Apocalypse 19 - Mbede Lə Luba Kone Gə Sigi

Pidi Mbayɓe

¹ Go-e gə ɗaa, m-o ndu ɓar mbi-m gə boy ta naa gə ndu bula dəwje gə mə dara gə na: Aleluyia! Kaji gə rɔnduba gə singamongə to kar Luba lə-sijee,

² mba tar gangəje lə-a tɔgərɔ ngaɓa dana gadə-gadə nəm tɔ. N-gangə tar dɔ jene kaya gə boy gə nje tuji dɔ nangə gə kaya ɗa lə-a, ngaɓa n-dal ba̰a̰ məsə ngan lokisije lə-a gə um nangə ɗəw gə lə jene kaya le tɔ.

³ Ngaɓa ꞌtəl pa gə njekum gə gɔl joo na: Aleluyia! Ɗaa sa pər gə o̰-ɛ uba ngug-ngug gə ɓal gə ɓal.

⁴ Ngatɔgəje gə dɔg joo gə gir-je gə sɔɔ, gə nekundaje gə sɔɔ d-um məkəji-je nangə, no Luba gə, ye gə isi dɔ ngəndəng mbay gə ɗaa ꞌpa na: Oyo! Aleluyia!

⁵ Be ɓa ndu ḭ ngəndəng mbay gə ɗaa pa na: Ɔsəje gaji Luba lə-sijee, sisəy ngan njekulaje lə-a tɔ̰y, sisəy gə ꞌɓəəl-eje, nganje gə bubaje.

⁶ Ɗaa m-o ndu gə ta naa gə ndu bula dəwje gə dig-dig nəm gə kɔr manje gə bo, gə kɔr nji gə ndangə gə mong-e be, pa na: Aleluyia! Mba Mbayɓe, Luba lə-sijee gə njesingamongə, kila ɓeko̰ gə lə-a gə ɗaga ngaa.

⁷ J-a ɗaje rɔləl, j-a talje ꞌmajagəra ɓo j-ulaje rɔnduba dɔ-ɛ gə, mba ndɔ ta naa lə ngon badəm le asə ngaa ɗaa jene lə-a kara uwa dɔ gɔl rɔ-ɛ kər-kər tɔ.

⁸ Cibi d-un ɗəw d-ar-ɛ gə mba kar n-ula kubu gə ndo̰y mələg-mələg ngaɓa arə ngadə, mba kubu gə ndo̰y mələg-mələg le, to gə kula ɗaje gə gadə-gadə lə njerɔsangəje.

⁹ N-pa n-ar-m na: ꞌƊa! Nokarə to kar nje gə ꞌɓar-je lo muru ta naa gə lə ngon badəm! Cibi ꞌpa n-ar-m na: To gə tarje gə tɔgərɔ gə Luba ja pa.

¹⁰ M-oso nangə no gɔl-ɛ gə mba pol-e, ɗaa n-pa n-ar-m na: Əw rɔ-i mba polo-m! M-to gə njeba kula le-i gə njeba-ɛ lə ngan ko̰-ije gə ꞌpa tar naji lə Jeju. Luba ɓa ꞌpol-e, mba tar naji lə Jeju le ɓa to gə njil kila mbərə.

Dəw gə al kunda gə nda

¹¹ Be ɓa m-o kəm dara cɛ̰, ɗa kunda gə nda ɔsə lo ce. Dəw gə al-ɛ ri-a na Nje to ngon kuji gə Nje ɗa ne gə tɔgərɔ, n-gangə tar ngaɓa n-ɗa ɗɔ gə gadə-gadə tɔ.

¹² Kəm-e to to gə pər gə o̰ lam-lam be. Jɔgə mbay bula to dɔ-ɛ gə, ngaɓa ꞌɗa ri kara rɔ-ɛ gə, gə dəw kara kara gərə ang, ɗaa ꞌne ja baa.

¹³ D-ula-a kubu gə uwa məsə ndor-ndor, ɗaa ri-a na Tar lə Luba.

¹⁴ Njeɗɔje gə dara d-uwa go-e gə kundaje gə nda, gə d-ula-je kubu gə ndo̰y mələg-mələg gə nda ngaɓa arə ngadə tɔ.

¹⁵ Kiya bayi gə t-ɛ adə pəm-pəm ce t-ɛ gə, ye ɓa n-a tuji ne gəl kujije. N-a kul-je gə kagə ngaw lar, n-a kunda dura kodo wungu gə to ɓəl ya̰ lə Luba gə njesingamongə, gə gɔl-ɛ kila.

¹⁶ ꞌƊa ri kara kubu gə lə-a ngaɓa dɔ bingi-e gə na: Mbay lə mbayje ngaɓa Mbayɓe lə mbayɓeje.

¹⁷ Ɗaa m-o anji kara ar taar kəm kar gə. N-uru ꞌkuwi gə ndu-e gə boy wəl n-ar əlje gə d-ḭ bagə midi-midi dara gə taar na: ꞌƊeje, ꞌmbo̰je naa ta ka muru ɓar gə lə Luba,

¹⁸ mba ko̰ yo mbayje, yo njekɔr no njeɗɔje, yo njesingamongəje, yo kundaje gə njekal-jeje, yo dəwje tɔ̰y, ngan kujije gə ɓərəje, nganje gə bubaje.

¹⁹ Ɗaa m-o da kɔr, gə mbayje gə dɔ nangə gə nee gə njeɗɔje lə-je, ꞌmbo̰ dɔ naa gə mba kar d-ila ɗɔ dɔ njekal kunda gə, je gə njeɗɔje lə-a.

²⁰ D-uwa da kɔr le naa gə kara baa gə pajambərə gə gə mbɔr-ɛ baa, gə nje ɗa netɔjije lə-a no gɔl-ɛ gə, kərə ne dəwje ar d-ɔsə ndaji da kɔr rɔ-je gə ngaɓa ar d-um məkəji-je no ndaji-ɛ gə le tɔ. Joo kɛm ja d-umje kəm baa dan pər gə dan sori gə ta yɛg-yɛg.

²¹ Nje gə kɛm ɗaa, ꞌtɔl-je gə kiya bayi gə ce ta njekal kunda gə le, ɗaa əlje tɔ̰y d-o̰ yo-je d-ar mə-je ci.