3 Jean 1 - Mbede Lə Luba Kone Gə Sigi

Gayus to njekila kuji

¹ ꞌMa ngatɔgə, m-ɗa mbede nee m-ar ngon gə m-njig-e ya̰, Gayus gə m-njig-e mə tar gə tɔgərɔ gə.

² Ngon-m gə m-njigi-i ya̰, m-dəji kar ꞌce gə mbi kəm-i gə kede-kede, ngaɓa kar rɔ-i kara to gə maj-ɛ to gə kəm lə-i be.

³ Rɔ-m ləl-m ya̰ mba logə ngan ko̰-mje d-ḭ rɔ-i ꞌɗe ɗaa ꞌpa tar naji tar gə tɔgərɔ gə to mə-i gə, gə ɗəw pa nja lə-i mə tar gə tɔgərɔ gə.

⁴ Rɔləl lə-m gə to bəl ya̰ le, to ko gə m-o tar-ɛ na ngan-m gə gɔgɔ nja mə tar gə tɔgərɔ gə.

⁵ ꞋI gə m-njigi-i ya̰ le, ꞌto ngon kuji gə ngan ko̰-sijee gə maj-ɛ ɗəw kara baa gə njembaaje.

⁶ ꞌPa tar naji njigi lə-i no Mbo̰ naa lə njetakagəje. May kar ꞌgɔl ne kaw mbaa lə-je gə ɗəw gə Luba njigi,

⁷ mba d-aw nja mba gə ri (Kirisi), ɗaa ꞌta ne ji nje gə ꞌmbadə ta kagə gə ang.

⁸ Ar-si j-uwa dəwje gə be gə rɔ-si gə mba kar j-a toje nje baa kulaje gə ɔji dɔ tar gə tɔgərɔ.

Tar gə ɔji dɔ Diyotərɛp je gə Demetəriyus

⁹ M-ɗa mbede m-ar Mbo̰ naa lə njetakagəje, ngaa Diyotərɛp gə ɗa rɔ-ɛ gə ngaw ta si le, mbadə mba kuwa sijee mbaa.

¹⁰ Gəl-e gə nee ɓa, to gə ɓo, m-ce horo-si gə nama, m-a təl pa tar kula ɗ-ɛje, gə tarje gə kṵra̰y gə n-pa n-tuji ne ri-si gə lo-lo, ye gə kən ja kara as-ɛ ang ja dɔro ɓi ɗaa, n-mbadə mba kuwa ngan ko̰ naaje mba, ngaɓa nje gə ꞌnjigi mba ɗa kul-ɛ kara n-ɔgə je nəm, n-tɔɓə-je lo Mbo̰ naa lə njetakagəje gə nəm tɔ.

¹¹ Ngon ko̰-m gə m-njigi-i ya̰, may kar ꞌndaji ne gə kṵra̰y ang, ne ꞌndaji ne gə may. Nje ɗa may le to nje kar Luba, ngaa nje ɗa ne gə kṵra̰y le o Luba ang.

¹² Dəwje tɔy ja ngaɓa tar gə tɔgərɔ gə dɔ-ɛ ja kara pa tar naji lə Demetəriyus; sijee kara ja pa tar naji lə-a nəm tɔ, ngaɓa ꞌi ja kara ꞌgərə to gə tar naji lə-si to ne gə tɔgərɔ.

¹³ Neje ya̰ ja to mba kar m-pa gə m-ar-i, ngaa m-njigi ɗa mə mbede nee gə man ne gə ndul ang.

¹⁴ M-unda mə-m mba ko-i mə ndɔje gə aw ɗe gə əng, ɗaa j-a to̰ tam ya̰ ja ɓi.

¹⁵ May kar ɗɛgɛgɛ nay sə-i. Njekuraje uwa ji. O njekuraje lə-si gə ri-je kara-kara.