Apocalypse 5 - Mbede Lə Luba Kone Gə Sigi

Mbede gə bəngə ji to t-ɛ gə, gə ngon badəm

¹ Be ɓa, nje kisi dɔ ngəndəng mbay gə le, m-o-e, uwa mbede gə ꞌɗa ne m-e gə gə bagir-e gə gə bəngə ji siri to kəne, ji-a gə kɔl gə.

² Ɗaa m-o anji kara gə njesingamongə ila mbərə gə ndu-e gə boy na: Na ɓa asə kɔr ta mbede gə nee gə mba tuji bəngə ji gə ꞌrɛ̰ ne t-ɛ wa?

³ Ngaa, dəw kara be mə dara gə ose dɔ nangə gə nee ose gəl nangə gə, asə mba cɛ̰ mbede gə nee le ang nəm, gə kila kəm-e kəne ang nəm tɔ.

⁴ M-no ɓəgəgə-ɓəgəgə mba dəw kara baa be kara asə mba cɛ̰ mbede le ang nəm, ngaɓa gə mba kila kəm-e kəne ang nəm tɔ.

⁵ Ngaa, buba gə kara horo mar-ɛje gə pa ar-m na: ꞌNo ang! A o, ꞌne gə ꞌnam gə gəl kuji gə lə Juda, ye gə ngira-a ce gəl Dabidi gə le, n-cɛdə ɗɔ nam. N-asə cɛ̰ mbede nee gə bəngə ji rɛ̰ t-ɛje gə siri.

⁶ Ɗa m-o Ngon badəm kara ar dan ngəndəng mbay gə dana ngaɓa nekundaje gə sɔɔ gə d-aw kəm baa, gə bubaje gugu dɔ-ɛ d-ila-a dana tɔ. N-to to gə d-unja gɔb-ɛ be. Gaji-ɛ siri ngaɓa kəm-e siri gə ꞌto gə njilje gə siri gə Luba ula-je gə dɔ nangə nee ja tɔ̰y.

⁷ Ɗaa n-ɗe n-ta mbede gə to ji kɔl dəw gə isi dɔ ngəndəng mbay gə le.

⁸ Lo gə n-ta mbede le ɗaa, daje gə sɔɔ gə bubaje gə dɔg joo gə gir-je gə sɔɔ d-unda ꞌburamba no ngon badəm gə. Na-na kara uwa konde gə ngo nekay gə to gə maa gə ba̰y kəndə mambo̰ ɗusu tubu ji-a gə, tɔji dəjije lə njerɔsangəje.

⁹ D-ɔsə pa gə sigi kara ꞌpa na: ꞌI asə mba ta mbede le nəm, gə mba kɔr t-ɛ gə rɛ̰ gə bəngə ji-je gə to kəne nəm tɔ, mba d-unja gɔb-i gə ne məsə, ɗaa məs-i ɓa ꞌi uga ne dɔ gəl kuji tɔ̰y, ndo̰ tar tɔ̰y, dəw mə ɓeje tɔ̰y gə gəl kuji dəwje ar Luba.

¹⁰ ꞌTəl-je gə ɓeko̰, ngaɓa gə njekapoloje kar Luba lə-sijee, ɗaa d-a ko̰ ɓe dɔ nangə gə nee.

¹¹ Ngaɓa m-a lo ɗaa m-o ndu anjije no kɔgə gə tɔl-tɔl dɔg lo bula-bula, gə ndu nekundaje gə d-aw kəm baa ngaɓa gə ngatɔgəje

¹² ꞌPa gə ndu-je gə boy na: Ngon badəm gə d-uja məs-e le asə mba kinga singamongə, gə nekinga, kəm karə, singa, ɗɔy, riɓar gə ndu tɔr.

¹³ Ɗaa nekundaje tɔ̰y ja gə mə dara gə, gə dɔ nangə, gə gəl nangə gə, ngaɓa babo gə neje tɔ̰y gə to kəne le, m-o ndu-je ꞌpa na: Dəw gə isi dɔ ngəndəng mbay gə je gə Ngon badəm le ndu tɔr, ɗɔy, riɓar gə ko̰ ɓe to kar-je, gə ndɔ gə ndɔ.

¹⁴ Ɗaa nekundaje gə sɔɔ gə d-aw kəm baa le ꞌpa na: Oyo! Ɗaa ɓugaje le d-um məkəji-je nangə ɗaa ꞌpolo.