2 Timoce 2 - Mbede Lə Luba Kone Gə Sigi

¹ Be ɓa ꞋI gə to ngon-m le, mənuji lə Kirisi Jeju to gəl kuba singa lə-i.

² Ngaɓa ne gə o ta-m gə nje tar naj-ɛje bula le, um mə ji dəwje gə gadə-gadə gə, d-a kasə mba tɔji nje gə kɛm tɔ.

³ O sə-m ko̰ ne naa gə to gə njeɗɔ lə Kirisi Jeju gə may.

⁴ Dəw gə un rɔ-ɛ gə njeɗɔ le, ɓo njigi may ta kəm njeko̰ dɔ-ɛ gə nama a jɔgə rɔ-ɛ mba neje gə ɗangə ang.

⁵ Ɗəw kara baa to gə njeka̰y ngɔdə gə a̰y ila ne kɔji dɔ nduje gə ɓa a kinga ne dɔ ji lə-a.

⁶ Njendɔ gə ɗa kula ya̰ le, a kinga kandə ko gə kəne dɔngɔr.

⁷ ꞌTuga mbi-i gə maj-ɛ o ne tar gə m-pa, mba Mbayɓe a kar-i kəji negərə dan ne gə tɔ̰y.

⁸ Ole mə-i dɔ Jeju Kirisi gə, gə ndol horo nje gə d-uy gə, ḭ gəl kuji gə lə Dabidi, gə go Tar gə May gə m-ila mbər-e.

⁹ Mba tar-ɛ ja m-o ne ko̰ saar, tɔ-m ne kula lar to to gə m-to dəw gə ɗa məyɛr be. Ngaa ꞌtɔ Tar lə Luba gə kula lar ang baa.

¹⁰ Gəl-e gə ne ɓa m-uwa ne gədərə dan ne gə tɔ̰y mba kar nje gə Luba mbərə-je le d-inga ne kaji gə ḭ rɔ Kirisi Jeju gə, gə riɓar gə a to gə ndɔ gə ndɔ.

¹¹ Tar gə tɔgərɔ gə kəm ta ne kagə ɓa nee: To gə ɓo j-uyje gə Jeju Kirisi nama J-a kisije sə-a kəm baa tɔ

¹² To gə ɓo j-uwaje gədərə nama J-a ko̰je sə-a ɓe naa gə tɔ; To gə ɓo j-a mbad-eje nama N-a mbadə si tɔ;

¹³ To gə ɓo j-a toje dəwje gə j-ar njang ang kara Ne n-ar njang ja jaga, Mba ꞌne n-asə tula rɔ-ɛ naa gə ang.

Tar gə ɔji dɔ dəwje gə d-uba Tar gə May d-ḭya̰

¹⁴ Tar gə a kole mə dəwje kəne ɓa to nee: ꞌPa ar-je no gɔl Luba gə mba kar d-əw rɔ-je tar ma̰y gə asə ɗa ne kara ang. Mba tar ma̰y gə baa le tuji dəwje gə njeko-eje gə tuji.

¹⁵ Ɔsə rɔ-i ɓad gə dəw gə Luba n-ɛ nam, ꞌto dəw gə ɗa kula tɔji ne tar gə tɔgərɔ gə dɔ gɔl-ɛ.

¹⁶ Ɔsə tar gə ɗəgərə gə tarje gə baa rəw gə ɗangə, mba nje pa tar gə ɗəgərəje d-a kila kuji dɔ ne gə lə Luba ang dɔ-je gə kede-kede.

¹⁷ Tar gə ta-je gə a kusa-je gə kede-kede to to gə ngɔ gogəro be. Imene je gə Pilɛt ꞌga̰ horo-je gə tɔ.

¹⁸ Jeje ja d-uba tar gə tɔgərɔ d-ḭya̰; ngaɓa paje d-ar-je dəwje na Luba ndol nje gə d-uy nam ngaa, d-ar-je nje gə kɛm ꞌtusu ne takagə lə-je d-ḭya̰.

¹⁹ Tar gə tɔgərɔ gə Luba ja ula ngira nangə: Mbayɓe gərə dəwje tɔ̰y gə to njeka-ɛje, ngaɓa ɓo na-na ja ɓa pa na n-to nje kar Luba nama a kɔsə neɗa gə dɔ buguru rəw ɓa.

²⁰ Bay maa gə bay lar to mə kəy gə boy gə; ngaa bay kagə gə bay ənji kara to kəne tɔ. Be ɓa bayje gə kɛm ꞌto mba ɗa ne kula ndɔ bula gə ngaɓa nje gə ꞌɗa ne kula ndɔ gə baa gə tɔ.

²¹ Be ɓa dəw gə sangə rɔ-ɛ gə maj-ɛ, gə ngom rɔ-ɛ dɔ neɗa gə kṵra̰y gə nama a to to gə bay gə a ta kəm nj-ɛ ngaɓa a to ɔji dɔ kula gə gə maj-ɛ tɔ̰y.

²² Ar ɓo neɗa gə kṵra̰y gə dɔ basa̰ gə o̰ dɔ-i ang, ɗaa sangə go neɗa gə gadə-gadə, gə takagə, gə njigi, ngaɓa ar mə-i to ɗɛgɛgɛ gə dəwje tɔ̰y gə d-aw no ꞌɓar ne Mbayɓe gə mə gə arə ngadə.

²³ Ɔsə tar ma̰y mbə rəw gə ɗangə, mba ꞌgərə to gə tar ma̰y mbə ce ɓɛlɛ gə ce.

²⁴ Be ɓa may kar ngon njekula lə Mbayɓe to njeɓɛlɛ ang, ngaa n-a kul kuji gə dəwje tɔ̰y, ngaɓa n-a kaw gə gusu tɔji ne ngaɓa n-a kore m-e ndəng dɔ-je gə.

²⁵ N-a ndəji njekunda tarje gə ndu gɔsə gə kul kuji, mba kunda ne m-e to gə ndɔ gə ɗangə nama Luba a kar-je mbəl kəji lə-je, mba gərə ne tar gə tɔgərɔ,

²⁶ gə mba təl kun kəji lə-je gə gə maj-ɛ, gə mba ce ne ta kula gə ꞌSɛ̰ngərɛ̰ iya mba kuba neje ɓa mba kar ɗa-je ne mə njigi lə-a.