Apocalypse 21 - Mbede Lə Luba Kone Gə Sigi

Dara gə sigi nangə gə sigi

¹ Be ɓa m-o dara gə sigi kara gə nangə gə sigi kara; mba dara gə dɔngɔr gə nangə dɔngɔr le d-igi sərərə ngaa, ngaɓa babo kara godo saar tɔ.

² Ɗaa m-o ɓebo gə to gə losang-ɛ, Jerujalɛm gə sigi, ḭ rɔ Luba gə dara ɗisi uru nangə, ta naa gə jene nje ngaw gə ɗa mandə mba ngab-ɛje.

³ M-o ndu ḭ ngəndəng mbay gə ɓar to gə boy wəəl na: Lo kisi lə Luba gə ga̰ horo dəwje lə-a le ɓa ye a nee. N-a kisi gə je. D-a to gə dəw mə ɓeje lə-a ɗaa ꞌne n-a to Luba gə ga̰ gə je naa gə.

⁴ N-a bɔrə man no ndədə kəm-je gə, yo a godo saar gə no, ngaɓa kuwa ndoo yo kara a godo nəm, kuy kara a godo nəm, ne gə to kara a godo nəm, mba neje gə dɔngɔr le ꞌsɛ̰rɛ̰ paa ngaa.

⁵ Ye gə isi dɔ ngəndəng mbay gə le pa na: A o, m-ɗa neje tɔ̰y to gə sigi. Cibi n-pa na: ꞌƊa mbede gə, mba tarje gə nee le, to gə tarje gə gadə gə tɔgərɔ.

⁶ Ngaɓa n-pa n-ar-m na: Ɓɛlɛ ngaa. M-to Aləpa gə Omega, lo kuma kudu ne gə lo tɔl ngangə ne. Ye gə kunda ɔr-ɛ nama m-a kar-ɛ man gə a̰y kuji-kuji gə kar kisi kəm baa, gə a ndogo gə lar ang.

⁷ Dəw gə cɛdə ɗɔ nama a kinga nenduba gə nee le, ɗaa m-a to gə Luba lə-a, ɗaa ye a to gə ngon-m.

⁸ Ngaa njeɓəəlje, nje məkədərəje, dəwje gə ngabula, nje tɔl dəwje, jərje, njembɛ̰je, nje polo magəje, gə nje tar gə ɗəgərəje tɔ̰y le, kar-je to dang pər gə o̰ bilim-bilim, gə dan sori gə: ye gə ne le to gə yo gə njekum gə joo.

⁹ Cibi, kara lə anjije gə siri gə d-uwa ngo kay neje siri gə tujije gə siri gə ɗusu tub-tub ji-je gə le ɗe pa tar ar-m pa na: ꞌƊe, m-a tɔji-i rɔ jene njemɔrə, ye gə to jene lə ngon badəm le.

¹⁰ Njil ɗe dɔ-m gə yiil ɗaa anji un-um aw sə-m dɔ ər gə boy ngaɓa ndə̰w̰ nəm, ɗaa n-tɔji-m Jerujalɛm, ɓebo gə to gə losang-ɛ gə ḭ ɓə lə Luba gə dara ur nangə.

¹¹ Rɔnduba lə Luba to dɔ-ɛ gə. Ndo̰y lə-a ta naa gə kɔr ər gə gad-e ɓi-ɓi, unda rɔ-ɛ to gə kɔr ər gə ɓar-ɛ na jasəpə gə to to gə ər gə ɓar-ɛ kirisital be.

¹² Ndogo bɔrɔ lə-a ndəər ngaɓa ndə̰w̰ ya̰ tɔ. T-ɛ dɔg gə gir-e gə joo, ɗa anjije dɔg gə gir-je gə joo d-ar t-ɛ gə, ngaɓa ꞌɗa ri gəl kaje lə Ijirayɛl gə dɔg gə gir-je gə joo kəne.

¹³ Lo ce gə lə kar, ta kəy kəne munda, dɔ ji gəl ta kəy kəne munda, dɔ ji kɔl ta kəy kəne munda, lo kandə gə lə kar, ta kəy kəne munda tɔ.

¹⁴ Ndogo bɔrɔ lə ɓebo le d-um kɔr ər nangə dɔg gə gir-e gə joo ɓa d-ɔsə gɔl-ɛ dɔ-ɛ gə, ɗaa kɔr ərje le, ꞌɗa ri njeka̰ykulaje lə ngon badəm gə dɔg gə gir-je gə joo kəne.

¹⁵ Ye gə pa sə-m tar le uwa kagə kɔji ne ji-a gə, to gə kagə ꞌɗa gə maa mba kɔji ne ɓebo gə t-ɛje gə ndogo bɔrɔ lə-a.

¹⁶ Ɓebo le dɔ dam-ɛ gə sɔɔ asə naa rəb-rəb: ngal-ɛ asə naa gə tad-ɛ. N-ɔji gə kagə kɔji ne le ɗaa, ngal asə kula mɛdərɛ tɔl-tɔl dɔg lo joo; ngal-ɛ gə tad-ɛ gə ndə̰w̰ lə-a d-asə naa rəb.

¹⁷ N-ɔji ndogo bɔrɔ le ɗaa, ngal asə naa gə kḭ ndo̰ ji gə ɗe gə kəl ji gə gɔl tɔl gə dɔg gə sɔɔ gir-e gə sɔɔ, ne kɔji ne lə dəwje gə anji un ɗa ne kula.

¹⁸ Neje gə d-unda ne ndogo bɔrɔ le to gə ər gə ɓar-ɛ na jasəpə, ɗaa ɓebo to gə darɔ maa gə arə ngadə, asə naa gə ər gə to wə̰rə̰-wə̰rə̰ gə arə ngadə tɔ.

¹⁹ Gɔl ndogo bɔrɔ gə d-ɔsə nangə le, ꞌɗa gə kɔr ərje gə gar-ɛ ɓədə-ɓədə gə gad-e ɓi-ɓi d-ar ndogo pə̰ə̰. Ye gə d-ɔsə nangə dɔngɔr to gə kɔr ər gə ɓar-ɛ jasəpə, ye gə njekum gə joo to gə sapir, ye gə njekum gə munda to gə kalesedowan, ye gə njekum gə sɔɔ to gə emerɔdə,

²⁰ ye gə njekum gə mi to gə sarədonikəsi, ye gə njekum gə misa̰ to gə kɔrenaline, ye gə njekum gə siri to gə kirisolitə, ye gə njekum gə ji nay joo to gə beril, ye gə gə njekum gə ji nay kara to gə topajə, ye gə njekum gə dɔg to gə kirisopərajə, ye gə njekum gə dɔg gir-e kara to gə yasɛ̰tə, ye gə njekum gə dɔg gə gir-e gə joo to gə ametəhisətə.

²¹ Ta kəyje gə dɔg gə gir-e gə joo nee le to gə mərje dɔg gə gir-e gə joo. Ta kəyje kara kara tɔ̰y nee le to gə mər kara baa ja ɗəgədə. Ngaɓa nadə ɓebo le to gə maa gə arə ngadə asə naa gə kɔr ər gə ndo̰y wə̰rə̰-wə̰rə̰ gə to kə̰rə̰rə̰ be.

²² Mə ɓebo gə nee le m-o kəy lə Luba kəne ang, mba Mbayɓe Luba gə njesingamongə je gə ngon badəm ja ꞌto gə kəy gə kəne.

²³ Ɓebo le aw ndoo kar ang nəm, gə nay ɓa kar ndogo kəne ang nəm tɔ. Mba ndogo lə Luba ja ndogo kəne ngodə-ngodə, ngaɓa ngon badəm ja to gə lambe lə-a tɔ.

²⁴ Gəl kujije d-a nja dan ndogo gə lə-a, ngaɓa mbayje gə dɔ nangə gə d-a kula rɔnduba dɔ-ɛ gə.

²⁵ Ta kəyje lə ɓebo le a kudu dan kar-a ang, mba lo-e gə nee le, lo a ndul kəne ang saar.

²⁶ Gəl kujije d-a kula rɔnduba dɔ-ɛ gə ngaɓa d-a ɗɔy-e tɔ.

²⁷ Ne gə mina kara be kara a kandə mə ɓe gə ne wɔr ang nəm, dəw gə nje ɗa nekɔbə gə njepatar gə ɗəgərə kara be kara a kandə kəne ang nəm tɔ, ngaa nje gə ꞌɗa ri-je mə mbede təbə gə lə Ngon badəm ja kara baa.