Apocalypse 16 - Mbede Lə Luba Kone Gə Sigi

¹ Ɗaa, m-o ndu dəw bar to gə boy no kɔgə pa ar anjije gə siri le na: Awje, aw mbəlje wungu lə Luba gə to ngo nekay gə gəl siri dɔ nangə nee!

² Anji gə dɔngɔr aw mbəl wungu gə mə ngo nekay lə-a dɔ nangə gə ɗaa, do gə ole pu-pu gə kṵra̰y ngaɓa ole pu-pu oso dɔ dəwje gə ndaji da kɔr to rɔ-je gə, ngaɓa ꞌpolo njil-e.

³ Anji gə njekum gə joo mbəl ngo nekay lə-a mə babo kadə gə, ɗaa babo kadə le təl məsə to gə məsə dəw gə uy be; nekundaje tɔ̰y gə d-aw kəm baa gə to mə babo kadə gə d-uy.

⁴ Ngaɓa anji gə njekum gə munda mbəl ngo nekay lə-a mə baje gə kəm ɗəw manje gə, ar təl məsə.

⁵ Cibi, m-o ndu anji gə man pa na: ꞌTo dəw gə gadə-gadə, ꞋI gə ꞌga̰ ngaɓa ꞌga̰ kede ləw baa, ꞌI, Njerɔsangə, mba to gə be ɓa ꞌgangə ne tar.

⁶ Mba d-um məsə njerɔsangəje gə pajambərəje nangə ɗaa, ꞌI ar-je d-ay məsə, asə kəm ɗa gə je be ja.

⁷ Cibi, m-o ndu ḭ no kɔgə pa na: Oyo, Mbayɓe Luba, Njesingamongə, tarje gə ꞌgangə le, ꞌgangə tɔgərɔ, ngaɓa ꞌgangə gadə-gadə ja.

⁸ Anji gə njekum gə sɔɔ mbəl ngo nekay lə-a kəm kar gə. D-un ɗəw d-ar-ɛ n-ro dəwje gə pər,

⁹ Ɗaa dəwje le, ꞌro-je gə pər gə kundu-e nunga pid-pid, ꞌjejee gə ꞌtaji ri Luba gə nje kuba singa dɔ tujije gə nee le, ɗaa ꞌmbadə turu kəji lə-je kila ne riɓar dɔ-ɛ gə.

¹⁰ Anji gə njekum gə mi mbəl ngo nekay lə-a no ngəndəng mbay gə lə da kɔr, ɗaa londul dəbə dɔ ɓeko̰ lə-a. Ne ur ti ɗa dəwje ar d-usa ngangə-je pəgərə-pəgərə,

¹¹ ngaɓa ꞌtaji Luba gə dara mba ne ur tije gə ɗa-je, gə do gə ole pu-pu gə usa-je, ɗaa ꞌturu kəji lə-je dɔ kula ɗa-je gə ang.

¹² Anji gə njekum gə misa̰ mbəl ngo nekay lə-a mə baa gə ri-a na Əpəratə. Ɗaa man ii ḭya̰ ɗəw tagə baa ar mbayje gə d-ḭ lo ce gə kar gə.

¹³ Cibi, m-o njilje gə kṵra̰y munda gə ꞌta naa gə gɛ̰je be ꞌce ta da kɔb gə, gə ta da kɔr gə ngaɓa gə ta pajambərə gə gə mbɔr-ɛ baa nəm tɔ.

¹⁴ ꞌTo gə njil gə kar njilje gə kṵra̰y gə ɗa netɔjije ngaɓa d-aw gə rɔ mbayje gə rɔ dəwje gə d-isi dɔ nangə nee tɔ̰y, mba mbo̰-je kila ne ɗɔ, dɔ ndɔ gə boy gə to kar Luba gə Njesingamongə.

¹⁵ A o, m-ɗe to gə nje ɓogo be. Nokarə to kar dəw gə isi kəm baa dɔ rɔ-ɛ gə ngaɓa ngom kubuje lə-a, mba nja kud-e dum ang, ngaɓa mba kar d-o lo rɔ kul lə-a ang nəm tɔ!

¹⁶ Njilje le ꞌmbo̰ mbayje lo gə ꞌɓar-ɛ gə ndo̰ tar ebərə na Arəmagedo̰.

¹⁷ Anji gə njekum gə siri mbəl ngo nekay lə-a mə ləl gə. Ndu dəw ḭ ngəndəng mbay gə, mə kəy gə lə Luba ɓar to gə boy wəəl na: Ɓɛlɛ ngaa!

¹⁸ Nji təl pa̰y-pa̰y, ndu dəwje gə ɓar, gə nji gə ndangə bangərang-bangərang, ngaɓa nangə yə gə mong-e ya̰. Ləw ja baa gə dəwje ꞌga̰ dɔ nangə gə nee le, dɔ nangə yə to gə bənəng ang ja ɓi.

¹⁹ ꞌGangə ɓebo gə boy le dana lo munda. Ɓeboje lə dəwje gə ꞌto gə Jiibije ang d-unda nangə mburugu. Ɗaa mə Luba ole dɔ Babilon gə boy, mba kar-ɛ ngo kay kodo wungu lə-a gə ḭ pu-pu.

²⁰ Dɔ ngan goreje d-a̰y tɔ̰y, ngaɓa dɔ ərje kara d-igi nangə yom nəm tɔ.

²¹ Kɔji gə boy ja ḭ dara cɛdə gə kɔrɛ-kɔrɛ gə ɔy asə kilo dɔg joo je əng bənəng toso dɔ dəwje gə, ɗaa dəwje taji Luba mba kɔji gə ila tuji dɔ-je gə, mba tuji gə nee le to ɓəəl ya̰ unda mar-ɛje tɔ̰y.