Apocalypse 15 - Mbede Lə Luba Kone Gə Sigi

Anjije gə siri, gə tujije gə siri

¹ Cibi, m-o netɔji gə ɗangə gə bo ngaɓa to ɓəəl ya̰ mə dara gə; anjije siri d-uwa tujije gə gə bo̰ siri ji-je gə, mba Luba ɓugu wungu lə-a ɗəw gə lə-je.

² Ɗaa m-o ne gə ta naa gə babo gə arə kə̰rə̰rə̰ to gə ər gə ndɔ̰y be, polo naa gə pər, ngaɓa nje gə ꞌcɛdə ɗɔ da kɔr, gə ndaji lə-a ngaɓa gə kɔr ne gə ta ri-a gə, d-ar taar dɔ babo gə, gə arə kə̰rə̰rə̰ to gə ər gə ɓar-ɛ kirisital. D-uwa konde lə Luba ji-je gə.

³ D-ɔsə pa lə Moyiji, ngon njekula lə Luba nəm ɓa d-osə pa lə Ngon badəm na: Mbayɓe Luba gə Njesingamongə, kula ɗa-i bo ngaɓa to ɓəəl ya̰! Mbay gə njeko̰ dɔ dəwje tɔ̰y, ɗəw lə-i to gadə-gadə ngaɓa to tɔgərɔ!

⁴ Na ɓa a kasə ɓəəl-i ang, gə a kila riɓar dɔ ri-i, ꞌI, Mbayɓe gə ang wa? Mba ꞌI ja gə kar-i baa ꞌto njerɔsangə. Gəl kuji dəwje d-a ɗe ɗaa, d-a kum məkəji-je no-i gə, mba neɗa gə gadə-gadə lə-i kila rɔ-ɛ gə ɗaga.

⁵ Go neje gə nee ɗaa, m-o kəy kubu tar naji gə to mə kəy gə lə Luba cɛ̰ t-ɛ mə dara gə.

⁶ Anjije gə siri gə d-uwa tujije gə siri ji-je gə le d-ɔsə lo mə kəy gə lə Luba ꞌce, d-ula kubu gə nda kələw-kələw, gə ndogo pə̰ə̰, ꞌtɔ ɓərə-je gə gagəra gə to gə maa.

⁷ Kara horo nekundaje gə d-aw kəm baa gə sɔɔ ar anjije gə siri ngo nekay maaje siri. Wungu lə Luba gə nje kisi gə ndɔ gə ndɔ ɗusu mə ngoje le tubu.

⁸ Cibi, riɓar gə singamongə lə Luba ɗa ar sa pər ta lo mə kəy gə lə Luba, ɗaa dəw asə kandə kəne ang saar mba kar tujije gə siri gə anjije gə siri d-uwa ji-je gə le d-unda ngangəje kɛ.