Apocalypse 11 - Mbede Lə Luba Kone Gə Sigi

Nje pa tar najije gə joo

¹ D-ar-m tatɔgə kara gə ta naa gə ngəw kagə kɔji ne, ꞌpa nena: Ḭ taar ɓo ɔji kəy lə Luba, ngaɓa no kɔgə, gə dəwje gə ꞌpolo ne kəne.

² Ngaa tabidi kəy lə Luba gə ɗaga le ḭya̰ ar to lo kara ɓo ila ne kɔji ngal ne kəne ɔji ne ang, mba d-ula mə ji dəwje gə ꞌgərə Luba ang gəl kuji dəwje gə, mba kar ɓebo gə to gə losang-ɛ le, d-a lag-e gə gɔl-je nangə lag-lag kəm nay dɔg sɔɔ gə gir-e gə joo

³ ɗaa m-pa m-ar njetar najije lə-m gə joo, mba kar d-ila mbərə kəm ndɔ tɔl-tɔl dɔg lo kara gə dɔ-ɛ gə tɔl-tɔl joo gə gir-e gə dɔg misa̰ gə d-ula kubu kuwa ndoo.

⁴ Njetar najije gə joo nee le, ꞌto gə kagə olibiyeje gə joo gə lo kunda lambeje gə joo gə d-ar no Mbayɓe gə dɔ nangə gə nee.

⁵ To gə ɓo dəw gə njigi mba ɗa gə je məyɛr nama, pər ce ta-je gə ɗaa ro njeba̰a̰je lə-je rug-rug. Oyo, to gə ɓo dəw gə njigi mba ɗa-je məyɛr nama, may kar yo gə to gə be ja tɔl-ɛ.

⁶ D-aw gə singamongə mba kudu kəm dara, kɔgə ne nji, mba kar dɔ ndɔje gə pajambərəje ꞌpa ne tar gə ri Luba le, man nji oso nangə cɛ̰ng be ang. D-aw gə singamongə mba təl ne man gə məsə ngaɓa gə mba kar tujije bula oso dɔ nangə gə to gə mə-je ja njigi.

⁷ Ngaɓa lo gə d-a kunda ngangə tar naji lə-je ɗaa, da gə ɔsə lo mə buwa wəl gə ce le, a ɗa gə je ɗɔ, a cɛɗə kinga-je ɗaa tɔl-je.

⁸ Nin-je a to ɗəw boo mə ɓebo gə boy gə d-unda ri-a gə ne kɔji mar-ɛ ɗəw njil gə na Sɔdom gə Ejipətə, lo-e gə ꞌɓərə Mbayɓe kagə dəsə gə kəne.

⁹ D-a kḭ horo dəw mə ɓeje gə, gə gəl kaje, gə ndo̰ tarje gə gəl kujije mba ɗe ko nin-je kəm ndɔ munda gə gɛ̰, lal kar n-ḭya̰ ɗəw n-ar ꞌdubu-je.

¹⁰ Dəwje gə dɔ nangə gə nee ꞌɗa rɔləl ɔji dɔ-je, d-a ɗa ndam gə d-a kula gə nekura kar naa yo gə nee, mba pajambərəje gə joo le, d-ula kəm nje gə dɔ nangə gə nee ndoo ya̰.

¹¹ Go ndɔ gə munda gə gɛ̰-ɛ le ɗaa, njil gə kar kaw kəm baa kara ḭ rɔ Luba gə ɗe uru mə-je gə ɗaa d-ḭ d-ar taar dɔ gɔl-je gə. Be ɓa ɓəəl gə boy ja unda nje gə d-o-je badə gangə-je.

¹² Pajambərəje gə joo d-o ndu gə boy ḭ mə dara gə pa ar-je na: Awje gə taar nee. Ɗaa d-uba nangə d-ḭ d-aw dara mə kil gə lə nji ta kəm njeba̰a̰je gə lə-je nda̰-nda̰.

¹³ Dɔ kar-ɛ gə əng ja, dɔ nangə yə to gə boy ɗaa ɓebo gə ꞌkay dana lo dɔg le, dəb-e gə be kara unda nangə mburugu ɗaa dəwje tɔl-tɔl dɔg lo siri d-uy dan nangə gə yə gə nee le. Nje gə ꞌce ta yo gə ɗaa ɓəəl unda-je badə gangə-je, ar-je d-ula ne rɔnduba dɔ Luba gə nje kisi dara.

¹⁴ Tuji gə njekum gə joo nday ngaa. A o, tuji gə njekum gə munda aw ɗe ɓisine.

Kuul gə njekum gə siri

¹⁵ Anji gə njekum gə siri to Kuul lə-a: ndu dəwje ɓar to gə boy mə dara na: ɓeko̰ gə dɔ nangə gə nee le to kar Mbayɓe lə-si ngaɓa to kar Kirisi lə-a tɔ n-a ko̰ ɓe gə ndɔ gə ndɔ.

¹⁶ Ɗaa buba ɓeje gə dɔg joo gə gir-je gə sɔɔ gə d-isi dɔ ngəndəng gə lə-je no Luba gə le, d-oso nangə ꞌdəbə kəm-je nangə ɗa ꞌpolo Luba

¹⁷ na: J-a ɗa-i oyo, Mbayɓe Luba gə njesingamongə gə dum dɔ lo, gə ga̰, gə ga̰ kede ləw baa, mba ꞌtɔji singamongə lə-i gə bo ya̰, ngaɓa o̰ ɓe nəm tɔ.

¹⁸ Ɗaa, wungu ɗa dəwje gə ꞌgərə Luba ang gəl kuji dəwje gə, ngaa to gə wungu lə-i ɓa ɗe. To dɔ kar gangə tar dɔ nje gə d-uy gə, dɔ kar kuga ne dɔ ji lə ɓərə kulaje gə to gə pajambərəje gə njerɔsangəje gə nje ɓəəl ri-ije, nganje gə naa gə dəwje gə tɔgə, dɔ kar tuji gə ɔji dɔ nje gə ꞌtuji dɔ nangə nee.

¹⁹ Ɗaa ta kəy gə lə Luba gə mə dara gə cɛ̰, ngaɓa sandubu kone ce to mə kəy gə lə Luba; ɗaa nji təl pa̰y-pa̰y ngaɓa ndu dəwje ɓar gə nji ndangə bangərang-bangərang, nangə kara yə, ngaɓa kɔji nə̰y nangə hadada-hadada tɔ.