2 Timoce 4 - Mbede Lə Luba Kone Gə Sigi

¹ M-ndəji kəm Luba gə kəm Kirisi Jeju gə a gangə tar dɔ nje gə d-aw kəm baa gə nje gə d-uy gə, gə ri ɗe lə-a nəm gə ri ko̰ ɓe lə-a nəm tɔ.

² Dɔ ndɔ gə may ose may ang kara, ꞌpa tar lə Luba dɔ-i gə kede, ḭ gə je, ꞌndangə-je ɓo ꞌndəji-je gə kore ur, ngaɓa ꞌtɔji-je ne.

³ Mba dɔ kar a ɗe gə dəwje d-a njigi ko tar kaji gə tɔgərɔ ang ngaɓa d-a kuwa gədərə ang ngaa gə go ɓo lə-je ja d-a mbo̰ ne njenetɔjije gə a pa tar kərəje gə ləl mbi-je gə,

⁴ ngaɓa d-a kudu mbi-je jigi dɔ tar gə tɔgərɔ gə ɗaa tarje gə baa ɓa d-a tuga mbi-je gə kəne.

⁵ Ngaa ꞌi le, unda kəm karə dɔ rɔ-i gə, uwa gədərə dan ꞌməsərə gə, ɓo ɗa kula lə njekila mbərə Tar gə May gə Luba um ji-i gə le gə maj-ɛ.

Pɔl əji dɔ kuy gə lə-a ɗaa ula ɓar Timoce

⁶ Mba ꞌma le d-un-m to to gə gə nay nepolo nam ngaa ɗaa ndɔ kuy lə-m nay dəb baa ngaa.

⁷ M-ɗɔ ɗɔ gə may, m-ce ɗudu ngɔdə gə lə-m, m-ngom takagə.

⁸ Un kud-e ɓisine ja Luba uwa dɔ gɔl jɔgə neɗa gə gadə-gadə, Mbayɓe, nje gangə tar gə gadə-gadə a kar-m dɔ ndɔ təl gə lə-a. ꞌMa gə kar-m baa n-a kar-m ang ngaa dəwje tɔ̰y gə d-aw ngina ndɔ ɗe lə-a kara n-a kar-je tɔ.

⁹ Ḭ ja̰y ꞌɗe gə tɔg-e inga-m,

¹⁰ mba Demas mbadə-m mba nemayje gə dɔ nangə nee, ɗaa ɔdə aw gə mə ɓe gə Tesaloniki; Keresa̰s aw dɔ nangə gə Galasi gə, ngaɓa Titə aw mə ɓe gə Daləmati.

¹¹ Ɗaa Lugu ja gə kar-ɛ baa ɓa nay sə-m nee. Ndɔ gə a kaw ɗe nama ar Marəke ɗe sə-i naa gə mba n-to ngon njekula gə may.

¹² M-ula Tisikə mə ɓe gə Epɛs gə.

¹³ A kaw ɗe nama ꞌɗe gə kubu kul lə-m gə m-iya̰ mə ɓe gə Torowas, kəy le Karpus le dɔ-i gə, ngaɓa odo mbedeje ꞌɗe ne, mbede gə d-unja mə ndaar gə le ja ɓa, ar mə-i uy ang.

Ɗudu tar ndəji gə ndu tɔr

¹⁴ Njekɔr gə ri-a na Alɛgəjandərə le ɗa-m kṵra̰y ya̰. Ngaa Mbayɓe a kuga-a gə go kula ɗ-ɛ.

¹⁵ ꞋI kara a rɔ-i rɔ-ɛ gə ka, mba n-njigi tar gə j-a tɔji dəwje le ang.

¹⁶ Dɔngɔr tar gə m-ma̰y dɔ rɔ-m gə no ngɔ gangə tar gə le, dəw kara kara ila gəl-m gə ang, dəwje tɔ̰y ja ꞌmbadə-m. Ɗaa may kar tar-ɛ uwa dɔ-je ang!

¹⁷ Ngaa Mbayɓe ja to dər gəl-m ngaɓa ar-m singa m-pa ne tar lə-a m-ar gəl kuji dəwje gə ꞌgərə Luba ang d-o mba kar aw ne lo-e gə. Mbɔr dɔ singamongə lə Luba ɓa m-ce ne ta tobḭ gə.

¹⁸ M-gərə to gə Mbayɓe a kɔrə-m dan neɗaje gə kṵra̰y gə tɔ̰y ɗaa a kaji-m mba kar-m m-andə mə ɓeko̰ gə lə-a gə dara. May kila riɓar dɔ-ɛ gə gə ɓal-ɓal ja! Oyo!

¹⁹ O Pirisika je gə Akilas, ngaɓa mə kəy lə Onejipɔr ar-m.

²⁰ Erasətə isi mə ɓe gə Kɔrɛnt gə, ɗaa Toropim ɓa rɔ-ɛ to-e ar m-ḭya̰ mə ɓe gə Mile.

²¹ Ɔsə rɔ-i rad mba ɗe nam ɓa kar nay kul ce. Ebulus, Pudɛns, Linus, Kolodiya gə ngan ko̰-eje tɔ̰y ja d-ula-m na m-o-i m-ar-je.

²² May kar Mbayɓe nay gə njil-i! May kar mənuji nay dɔ-si gə tɔ̰y!