɔg gə gir-je gə joo;

⁶ gəl kuji lə Ajɛr tɔl-tɔl dɔg lo dɔg gə gir-je gə joo; gəl kuji lə Nɛpətali tɔl-tɔl dɔg lo dɔg gə gir-je gə joo; gəl kuji lə Manase tɔl-tɔl dɔg lo dɔg gə gir-je gə joo

⁷ gəl kuji lə Simiyo̰ tɔl dɔg lo dɔg gə gir-e gə joo; gəl kuji lə Lebi tɔl-tɔl dɔg lo dɔg gə gir-je gə joo, gəl kuji lə Isakar tɔl-tɔl dɔg lo dɔg gə gir-je gə joo

⁸ gəl kuji lə Jabulo̰ tɔl-tɔl dɔg lo dɔg gə gir-je gə joo, gəl kuji lə Jəjəb tɔl-tɔl dɔg lo dɔg gə gir-je gə joo; gəl kuji lə Bɛnjamɛ̰ tɔl-tɔl dɔg lo dɔg gə gir-je gə joo gə d-ɔsə bəngə ji rɔ-je gə.

⁹ Go-e gə gugu, m-a lo m-o ɗaa, a o, bula dəwje gə bo ya̰ gə dəw kara kara a kasə tura-je ang, d-ḭ gə gəl kuji tɔ̰y, gə gəl kuji dəwje, dəw mə ɓeje bula ya̰, gə ndo̰ tarje d-ar no ngəndəng mbay gə gə no ngon badəm gə, d-ula-je kubuje gə ngal yududu gə nda. D-uwa kam kagə ji-je gə,

¹⁰ ɗa ꞌpa tar gə ndu-je gə boy na: Kaji to kar Luba lə-si gə isi dɔ ngəndəng mbay gə to kar Ngon badəm nəm tɔ.

¹¹ Ɗaa anjije tɔ̰y d-ar ꞌgugu dɔ ngəndəng mbay mbugu, ngaɓa gə dɔ Ngatɔgəje gə nekundaje gə sɔɔ gə d-aw kəm baa. D-oso nangə no ngəndəng mbay gə ꞌdəbə ta kəm-je nangə, ɗaa ꞌpolo Luba,

¹² ꞌpa na: Oyo! Kɔsə gaji, riɓar, kəm karə, ɗa oyo, ɗɔy, singamongə gə tɔgə to kar Luba lə-sijee gə ndɔ gə ndɔ! Oyo.

¹³ Be ɓa kara lə ngatɔgəje un tar dəji-m na: Dəwje gə d-ula kubuje gə ngal yududu-yududu gə nda kələw-kələw nee le, ꞌto gə naje wa? Ngaɓa d-ḭ ɗa wa?

¹⁴ Ɗaa ꞌma m-ila-a kəne m-pa na: Mbayɓe lə-m, ꞌi ꞌgərə som! N-pa n-ar-m na: D-ḭ lo neməko̰ gə to ɓəəl ya̰. ꞌTogo kubuje lə-je gə ngal yududu-yududu ngaɓa ꞌsugu gə məsə Ngon badəm gə d-ar nda kələw-kələw.

¹⁵ Gəl-e gə nee ɓa d-ar ne no ngəndəng mbay gə lə Luba ꞌpol-e ne kara gə cil mə kəy gə lə-a. Ye gə isi dɔ ngəndəng mbay gə a kar d-isi mə kəy gə lə-a;

¹⁶ Ɓo a tɔl-je ndɔ kara be ang nəm, kunda man a tɔl-je ndɔ kara be ang nəm, kar gə kundu kar a nunga-je ndɔ kara be ang tɔ.

¹⁷ Mba Ngon badəm gə ar dan ngəndəng mbay gə dana le a to gə njekuul-je, ɗaa n-a kɔr no-je kaw gə je kəm ɗəw man təbə gə kul gə. Ngaɓa Luba a bḭ man no tɔ̰y kəm-je gə.