2 Timoce 3 - Mbede Lə Luba Kone Gə Sigi

¹ May kar-i gərə gə maj-ɛ to gə, dɔ ndɔje gə gugu nama lo a kədərə ya̰.

² Mba dəwje d-a njigi darɔ-je ɓa ya̰, ngaɓa d-a njigi lar ya̰, d-a to gə nje kɔsə rɔ-jeje, njekunda kar-jeje, njetaji Lubaje, d-a mbadə koso kul no njekuji-sijee gə, d-a kar oyo ang, d-a ɓəəl ne lə Luba ang,

³ d-a to njeməngo̰yje, d-a to nje kunda tarje, d-a to nje pa gə ngan marəje-je, d-a to nje gə kəm karə lal-je, d-a kaw gə kəji lə daje, d-a to njeba̰a̰je lə ne gə may,

⁴ d-a to nje ce gəl ngan marəje-je, d-a to nje wunguje, ɗaa kunda kar a tɔ kəm-je sḭ nəm ɓa d-a njigi rɔləl gə darɔ gə ɓa ya̰ kunda njigi Luba;

⁵ d-a tɔji ndaji kila kuji dɔ ne gə lə Luba kəm dəwje gə ɗaga baa, ngaa mə-je gə ɗaa ꞌmbadə singamong-e. Kəm kar-i mbɔbə dəwje gə be ang.

⁶ Dəwje gə kɛm horo-je gə d-aw gə ta kəy kəy d-aw d-ərə jeneje gə takagə lə-je ngang ang, gə mal neɗaje gə kṵra̰y dang-dang to mə-je gə;

⁷ jeneje nee le ꞌndo ne gə ndɔ-ndɔ ja ngaa ndɔ kara kara d-asə gərə ne gə tɔgərɔ ang.

⁸ To to gə Janɛs je gə Jambɛrɛs d-ila ne karəw gə Moyiji dɔ ndɔ gə kede le ja tɔ a, dəwje gə əng le ꞌɗa to gə be gə tar gə tɔgərɔ tɔ, mba to dəwje gə kəji lə-je to gə maj-ɛ ang ngaɓa takagə lə-je kara to gə maj-ɛ ang tɔ.

⁹ Ngaa d-a kaw-je ne gə kede ang mba kula mbə lə-je a kila rɔ-ɛ gə ɗaga kəm dəwje gə to to gə kar Janɛs je gə Jambɛrɛs be ɓi.

Pɔl ndəji Timoce

¹⁰ Be ɓa ꞌi le, ore kəm-i ndəng o ne pa nendo gə m-ndo dəwje, o pa nja-m, ꞌgərə gəl kula gə m-gɔl, ꞌgərə go takagə lə-m, gə kore ur ndəng lə-m, gə njigi gə m-njigi dəwje, gə kuwa gə m-uwa gədərə,

¹¹ kəm-m gə d-ula ndoo, gə mɛr gə m-o kara o gə kəm-i nəm tɔ. Ne ur ti gə ɗa-m mə ɓe gə Antiyos, gə mə ɓe gə Ikoniyom, gə mə ɓe gə Lisətərə le o ja. D-ula kəm ndoo ya̰ ja ngaa m-uwa gədərə. Ngaɓa Mbayɓe ḭya̰-m kəne ang.

¹² Be ɓa dəwje tɔ̰y gə njigi kila kuji dɔ ne gə lə Luba gə mba kaw ne kəm baa gə Kirisi Jeju le d-a kula kəm-je ndoo.

¹³ Ngaa njeməngo̰yje gə njekunja liba kəm-je gə je le, ꞌSu a kərə-je ɗaa neɗaje gə kṵra̰y a kɔsə dɔ mar-ɛ gə kede-kede ngaɓa d-a kərə ne nje gə kɛm gə d-a kərə ne darɔ-je nəm tɔ.

¹⁴ Be ɓa ꞌi le, ula rɔ-i mbiriri dan ne gə ꞌndo gə unja-i ngadə, ngaɓa ꞌgərə dəw gə nje ndo-i le gə maj-ɛ tɔ.

¹⁵ Gə kasə-i baa ja ꞌgərə Tar lə Luba, gə a kasə kar-i kəm karə kar ꞌta ne kagə Kirisi Jeju mba kinga ne kaji.

¹⁶ Tarje tɔ̰y gə to mə mbede gə nee le ḭ ta Luba gə ja, nəm ɓa to may mba tɔji, gə mba bɛ̰ ne taje, gə mba siri-je ne ngaɓa gə mba ndo-je mba ɗa ne ne gə gadə-gadə,

¹⁷ be ɓa mba kar dəw lə Luba a to ne dəw gə ꞌgɔl-ɛ mba ɗa ne kula gə may tɔ̰y.