Apocalypse 4 - Mbede Lə Luba Kone Gə Sigi

Polo Luba gə mə dara gə

¹ Go-e gə gugu ɗaa m-o ta ɗəw cɛ̰ mə dara gə, ɗaa ndu gə dɔngɔr gə pa sə-m tar gə ur mbi-m gə le ɓar to gə kuul be, pa na: Ɔdə gə nee, ɗa m-a tɔji ne gə a nday mə ndɔ gə aw ɗe gə kede əng.

² Gə ngɔdə baa, Njil uba-m pɛ uwa-m. Ɗaa m-o ngəndəng mbay kara mə dara gə, ɗaa dəw kara isi dɔ ngəndəng mbay gə nee le.

³ Dəw gə isi kəne nee le unda rɔ ər gə ꞌɓar-ɛ jasəpə gə sarədowan nəm tɔ. Ngaɓa ngaw bura nji gə ta naa gə ər gə ꞌɓar-ɛ emerɔdə gugu dɔ ngəndəng mbay le.

⁴ Ngəndəng mbayje dɔg joo gə gir-e gə sɔɔ ꞌgugu dɔ ngəndəng mbay le d-ila-a dana, ɗa bubaje dɔg joo gə gir-je gə sɔɔ, gə d-ula kubu gə nda, gə tuga jɔgə gə to gə maa dɔ-je gə d-isi kəne.

⁵ Ngəndəng mbay le təl lə nji gə ndu dəwje, gə ndangə lə nji ꞌce kəne. Lambe siri gə o̰ pər bilim-bilim gə to gə njilje lə Luba gə siri to no ngəndəng mbay gə le.

⁶ No ngəndəng mbay gə le, ne to kəne ta naa gə babo gə arə kə̰rə̰rə̰ to gə ər gə ɓar-ɛ kirisital be. Dan ngəndəng mbay gə dana, gə gir-e gə kɔr-kɔr le, daje sɔɔ gə d-uba kəm-je no-je gə kede nəm gugu nəm njḭ d-isi kəne.

⁷ Da gə dɔngɔr ta naa gə ꞌnam, njekum gə joo ta naa gə ngon bɔ mangə, njekum gə munda le ta kəm-e ta naa gə kəm dəw ngaɓa njekum gə sɔɔ ta naa gə gera gə ɔr bagə tɔ.

⁸ Nekundaje gə sɔɔ gə d-aw kəm baa nee le, na-na kara baag-ɛ misa̰-misa̰. Kəm-je ɗusu rɔ-je njḭ gugu bagir-je ula naa gə mbugu saar ce mə-je gə kəy kɔrɔgə. Kar gə cil le, d-uwa kɔr-je ang, ɗaa ꞌpa na: Njerɔsangə, njerɔsangə, njerɔsangə, Mbayɓe, Luba gə njesingamongə, dəw gə nje ga̰, gə ga̰ kede ləw baa, dəw gə a ɗe, njesingamongə gə dum dɔ lo.

⁹ Ngaɓa taar-taar lo gə nekundaje gə sɔɔ gə d-aw kəm baa d-ɔsə gaji nje kisi dɔ ngəndəng mbay gə, ꞌne gə nje kisi gə ɓal-ɓal, ngaɓa ꞌɗɔy-ɛ gə ꞌɗ-ɛ oyo ɗaa,

¹⁰ ɓugaje gə dɔg joo gə gir-je gə sɔɔ le d-unda ꞌburamba no nje kisi dɔ ngəndəng mbay gə, ꞌpolo Nje kisi gə ɓal-ɓal ɗaa d-um jɔgəje lə-je nangə no ngəndəng mbay gə ɗaa ꞌpa na:

¹¹ Mbayɓe Luba lə-si, kəm kar-i inga rɔnduba, kəm ɗɔy-i gə kəm kar-i inga singamongə mba ꞌi ja unda neje tɔ̰y, gə go mə njigi lə-i, ɗaa neje nee le ꞌga̰ ngaɓa ꞌi ja unda-je.