2 Timoce 1 - Mbede Lə Luba Kone Gə Sigi

¹ Pɔl, njeka̰ykula lə Kirisi Jeju, gə go mə njigi lə Luba, mba kila ne mbərə təbə gə ye ja uwa dɔ gɔl-ɛ ɗəw gə lə Kirisi Jeju;

² Timoce, ngon njigi lə-m: May kar-i inga mənuji, gə məmay ngaɓa gə ɗɛgɛgɛ ɗəw gə lə Luba gə Bɔ je gə Mbayɓe lə-si Kirisi Jeju.

Tar ndəji gə go nuji

³ M-təl gə oyo m-ar Luba gə m-pol-e gə kəji gə arə ngadə to to gə ka-mje gə kede le, ngaɓa logə m-aw m-dəji Luba taar-taar ja nama m-ila ri kəne, cil gə kar;

⁴ mba mə-m ole dɔ man no gə kəm-i gə ɗaa m-njinga rɔ-m gə mba təl ko-i ɓa mba kar rɔləl ɗusu mə-m.

⁵ Mə-m ole dɔ takagə lə-i gə gadə-gadə, takagə gə arə ngadə gə nee le to mə ka-ije gə jene gə ri-a na Loyis cibi ɓa to mə ko̰-ije gə ri-a na Ənis gə kede le, ye ja tɔ ɓa to mə-i ꞌi gə.

⁶ Gəl-e gə nee ɓa m-ndəji mba kar-i n-ndol dɔ gusu lə mənuji gə Luba ula mə-i gə go ji-m gə m-ila dɔ-i gə le.

⁷ Mba njil gə Luba ar-ɛ isi mə-si gə le to njil kəm kul ang ngaa, to njil gə a kar-si singa ɗa kula lə Luba nəm, kar j-a njigi ne ngan mar-sijee nəm ngaɓa a kar-si kəm karə nəm tɔ.

⁸ Əw rɔ-i ɗa rɔ kul dɔ pa tar naji gə lə Mbayɓe lə-si nəm, ɓa dɔ-m ꞌma gə d-uwa-m d-ila-m kəy kula gə mba tar lə-a nəm tɔ. Ngaa o sə-m məsərə mba Tar gə May gə go singamongə lə Luba.

⁹ Luba ja aji-si cibi ɓa ɓar-si gə ɓar gə arə ngadə, ɓo gə go kula ɗa si ang ngaa gə go mənuji ɓa n-gɔl ne to gə be ɗəw gə lə Jeju Kirisi kede ləw nam ɓa n-unda dara je gə dɔ nangə ɓi.

¹⁰ Ɓisine ɗaa Luba tɔji mənuji nee le gə ɗaga ɗəw gə lə Njekaji-si Kirisi Jeju. Mba Kirisi Jeju ɗe guru singamongə yo rug-rug cibi ɓa ɗe gə Tar gə May mba kar dəwje d-inga nee təbə gə ɗəw Njil gə a ndum ang, ɗəw Tar gə May gə.

¹¹ Mba Tar gə May nee le ɓa Luba unda-m ne gə nje pa tar lə-a nəm, gə njeka̰ykula ngaɓa gə nje tɔji ne nəm tɔ.

¹² Ngaɓa gəl-e gə nee ja tɔ ɓa m-o ne ꞌməsərə ngaa rɔ kul uwa-m ang, mba m-ta kagə Kirisi Jeju. Ngaɓa m-gərə gə maj-ɛ to gə n-asə ngom ne gə n-um ji-m gə le saar ndɔ gə n-a təl ne.

¹³ Tar gə tɔgərɔ gə o ta-m gə ɗəw takagə gə njigi gə ḭ rɔ Kirisi Jeju gə le, un gə ne kɔji mar-ɛ.

¹⁴ Ne gə may le ngom gə go singa Njil Njerɔsangə gə to mə-si gə.

¹⁵ ꞋI le ꞌgərə to gə njetakagəje tɔ̰y gə d-isi dɔ nangə gə Aji gə ꞌmbadə-m, Pijɛl je gə Ɛrəmojɛn ga̰ horo-je gə.

¹⁶ May kar Luba ɓugu məmay lə-a dɔ njeməkəyje gə lə Onejipɔr, mba taar-taar ja n-aw n-ula jingaw mə-m gə ngaɓa n-ɗa rɔ kul mba-m ɔji kula lar gə ꞌtɔ-m ne ang;

¹⁷ ngaa ndɔ gə n-ɗe mə ɓe gə Rɔm ɗaa, n-sangə-m gə mong-e saar n-inga-m.

¹⁸ May kar Mbayɓe ar-ɛ n-inga məmay lə Luba ndɔ təl gə lə Kirisi Jeju! Məmay gə n-ɗa sə-m mə ɓe gə Epɛs gə al dɔ lo le, dəw gə gərə unda-i kəne kara godo.