Apocalypse 3 - Mbede Lə Luba Kone Gə Sigi

¹ ꞌƊa mbede ula ne ar anji lə mbo̰ naa lə njetakagəje gə Sarədə: A o, tar gə dəw gə uwa njilje gə siri lə Luba gə ndɛ̰ndərɛ̰ndɛ̰je gə siri ji-a gə pa le ɓa nee: M-gərə kula ɗa-ije; m-gərə gə maj-ɛ to gə ꞌpa tar lə-i gə lo-lo na aw kəm baa, ngaa uy.

² Unda kəm karə dɔ rɔ-i gə ɓo ula jingaw mə kɛsə nje gə ꞌnay ta yo gə dəb gə mba kuy, mba m-o kula ɗa-ije arə ngadə ta kəm Luba gə lə-m ang.

³ Ar mə-i ole dɔ ɗəw gə ꞌta ne tar ta-je gə ose dɔ ɗəw gə ꞌtuga mbi-i o ne. ꞌNgom tar gə nee ɓo ꞌturu tar kəji lə-i; to gə ɓo unda kəm karə dɔ rɔ-i gə ang nama, m-a ɗe to gə nje ɓogo be, lal kar ꞌgərə kar gə m-a ɗe kuba-i ne nangə bus.

⁴ Ngaa, Sarədə gə le, dəwje lə-i gə kɛm, gə kubu lə-je uwa yoro ang ꞌga̰ kəne əng. D-a dan-m, gə kubu lə-je gə nda mba ꞌje d-asə ja.

⁵ Be ɓa, dəw gə cɛdə ɗɔ nama, d-a kula-a kubu gə nda; m-a tuji ri-a mə mbede təbə gə ang, ngaɓa m-a pa tar lə-a gə ɗaga no gɔl Bɔy gə, gə no gɔl anjije gə lə-a.

⁶ Dəw gə mbi-a ga̰ nama, may kar-ɛ o ne tar gə Njil pa ar mbo̰ naaje lə njetakagəje.

⁷ ꞌƊa mbede ar anji lə mbo̰ naa lə njetakagəje gə Piladɛləpi ꞌpa na: A o, tar gə njerɔsangə, dəw gə gadə-gadə, Gə uwa ngon lakɛrɛ lə Dabidi ji-a gə, Gə ɔr ta ɗəw nama dəw a kudu ang, Gə udu ta ɗəw nama dəw kɔr ang pa le ɓa nee.

⁸ M-gərə kula ɗa-ije. A o, m-ɔr ta ɗəw m-ila tagə no-i gə, dəw kara kara a kasə kudu ang. Singa-i njɛ̰ ja baa ngaa, ꞌngom tar lə-m ngaɓa ꞌma̰y tar dɔ ri-m gə ang tɔ.

⁹ A o, m-ar-i dəwje gə kəy nendo gə lə ꞌSu, dəwje gə ꞌɗa rɔ-je gə Jiibije, ngaa ꞌto Jiibije ang baa, ꞌto nje pa tar gə ɗəgərəje. O, m-a kar-je ꞌɗe d-um məkəji-je nangə no gɔl-i gə, ngaɓa d-a gərə to gə m-ɓol-i.

¹⁰ Mba ꞌngom tar lə-m uwa gədərə ɗaa, ꞌma kara m-a ngom-i dɔ kar nena gə a ɗe dɔ dəwje gə tɔ̰y, gə a kum dəwje gə dɔ nangə gə nee dan nena gə.

¹¹ M-a ɗe ɓisine. Uwa ne gə inga le gaa mba kar dəw kara kara ta dɔ gugu lə-i ang.

¹² Dəw gə cɛdə ɗɔ nama, m-a kar-ɛ to gə dubu mə kəy gə lə Luba, a kila gɔl-ɛ ɗangə ang car, ngaɓa m-a kunda ri Luba lə-m, gə ri ɓebo lə Luba lə-m gə to Jerujalɛm gə sigi gə ḭ dara rɔ Luba gə lə-m dɔ-ɛ gə, ngaɓa ri-m ꞌma gə sigi nəm tɔ.

¹³ Dəw gə mbi-a ga̰ nama may kar-ɛ o ne tar gə Njil pa ar mbo̰ naaje lə njetakagəje.

¹⁴ Ɗa mbede ar anji lə Mbo̰ naa lə njetakagəje gə Lawdise: Be ɓa n-ne gə Oyo, njetar naji gə njetakagə gə tɔgərɔ, Ngira nekundaje lə Luba pa na:

¹⁵ M-gərə kula ɗa-ije: ꞌkul gə kul ang nəm ꞌləgə gə ləgə ang nəm. Ngaa to gə ɓo ꞌkul gə kul ose ꞌləgə gə ləgə je əng bənəng kara ne!

¹⁶ Ngaa mba ꞌn-unga gə purapo baa ngaɓa ꞌkul ang nəm, ꞌləgə ang nəm, ɗaa m-a tɔm-i gə ta-m.

¹⁷ Mba ꞌpa na: M-to njenekinga, m-isi dan nekinga gə dana badagə ɗaa m-aw ndoo ne kara ang, cibi ngaɓa ꞌgərə to gə ꞌto gə njendoo ang nəm, gə njekəmtondoo ang nəm, gə nje ko məsərə ang nəm, gə njekəmandoo ang nəm, gə nje kəm tɔ ang nəm, gə nje kaw kudu dum ang nəm tɔ.

¹⁸ M-ndəj-i mba kar-i ꞌndogo sə-m maa gə d-ula-a ndubu pədə d-ar ar yororo mba kar-i ꞌtəl ꞌto ne njenekinga, gə kubuje gə nda mba kar-i ula rɔ-i gə on ne lo rɔ kul lə-i, gə kam ngogula ila kəm-i gə mba kar-i o ne lo.

¹⁹ Dəwje tɔ̰y gə ꞌma m-njigi-je le, m-ndangə-je gə m-siri-je. Ḭ nja̰y ɓo ꞌturu kəji lə-i.

²⁰ A o, m-ar ta kəy gə, m-unda ta kəy, dəw gə o ndu-m ɓa ɔr ta kəy ɗaa, m-a kandə kəy lə-a, m-a kusa sə-a ne ngaɓa ye a kusa sə-m ne tɔ.

²¹ Dəw gə cɛdə ɗɔ nama m-a kar-ɛ isi sə-m dɔ ngəndəng mbay gə lə-m to gə ꞌma kara m-cɛdə ɗɔ ɗaa m-isi gə Bɔy dɔ ngəndəng mbay gə lə-a.

²² Dəw gə mbi-a ga̰ nama may kar-ɛ o ne tar gə Njil pa ar mbo̰ naaje lə njetakagəje.