Apocalypse 1 - Mbede Lə Luba Kone Gə Sigi

¹ Ne gə to lo kiya gə, gə a ɗe ɓisine baa, gə Luba ar Jeju Kirisi kila dɔ-ɛ mba tɔji ngan njekulaje lə-a. Ɗaa n-ula anji lə-a n-ar ɗe ɔr gəl-e ar ngon njekula lə-a Ja̰ kar-ɛ gərə,

² gə pa tar naj-ɛ to gə ne tɔ̰y gə n-o le to tar lə Luba ngaɓa to tar naji lə Kirisi Jeju tɔ.

³ Nokarə to kar dəw gə tura mbede nee, ngaɓa rɔləl to kar nje gə ꞌtuga mbi-je d-o ne tarje gə to lokiya gə gə ꞌpa mə mbede gə nee, gə d-ila ngon kuji dɔ neje tɔ̰y gə d-uja kəne nee, mba dɔ kar gə Luba a kɔji kar neje nee a ɗe le nay njɛ̰ baa ngaa.

Ko naa

⁴ ꞌMa gə Ja̰, m-ɗa mbede nee m-ar mbo̰ naa lə njetakagəje gə siri gə dɔ nangə gə Aji: May kar-si ingaje mənuji gə ɗɛgɛgɛ gə ḭ mə ji dəw gə ga̰, gə dəw gə ga̰ kede ləw baa, gə a ɗe ngaɓa gə rɔ njilje gə siri gə d-ar no ngəndəng mbay gə lə-a,

⁵ gə rɔ Jeju Kirisi gə nje pa tar naji lə Luba gə gədə, ꞌne n-to ngon dəər, gə dəw gə dɔngɔr gə ndol horo nje gə d-uy gə, gə dəw dɔ mbayje tɔ̰y gə dɔ nangə nee! ꞌNe gə n-njigi sijee gə ꞌne gə mbɔr dɔ məs-e ɓa n-ɔr ne sijee dan neɗa gə kṵra̰y gə,

⁶ ngaɓa, n-təl si gə dəwje gə gəl ɓeko̰ gə lə-a, gə njekapoloje lə bɔb-ɛje Luba le, may kar riɓar gə singa ko̰ dɔ ne to k-ɛ saar-saar gə no! Oyo!

⁷ Oje Jeju ar dɔ kil gə lə nji gə tar aw ɗe. Dəwje tɔ̰y d-a ko-e, nje gə d-ɔsə mbo kar-ɛ gə ninga ꞌmbudu ja kara d-a ko-e gə kəm-je, ngaɓa gəl kuji dəwje tɔ̰y gə dɔ nangə nee d-a no rɔ-je mba tar lə-a. Oyo!

⁸ Mbayɓe Luba pa na: M-to Aləpa gə Omega, lo kuma kudu ne gə lo tɔl ngangə ne, dəw gə nje ga̰, gə ga̰ kede ləw baa, dəw gə a ɗe, njesingamongə gə dum dɔ lo.

Ja̰ o Jeju gə d-ula rɔnduba dɔ-ɛ gə

⁹ ꞌMa Ja̰, ngon ko̰-si gə ɗəw takagə Kirisi gə, gə nje baa neməko̰ lə-si, ngaɓa nje baa ɓe lə-si gə mə ɓeko̰ gə lə Luba, ɓa gə njeba kuwa rɔ gədərə lə-si mba Kirisi gə d-um ubu dɔ-ɛ gə nəm. D-ila-m dɔ ngon gore gə gə ꞌɓar-ɛ Patəmos, mba mbərə tar lə Luba, ngaɓa gə mba tar naji lə Jeju tɔ.

¹⁰ Dɔ ndɔ gə lə Mbayɓe ɗaa, Njil Luba ɗe yiil isi dɔ-m gə, ɗaa m-o ndu dəw ɓar go-m gə gugu ɓolong to gə kuul be,

¹¹ pa na: Ne gə o gə kəm-i nee le, ꞌɗa mə mbede gə kara, ɗaa ula ne ar mbo̰ naa lə njetakagəje gə siri gə to mə ɓeboje gə Epɛs, gə Isimirənə, gə Pɛrəgam, gə Tiyatir, Sarədə gə Piladɛləpi, ngaɓa gə Lawdise.

¹² M-kəl go-m gə mba ko dəw gə pa sə-m tar le. Kəl gə m-kəl go-m ɗaa, m-o dɔ ne kunda lambeje gə ꞌɗa gə maa ja siri,

¹³ ɗaa dəw kara gə ta naa gə Ngon lə dəw ar dana horo lo kunda lambeje gə. N-ula kubu gə ngal yududu ngaɓa n-uwa kar-ɛ gə gagəra gə ɗa gə maa.

¹⁴ Dɔ-ɛ gə bḭ dɔ-ɛ nda to gə bḭ badəm nda ne be, ngaɓa to gə kɔji tɔ. Kəm-e unji pər bilim-bilim to to gə pər be.

¹⁵ Gɔl-ɛ ta naa gə mbay ngira gə d-ula bundang gə be, ngaɓa ndu-e ta naa gə kɔr babo kadə tɔ;

¹⁶ n-uwa ndɛ̰ndərɛ̰ndɛ̰je siri ji-a gə kɔl gə, ngaɓa kiya bay gə t-ɛ adə pəm-pəm ɓe joo ce kil-e gə, cibi ta kəm-e ndogo to gə kar gə ila nangə ladə-ladə be.

¹⁷ Lo gə m-o-e ɗaa, m-oso nangə no gɔl-ɛ gə to gə dəw gə uy be, ɗaa n-ila ji kɔl-ɛ dɔ-m gə ngaɓa n-pa na: ꞌƁəəl ang, M-to dəw gə dɔngɔr gə dəw gə njekudu bo̰,

¹⁸ gə nje kisi kəm baa. M-uy ja, ɗaa oje m-isi kəm baa gə no ngaɓa m-uwa lakɛrɛ kar yo gə kar lo gə jabaw ji-m gə.

¹⁹ ꞌƊa ne gə o gə kəm-i nee le mə mbede gə, ne gə to dɔ kar gə nee, gə ne gə a ɗe kore go-e.

²⁰ Kar nemisi gə ɔji dɔ ndɛ̰ndərɛ̰ndɛ̰je gə siri gə oje mə ji-m gə dɔ kɔl gə dɔ ne kunda lambeje gə siri gə ꞌɗa gə maa le: Ndɛ̰ndərɛ̰ndɛ̰je gə siri to anjije lə mbo̰ naa lə njetakagəje gə siri ngaɓa lo kunda nendogoje gə siri to gə mbo̰ naa lə njetakagəje gə siri tɔ.