Apocalypse 14 - Mbede Lə Luba Kone Gə Sigi

Ngon badəm gə dəwje gə d-uga dɔ-je

¹ Ngaɓa m-a lo ɗaa m-o ngon badəm ar taar dɔ mbal gə Siyo̰, ɗaa nje gə ꞌɗa ri-a gə ri bɔ-ɛje ɓida noje gə d-ar sə-a, ꞌto gə dəwje tɔl-tɔl dɔg lo tɔl gə dɔ-je gə tɔl-tɔl dɔg lo dɔg sɔɔ gə gir-je gə tɔl-tɔl dɔg lo sɔɔ (144 000) ꞌga̰ sə-a

² Ɗaa m-o ndu ḭ dara ta naa gə kɔr babo kadə gə ɓar be nəm, gə kɔr nji gə ndangə gə singa-a bangərang-bangərang, ngaɓa ndu gə m-o le ta naa gə ndu njekunda kondeje gə d-ɔsə pa d-unda ne konde lə-je be.

³ D-ɔsə pa gə sigi, no ngəndəng mbay gə, no nekundaje gə sɔɔ gə d-aw kəm baa, gə no buba ɓeje gə. Ɗaa dəw kara be kara asə mba ndo pa ne le ang, ɗaa ɓɛl nje gə tɔl dɔg lo dɔg gə dɔ-je gə tɔl dɔg lo dɔg gə sɔɔ gə gir-je gə tɔl dɔg lo sɔɔ ne ja baa, ꞌjejee gə d-uga dɔ-je dɔ nangə gə nee.

⁴ To gə nje gə ꞌrɔgə rɔ-je yoro gə ɔji dɔ sangə jeneje ang, ꞌgərə jene ang ɓi. Nje gə kən le d-um mə-je dɔ Jeju gə jəb-jəb dɔ ɗəw nja gə lə-a. Nje gə kən le d-uga dɔ-je horo dəwje gə asə naa gə kandə neje gə dɔngɔr gə ɔji dɔ Luba ngaɓa ɔji dɔ ngon badəm tɔ.

⁵ Ngaɓa ndɔ kara baa be kara tar gə ɗəgərə ce ta-je gə ang nəm tar uwa dɔ-je ang nəm tɔ.

Anjije munda d-ila mbərə gangə tar

⁶ M-o anji gə ɗangə kara ḭ bagə midi-midi mə dara gə taar. N-aw gə Tar gə May gə gə ndɔ gə ndɔ kara mba kila mbər-e kar dəwje tɔ̰y gə d-isi dɔ nangə gə: gəl kuji ang nəm, gəl ka ang nəm, ndo̰ tar ang ngaɓa dəw mə ɓeje ang nəm tɔ.

⁷ N-pa gə ndu-e gə boy na: ꞌƁəəlje Luba ɓo ulaje rɔnduba dɔ-ɛ gə mba kar gangə tar lə-a asə nam ngaa ꞌpoloje nje ɗa dara gə nangə, gə babo gə kəm ɗəw manje.

⁸ Cibi Anji gə ɗangə kara gə njekum gə joo, ore go ye gə kede ɗaa pa na: Ɓɛlɛ ngaa, n-tuji pugudu ngaa, n-tuji pugudu ngaa, ꞌne gə Babilon gə boy, gə njekula kodo wungu lə-a mɛr-mɛr mə gəl kujije gə tɔ̰y kum neje dan kaya gə le.

⁹ Anji gə ɗangə kara gə njekum gə munda ore go-je ɗaa pa gə ndu-e gə boy wəəl na: To gə ɓo dəw gə polo da le gə ndaji-ɛ, a to gə ɓo d-ɔsə ndaji-ɛ ɓida no-ɛ gə ose dabəla ji-a gə nama

¹⁰ ne kara n-a kay kodo wungu lə Luba gə d-a kay mə ngo nekay wungu lə-a gə lal kal bodo. Ɗaa n-a ko ꞌməsərə dan pər gə ngaɓa dan sori gə ta kəm anjije gə njerɔsangəje gə gə ta kəm ngon badəm gə.

¹¹ Kəm ndoo lə-je le sa pər uba ngug-ngug gə ndɔ gə ndɔ, lo kuwa kɔr-je godo dan kara gə londul gə, nje gə ꞌpolo da kɔr gə ndaji-ɛ, na-na gə d-unja ndaji ri-a rɔ-ɛ gə.

¹² To kar gə kar njerɔsangəje gə ꞌngom ndu kunje lə Luba gə ꞌta kagə Jeju d-uwa gədərə.

¹³ Ɗaa m-o ndu ḭ dara pa na: ꞌƊa mbede, nokarə to kar dəwje gə ɓisine d-uy gəl Mbayɓe gə! Njil pa na, oyo, may kar d-uwa kɔr-je dɔ kula rɔ ndubu gə lə-je gə, mba kula ɗa-je ɔr go-je.

Kar kunja ko gə dɔ nangə nee

¹⁴ Cibi m-o kil lə nji gə nda, ɗaa ta naa gə ne gə Ngon lə dəw isi dɔ kil lə nji gə le. Jɔgə mbay gə ꞌɗa gə maa to dɔ-ɛ gə ngaɓa marəm gə t-ɛ adə yəm-yəm to ji-a gə tɔ.

¹⁵ Cibi, anji gə ɗangə kara ɔsə lo ce mə kəy gə lə Luba ɗaa uru ꞌkuwi gə ndu-e gə boy wəəl ar ye gə isi dɔ mum gə le na: Ila marəm lə-i ɓo unja ne ko. Kar kunja ko asə ngaa, mba ko gə dɔ nangə gə nee le tɔgə ngaa.

¹⁶ Ye gə isi dɔ kil lə nji le ila marəm lə-a dɔ nangə gə, ɗa unja ne ko gə dɔ nangə nee tɔ̰y.

¹⁷ Cibi anji gə ɗangə kara ɔsə lo ce mə kəy gə lə Luba gə to dara, gə marəm gə t-ɛ adə yəm-yəm ji-a gə tɔ.

¹⁸ Cibi anji gə ɗangə kara ɔsə lo ce no kɔgə gə. N-aw gə singa gə kar ko̰ dɔ pər, ɗaa n-uru ꞌkuwi gə ndu-e gə boy wəəl n-ar ye gə uwa marəm gə t-ɛ adə yəm-yəm ji-a gə na: Ila marəm lə-i gə t-ɛ adə yəm-yəm ɓo unja ne dɔ ko gə dɔ nangə gə, mba ko le asə kunja ngaa.

¹⁹ Anji ila marəm lə-a dɔ nangə gə, unja ne ko gə dɔ nangə gə, ngaɓa n-kunda ko gə n-unja le n-um mə dam wungu gə lə Luba gə boy.

²⁰ ꞌJḭ ko le ɗa kodo gir ɓe gə ɗaga, ɗaa məsə ce mə dura kodo gə le ula nangə kəngəng-kəngəng, saar uwa jɛm gə ta kundaje gə taar jim, un lo gə tad-ɛ laɓa-laɓa asə ne gə kula mɛdərɛ tɔl munda je əng benəng.