Apocalypse 22 - Mbede Lə Luba Kone Gə Sigi

¹ Cibi anji le tɔji-m man baa gə kar kaw kəm baa gə ndogo to gə kɔr ər gə ꞌɓar-ɛ kirisətal be, uba ɓula ngəndəng mbay gə lə Luba je gə ngon badəm.

² Ɗaa dan ɗəw gə boy gə mə ɓebo gə ngaɓa dɔ kungu baa gə ɓe joo pɛdə le, kagə təbə kara gə andə gɔl dɔg gə gir-e gə joo ga̰ kəne. Nay kara nama d-unja kand-e taar-taar. Kam kagə le to gə kuma kaji gəl kuji dəwje tɔ.

³ Nekugu tɔ̰y a godo saar gə no. Ngəndəng mbay le Luba je gə ngon badəm a ga̰ mə ɓebo gə le. Ɗaa, ngan njekulaje lə Luba d-a pol-e;

⁴ d-a ko kəm-e ngaɓa ri-a a to ngo noje gə tɔ.

⁵ Londul a godo saar gə no, d-a kaw ndoo ndogo le lambe ang nəm, gə ndoo ndogo le kar ang nəm tɔ. Mba Mbayɓe Luba ja a ndogo dɔ-je gə. Ngaɓa d-a ko̰ ɓe gə ɓal gə ɓal.

Ɗudu tar ndəjije

⁶ Anji n-pa n-ar-m na: Tarje gə nee le to gə tarje gə gadə ngaɓa tɔgərɔ nəm tɔ; Mbayɓe, Luba gə ar njil lə-a pajambərəje le, ula anji lə-a mba kar tɔji ngan njekulaje lə-a ne gə a ɗe ɓisine baa.

⁷ A o, m-aw m-ɗe ɓisine baa. Nokarə to kar dəw gə ngom tarje lə Luba gə pajambərə ɗa mə mbede gə nee le.

⁸ ꞌMa Ja̰ ja ɓa m-o neje gə nee le gə mbi-m nəm, gə kəm-m nəm tɔ. Ngaɓa logə kəm-m o gə mbi-m o ɗaa, m-um məkəji nangə no anji gə njetɔji-m neje le gə mba pol-e.

⁹ Ngaa n-pa n-ar-m na: Əw rɔ-i polo-m! M-to gə njeba kula lə-i gə njeba-ɛ lə ngan ko̰-i pajambərəje, gə nje gə ꞌngom tarje gə to mə mbede gə nee. Luba ɓa ꞌpolo-e.

¹⁰ Cibi n-pa n-ar-m na: Iya dɔ tarje lə pajambərə gə to mbede gə nee ang, mba dɔ kar nay dəb baa ngaa.

¹¹ Dəw gə to nje ɗa ne gadə-gadə nama may kar-ɛ uwa ne gadə-gadə le gaa, dəw gə nje ɗa ne gə mina nama may kar-ɛ uwa gaa tɔ, ngaa dəw gə nje ɗa ne gə dɔ naj-ɛ nama may kar uwa neɗa lə-a gə gə dɔ naj-ɛ kɛgə ngaɓa may kar njerɔsangə uwa rɔsangə lə-a kɛgə tɔ.

¹² A o, m-aw m-ɗe ɓisine baa, ngaɓa m-ɗe gə nekuga dɔ ji lə-m kara dɔ-m gə, mba kar na-na kara m-uga-a ne ɔji dɔ kula ɗ-ɛ ɗ-ɛ.

¹³ M-to Aləpa gə Omega, Dəw gə dɔngɔr gə Dəw gə ɗudu, lo kuma kudu ne gə lo tɔl ngangə ne.

¹⁴ Nje gə ꞌtogo kubu lə-je le, ꞌto gə njenokarəje mba d-asə kusa kandə kagə təbə, ngaɓa mba kar d-andə mə ɓebo gə ta ɗəw kəyje tɔ.

¹⁵ Bisije, njembɛ̰je, njekayaje, nje tɔl dəwje, nje polo magəje ngaɓa na-na ɓa gə njigi tar gə ɗəgərə ngaɓa to gə nje p-ɛ le, d-a tɔbə-je kum-je ɗaga.

¹⁶ ꞌMa, Jeju, m-ula anji lə-m mba kar-ɛ pa tar naji gə ɔji dɔ mbo̰ naaje lə njetakagəje ar-sisəy. ꞌMa le ɓa ngira-m ḭ gəl Dabidi gə, gə gəl kuji lə-a tɔ, duji lo kar gə ndogo.

¹⁷ Njil je gə jene nje ngaw ꞌpa na: ꞌƊe! May kar dəw gə o tar gə nee nama pa na: ꞌƊe! Dəw gə kunda man tɔl-ɛ nama may kar-ɛ ɗe, dəw gə njigi nama m-a kar-ɛ man təbə baa ja.

¹⁸ ꞌMa, m-pa tar naji le m-ar dəw gə njigi mba ko tarje gə pajambərə pa mə mbede gə nee: To gə ɓo dəw ila mar-ɛ kəne nama Luba a kum tujije gə ꞌpa tar-ɛ mə mbede gə nee le gə dɔ mar-ɛ gə dɔ mar-ɛ gə kar-ɛ.

¹⁹ To gə ɓo dəw ɔr ne mə tarje gə pajambərə pa mə mbede gə nee nama, Luba a kɔr ta ne lə-a kagə təbə, gə ɓebo gə to gə losang-ɛ, gə ꞌpa tar-ɛ mə mbede gə nee.

²⁰ Nje pa tar naji gə ɔji dɔ neje gə nee le pa na: Oyo, m-aw m-ɗe ɓisine. Oyo! ꞌƊe, Mbayɓe Jeju!

²¹ May kar mənuji lə Mbayɓe Jeju nay gə dəwje tɔ̰y!