Apocalypse 10 - Mbede Lə Luba Kone Gə Sigi

Ngon mbede gə ꞌcɛ̰ m-e d-ila tagə

¹ Ɗaa m-o anji gə ɗangə kara gə njesingamongə ḭ dara uru nangə. Kil lə nji dole dɔ-ɛ ula-a gə kubu, ngaw bura nji to dɔ-ɛ gə, ngaɓa ta kəm-e ta naa gə kar, ɗaa gɔl-ɛ ta naa gə dubu gə ta pər yɛg-yɛg be.

² N-uwa ngon mbede gə ꞌcɛ̰ m-e d-ila tagə ji-a gə. N-ila gɔl-ɛ gə kɔl dɔ babo gə, gə ye gə gəl dɔ nangə gə,

³ ɗaa n-pa tar gə ndu-e gə boy to gə ꞌnam gə uwa mii be. Lo gə anji pa tar gə ndu-e gə boy ɗaa ndu nji gə ndangə gɔl siri ɓar.

⁴ Logə nji gə ndangə gɔl siri pa tar le, m-aw gə mba ɗa tar-ɛ mə mbede gə ɗaa, m-tuga mbi-m m-o ndu ḭ mə dara gə taar pa ar-m na: ꞌNgom tar gə nji gə ndangə gɔl siri pa nee le mə-i gə ɓo ꞌɗa mbede gə ang.

⁵ Be ɓa anji gə m-o-e ar taar dɔ babo gə, gə dɔ nangə gə le un ji kɔl-ɛ gə taar mə dara gə,

⁶ ɗaa uwa naji gə ri dəw gə isi kəm baa gə ndɔ gə ndɔ, ye gə ɗa dara gə neje tɔ̰y gə to kəne, dɔ nangə gə neje tɔ̰y gə to kəne, babo gə neje tɔ̰y gə to kəne: d-a kila ndɔ gə ɗangə ang ngaa.

⁷ Ngaa mə ndɔje gə anji gə njekum gə siri a to kuul ɗaa, ye əng ɓa nemisi lə Luba a kaw lo-e gə yɛrɛrɛ, gə go Tar gə May gə n-pa n-ar njekulaje lə-a gə ꞌto gə pajambərəje.

⁸ Ɗaa ndu gə ḭ dara gə m-o le pa to gə ɗangə ja cibi ar-m na: Aw ta ngon mbede gə ꞌcɛ̰ m-e d-ila tagə gə to ji anji gə ar taar dɔ babo gə, gə dɔ nangə gə.

⁹ M-ɔdə gə kede rɔ anji gə ɗaa m-dəj-e mba kar-ɛ ar-m ngon mbede le. N-pa n-ar-m na: ꞌTa ɓo usa. A kar məkadə ɗusu mə-i tubu, ngaa mə kil-i gə ɗaa, a ri mbɛl-mbɛl to gə ubu təji be.

¹⁰ M-ta ngon mbede nee le ji anji gə ɗaa m-usa. Ri mə kil-m gə mbɛl-mbɛl to gə ubu təji, ngaa lo gə m-uru kəy ɗaa, adə mə-m mbag-mbag.

¹¹ Ɗaa ꞌpa d-ar-m na: May kar-i ila mbərə to gə ɗangə ja cibi ɔji dɔ dəw mə ɓeje, gə gəl kuji dəwje, gə ndo̰ tarje, gə mbayje bula.