Apocalypse 18 - Mbede Lə Luba Kone Gə Sigi

¹ Go-e gə ɗaa m-o anji gə ɗangə kara, ḭ dara uru nangə. N-aw gə singamongə ko̰ dɔ ne gə to ɓəəl ya̰ ngaɓa ndogo lə-a ndogo dɔ nangə gə dol-dol tɔ.

² N-uru ꞌkuwi gə ndu-e gə boy wəl na: N-oso ngaa, n-oso ngaa, ꞌne gə Babilon gə boy le; n-təl to gə lo kisi lə ꞌSɛ̰ngərɛ̰je, lə njilje gə kṵra̰y nəm lo kinga naa lə njilje gə mina tɔ̰y ngaɓa to lo kinga naa lə əlje gə mina gə to yɛm, gə daje tɔ̰y gə to yɛm, gə baa gə nangə əng nəm tɔ.

³ Mba gəl kujije tɔ̰y d-ay kodo wungu kaya lə-a; mbayje gə dɔ nangə gə d-uwa sə-a baa kaya, ngaɓa nje laɓə neje gə dɔ nangə ꞌto ne njenekingaje ɗew singamongə nemayje lə-a.

⁴ Ngaɓa m-o ndu gə ɗangə mə dara gə pa na: ꞌCeje mə ɓebo gə nee gə ɗaga, əy dəw mə ɓeje lə-m, na be ang nama, a kumje sə-a naa gə dɔ neɗa gə kṵra̰y gə lə-a, ngaɓa kar-sisəy ꞌkay-je sə-a tujije gə d-uwa dɔ gɔl-ɛ ɔji dɔ-ɛ ang.

⁵ Mba neɗaje gə kṵra̰y lə-a ɔsə dɔ na-na saar ce dara, ɗaa mə Luba ole dɔ neɗaje lə-a gə gə dɔ gɔl-ɛ ang.

⁶ Lar lə-a gə n-uga ne ja ugaje ne dɔ ji-a, ꞌtəlje gə kula ɗ-ɛje le bəngə mar-ɛ gə gɔl joo ar-eje. Mə ngo nekay gə n-kal bodo kodo lə-a kəne le n-ar d-ay le, ꞌkalje bodo kəne, bəngə mar-ɛ gə gɔl joo ar-eje.

⁷ Ɗəw kara baa to gə ləl-e ya̰ kar n-isi dan riɓar gə, gə dan nemayje gə le, be ja tɔ ꞌtəlje gə kula kəm ndoo gə kəm ndoo yo gugu ar-eje. Mba n-əji m-e gə na: M-to mbay jene ɓo m-to gə jene nduba ang nəm, ngaɓa ndɔ kara baa be kara kəm ndoo yo a ɓar ri-m ang nəm tɔ,

⁸ mba gəl ne gə kən le ɓa, ndɔ kara ja baa, tujije gə d-uwa dɔ gɔl-ɛ d-ɔji ne dɔ-ɛ le, a ce dɔ-ɛ gə: yo, kəm ndoo yo, ɓo bo, ngaɓa pər a ko̰-e rug-rug. Mba Mbayɓe Luba gə gangə tar dɔ-ɛ gə le to njesingamongə.

⁹ Ɗaa, logə mbayje gə dɔ nangə gə d-a ko sa pər gə ro ɓebo gə Babilon gə uba ngug-ngug ɗaa, d-a kula man no dɔ-ɛ gə yaw-yaw, ꞌjejee gə to gə nje baa kayaje gə nje baa kuba mayje lə-a.

¹⁰ Nekəmandoo lə-a a ɗa-je ɓəəl ɗaa, d-a kɔr rɔ-je kar ngərəng ngaɓa d-a pa na: Tuji! Tuji! Əy ɓebo gə boy, Babilon, ɓebo gə njesingamongə, ꞌI le ja ngaa, mə kar gə kara ja baa ꞌgangə tar dɔ-i gə nee le!

¹¹ Ɗaa, nje laɓə neje gə dɔ nangə nee ꞌno ngaɓa d-uwa soor lə-a, mba dəw kara kara ndogo gə je neje lə-je ang.

¹² Maa ngaɓa gə lar kasə gə kobəre-kobəre gə ərje gə gad-e ya̰, gə mərje, gə kubu gə ndo̰y mələg-mələg, gə kubu gə kasə njir-njir, gə ye gə kasə wəd-wəd, gə kagə gə ba̰y-e əndə, gə neje gə ꞌɗa gə ngangə daje, gə neje gə ꞌɗa gə kagəje gə gad-e ya̰, gə mbay ngira, gə ngaw lar ngaɓa gə ər kunda kəy gə ɓar-ɛ na marəbərə;

¹³ sinamon gə amomon, gə ba̰y kəndə mambo̰, mirə, njiri, kodo gə ubu, nduji gə ꞌdal, gə waa, gə bɔ mangəje gə ko̰ badəmje, gə kundaje, pusu ɗɔje, ɓərəje gə dəwje gə d-uwa-je.

¹⁴ Nemayje gə mə-i njinga ya̰ mba ɗa ne rɔləl lə darɔ le, ꞌsɛ̰rɛ̰ naa paa d-ḭya̰-i baa ngaa. Neje tɔ̰y gə to gə nemayje, gə neje gə to pə̰ə̰ gə ɔji dɔ-i le tuji pugudu ar-i ngaa. D-a təl kinga-je gugu ang saar.

¹⁵ Njeɗabə neje gə n-unda-je dan may gə ɗəw turu ji-je gə nee le, nekəmandoo lə-a a ɗa-je ɓəəl ɗaa, d-a kar ngərəng. Man no gə kəm ndoo yo a to kar-je

¹⁶ ɗaa d-a pa na: Tuji! Tuji! Ɓebo gə boy, gə d-ula-a kubu gə ndo̰y mɛl-mɛl gə ye gə kasə wəd-wəd, gə ye kasə njir-njir, gə maa gə ndole mələg-mələg gə kɔr ərje gə gadə-je ɓi-ɓi, ngaɓa gə mərje tɔ.

¹⁷ Mə kar gə kara ja baa nebawje bula tuji be wa? Ɗaa njekuwa ngaw toje gə bo-bo, ꞌjeje tɔ̰y gə d-aw mba gə ɗəw gə man, gə mbɔr lo gə njeləl toje gə ꞌjejee tɔ̰y gə nekul rɔ-je ḭ mə babo gə d-ar ngərəng.

¹⁸ Ngaɓa logə d-o sa pər gə ro-e uba ngug-ngug ɗaa, ꞌɗa ne gə ndu-je gə boy wəl na: Ɓebo gə ɗa ɓa d-a kɔji ne ɓebo gə boy le wa?

¹⁹ D-um ꞌbaburu dɔ-je gə ɗaa d-uru ꞌkuwi gə man no gə kəm ndoo yo ꞌpa na: Tuji! Tuji! Ɓebo gə boy gə nekinga lə-a unda njetoje tɔ̰y gə ꞌnja dan may gə, ꞌje gə d-aw gə ko̰ toje dɔ babo gə le ja ngaa, mə kar gə kara ne ja baa neje godo kəne tɔ̰y ne!

²⁰ Dara, ꞌɗa rɔləl dɔ tuji gə lə-a! Ngaɓa sisəy gə njerɔsangəje gə njeka̰ykulaje, gə pajambərəje kara nəm tɔ. Mba Luba gangə tar dɔ-ɛ gə, ar kudu tar lə-si arə ngadə.

²¹ Be ɓa, anji gə njesingamongə kara un kɔr ər kara gə ɔy njing-njing to gə mbal kusu ne be, ɗaa ila mə babo gə ngaɓa pa na: Gə singa gə kara ne ja d-a kɔsə ne Babilon gə to ɓebo gə boy kila-a. D-a təl kinga-a gugu ang saar.

²² Ndu pa lə njekunda kondeje, gə njegusu nekɛmje, gə njekɛm bulaje gə kuulje le, dəw a ko hɛ̰ ɓe lə-i ang ja saar. Nje ɗa gusu kara be kara d-a kinga-a ɓe lə-i ang saar. Ngaɓa kɔr gɔy kara a ɓar ɓə lə-i kuu ang saar.

²³ Pər lambe kara a ndogo wə̰ ɓə lə-i ang saar gə no. Dəw a ko ndu nje jene gə sigi je gə jene lə-a hɛ̰ ɓə lə-i ang saar, mba nje laɓə neje lə-i ꞌto gə dəwje gə bo-bo gə dɔ nangə gə nee, ngaɓa mba kula ɗa mbɛ̰je lə-i ərə gəl kuji dəwje tɔ̰y ar-je ꞌndəm ne.

²⁴ Cibi ngaɓa pajambərəje gə njerɔsangəje gə dəwje tɔ̰y gə ꞌtɔl-je dɔ nangə gə nee le, gəl-e ḭ ɓə lə-i.