Apocalypse 17 - Mbede Lə Luba Kone Gə Sigi

Jene kaya

¹ Be ɓa kara lə anjije gə siri gə d-uwa ngo nekay gə siri ngɛsə gə kede ɗaa pa tar to gə be ar-m na: ꞌƊe, m-a tɔji-i tar gə ꞌgangə dɔ ko̰ kaya jene gə isi dɔ baboje gə.

² ꞌNe le ɓa mbayje gə dɔ nangə gə d-uwa sə-a ba-ɛ ꞌto ne gə kayaje, ɗaa dəwje gə d-isi dɔ nangə gə d-ula ne rɔ-je lo kay kodo gə aw gə je mɔdə kaya gə.

³ Njil ɗe yiil dɔ-m gə ɗaa anji un-m aw sə-m ndag lo gə. Ɗaa m-o jene kara isi dɔ da gə kasə gə uba gaji-ɛ siri ngaɓa dɔ-ɛ dɔg, rije gə ꞌtaji ne Luba ɗusu rɔ-ɛ njḭ.

⁴ Jene nee le d-ula-a kubu gə kasə njir-njir ngaɓa kasə wəd-wəd, ꞌɗ-ɛ mandə gə maa, gə ərje gə gad-e ya̰ ngaɓa gə mərje. N-uwa ngo maa kay ne gə ne kayaje lə-a gə to nekɔbəje gə ne gə mina ɗusu m-e tubu.

⁵ ꞌƊa ri misi kara ɓida no-ɛ gə na: Babilon gə boy ko̰ jene kayaje gə nje ɗa nekɔbəje gə dɔ nangə gə.

⁶ Ɗaa m-o jene gə ay məsə njerɔsangəje gə njetar najije lə Jeju ar ɗ-ɛ to gə kodo be. Logə m-o-e ɗaa lo tar igi-m sɛl.

⁷ Ngaɓa anji pa ar-m na: Mba ɗi ɓa lo tar igi-i sɛl wa? M-a pa tar nemisi lə jene je gə da gə dɔ-ɛ siri gə gaji-ɛ dɔg nee kar-i o.

⁸ Da gə o-e le ga̰, n-ga̰ kede, ngaa n-godo ngaa. N-a kɔsə lo ce mə buwa wəl gə sṵra̰ godo gə mba kaw lo tuji gə. Ɗaa dəwje gə d-isi dɔ nangə nee, gə un kud-e lo kunda dɔ nangə gə ja, gə ꞌɗa ri-je mə mbede kaji gə ang le, lo gə d-a ko da le nama, lo tar a kigi-je sɛl, mba n-ga̰ kede, n-godo magə, ngaa n-a təl ɗe.

⁹ Dɔ kar gə nee le, to mba kar dəw gə negərə lə-a ga̰ nama, may kar kəm karə unja kəm-e dɔ-ɛ gə: dɔ da gə siri le, to gə dɔ ərje gə siri gə jene isi kəne, ngaɓa to gə mbayje gə siri tɔ.

¹⁰ Nje gə mi ꞌgodo ngaa, ye gə kara ga̰ dɔ ɓeko̰ gə ɓi, ye gə kara gə ɗangə n-nay ɓi tɔ, ngaa logə n-a ko̰ ɓe ɗaa, kur-e a kəw ang baa.

¹¹ Ngaɓa da gə ga̰ kede ɓa təl godo magə le, ye ja to gə mbay gə njekum gə ji nay joo. N-to kara lə nje gə siri le, ɗaa ꞌne n-aw gə lo tuji gə lə-a.

¹² Gaji da gə dɔg gə ꞌI o le, to gə mbayje dɔg, gə d-isi dɔ ɓeko̰ gə ang ɓi, ngaa d-inga singa ko̰ dɔ ne mba kar d-o̰ ne ɓe naa gə kara baa gə da le kəm kar kara ja baa.

¹³ Ne kara ja baa ꞌgɔl mba ɗa: kum singamongə lə-je gə tɔgəmbang lə-je naa gə kara baa gə da, mba ɗa ne kula lə-a.

¹⁴ D-a ɗa ɗɔ gə ngon badəm ɗaa, ngon badəm a cɛdə-je ɗɔ, mba n-to Mbayɓe lə mbayɓeje ngaɓa Mbay lə mbayje. Ɗaa nje gə ꞌɓar-je, gə nje gə ꞌmbərə-je ngaɓa gə nje gə ꞌto ngon kuji d-a cɛdə sə-a ɗɔ naa gə kara baa tɔ.

¹⁵ Cibi n-pa n-ar-m na: Man bo gə o gə jene kaya isi dɔ-ɛ gə le, to gə dəw mə ɓeje, gə bula dəwje, gə gəl kuji dəwje, gə ndo̰ tarje.

¹⁶ Ɗaa, gaji da gə dɔg gə o, gə da le, d-a njigi jene kaya le ang gə kɔrɔ, d-a tɔr ne rɔ-ɛ, kḭya̰-a kud-e dum baa. D-a kusa da kas-ɛ ngaɓa d-a ro-e gə pər tulug-tulug.

¹⁷ Mba Luba ula ta-kəji mə-je gə mba kar ꞌɗa ne gə ꞌne n-gɔl gə mba ɗa, ne kara baa gə n-gɔl le ɓa nee: kum singamongə ɓeko̰ lə-je naa gə kara baa, mba ɗa ne kula lə da kɔr saar kar tar lə Luba aw ne lo-e gə yɛrɛrɛ.

¹⁸ Ngaɓa jene gə o-e le, to gə ɓebo gə boy gə o̰ dɔ mbayje gə dɔ nangə gə.