Apocalypse 20 - Mbede Lə Luba Kone Gə Sigi

ꞌTɔ ꞌSu gə ngaw lar kəm ɓal tɔl dɔg lo kara

¹ Cibi m-o anji kara ḭ dara uwa ngon lakɛrɛ ta buwa wəl gə sṵra̰ godo gə kula lar gə boy ji-a gə.

² N-uwa da kɔb, li gə kede ləw gə to gə ꞌSu gə ꞌSɛ̰ngərɛ̰ le ɗaa, n-tɔ-ɛ kəm ɓal tɔl-tɔl dɔg lo kara.

³ N-ila-a mə buwa wəl gə sṵra̰ godo, ɗaa n-udu t-ɛ badə ngaɓa n-ɔsə bəngə ji kəne mba kar n-ərə gəl kuji dəwje n-ar-je ꞌndəm ang saar mba kar ɓal gə tɔl dɔg lo kara udu ta naa bugum. Go-e gə ɗaa, may kar ꞌtudu-e d-ila-a tar asə dɔ kar njɛ̰ be.

⁴ M-o ngəndəng mbayje, ngaɓa nje gə d-isi dɔ-ɛ gə le d-ar-je ɗəw mba kar gangə ne tar. Cibi m-o kəm nje gə ꞌtuga gɔbə-je gə cina ꞌgangə mba tar naji lə Jeju, gə mba tar lə Luba, ngaɓa nje gə ꞌpolo da kɔr gə njil-e ang, ngaɓa nje gə bəngə ji da, gə njil-e godo ɓida noje gə ji-je gə kara m-oje tɔ. ꞌTəl d-aw kəm baa ngaɓa d-o̰ ɓe gə Kirisi ɓal tɔl-tɔl dɔg lo kara.

⁵ Nje gə kɛm gə d-uy le ꞌtəl d-aw kəm baa ang saar ɓal gə tɔl-tɔl dɔg lo kara le udu ta naa bugum. To gə dɔngɔr ndol lə dəwje gə d-uy.

⁶ Nje gə ꞌga̰ horo dəwje gə d-uy ɓa ꞌndol dɔngɔr nee le, ꞌto gə njenokarəje gə njerɔsangəje. ꞌJejee nee le, yo gə njekum gə joo o̰ ɓe dɔ-je gə ang ngaa: Ngaa d-a to njekapoloje lə Luba je gə Kirisi, ngaɓa d-a ko̰ sə-a ɓe ɓal tɔl-tɔl dɔg lo kara tɔ.

⁷ Logə ɓal gə tɔl-tɔl dɔg lo kara le a kudu ta naa bugum ɗaa, d-a kɔr ꞌSu kəy kula gə lə-a kila-a taar,

⁸ ɗaa n-a kɔdə kaw kərə dəwje gə kil nangə gə sɔɔ gə kar-je ꞌndəəm, Gɔgə gə Magɔgə mba mbo̰-je dɔ naa gə mba kila ne ɗɔ. Kor-je asə naa gə ꞌnangəra̰ gə ta babo gə.

⁹ ꞌTa lo gə dɔ nangə gə nee ya̰-ya̰ ngaɓa d-andə mə ngalang gə lə njerɔsangəje gə ɓebo gə Luba njigi-e tɔ. Ɗaa pər ḭ dara oso dɔ-je gə ro-je.

¹⁰ Ɗaa ꞌSɛ̰ngərɛ̰ gə nje kərə dəwje kar-je ꞌndəəm le, d-ɔs-e d-ila-a dang pər gə o̰ bilim-bilim gə dan sori gə, mbɔr da kɔr gə je gə pajambərə gə gə mbɔr-ɛ. Ɗaa d-a ko ꞌməsərə dan kara gə londul gə, gə ɓal gə ɓal.

Gangə tar gə ɗudu

¹¹ Be ɓa m-o ngəndəng mbay gə boy gə nda, ngaɓa dəw gə isi dɔ-ɛ gə tɔ. Dara je gə nangə d-a̰y no-ɛ gə d-aw əw, toro-je kara dəw o ang.

¹² Be ɓa m-o nje gə d-uy, bubaje gə nganje, d-ar gə ngal-je tar mbiwu no ngəndəng mbay gə ɗaa ꞌcɛ̰ mə mbedeje. Cibi ꞌɗəm ꞌcɛ̰ mə mbede gə ɗangə kara gə to gə mbede təbə, ɗaa ꞌgangə tar dɔ nje gə d-uy gə ɔji buwa kula ɗaje kula ɗa-je, gə go neje gə ꞌɗa mə mbedeje gə le.

¹³ Dəwje gə d-uy mə babo gə le, babo təl gə je ɗe gə je, yo je gə lo gə jabaw ꞌtəl gə yo dəwje gə ɓə lə-je ꞌɗe gə je, ɗaa na-na kara, ꞌgangə tar dɔ-ɛ gə ɔji buwa kula ɗ-ɛje.

¹⁴ Yo je gə lo gə jabaw le, ꞌtəbə-je kərəng d-umje dang pər gə. Dangə pər nee le ɓa to gə yo gə njekum gə joo.

¹⁵ Na-na ɓa ꞌɗa ri-a mə mbede təbə gə ang ɗaa, d-ɔs-e d-ila-a dang pər gə.