2 Piyɛr 3 - Mbede Lə Luba Kone Gə Sigi

Ndɔ təl lə Mbayɓe

¹ Ngan ko̰-m gə m-njigi-si ya̰, oje mbede gə nee le, to njekum gə joo ɓa m-ɗa m-ar-si nee. Mə mbedeje gə joo nee le, m-ndəji-si dɔ nekole mə-je gə, mba kar kəji negərə lə-si unja ne ngadə,

² mba kar mə-si ole ne dɔ tarje gə pajambərəje gə to gə losang-ɛ ꞌpa kede, ngaɓa gə dɔ ndu gə Mbayɓe gə Njekaji-si un ar njeka̰ykulaje lə-si.

³ May kar-si ꞌgərəje kede nam to gə, dɔ ɗudu ndɔ nama, njekogo dəwje d-a ɗe kunda-si kogo ne, ɗaa d-a nja gə go ɓo neje gə o̰ dɔ-je,

⁴ ɗaa d-a pa na: Ndu-e gə n-un na n-a təl le, n-a ɗe ndɔ gə ɗa gə wa? Mba, un kud-e ləw gə ka-sijee d-uy ja neje tɔ̰y to to gə gə kede gə d-unda ne dara gə nangə le ja.

⁵ Be ɓa gə mə njigi lə-je ja, d-ar mə-je uy to gə Luba ɗa dara gə dɔ nangə ləw baa gə tar gə t-ɛ gə ja ngaɓa nangə ɔsə lo ce mə man ngaɓa ɗa nangə təl to dan man gə,

⁶ ngaɓa gə go neje gə kara baa nee le ja, man ta ne dɔ nangə gə kede ar ꞌtuji ne;

⁷ ngaa, gə go tar gə nje kara nee le ja, d-uwa ne dɔ gɔl dara gə nangə gə ɓisine ngina ne pər gə dɔ ndɔ gangə tar gə ngaɓa tuji gə nje gə gərə Luba ang d-a kuba.

⁸ Ngaa, sisəy gə m-njigi-si ya̰, ne kara to kəne əng gə kar mə-si uy ang: no Mbayɓe gə le, ndɔ kara to to gə ɓal tɔl-tɔl dɔg ngaɓa Ɓal tɔl-tɔl dɔg, to to gə ndɔ kara baa be;

⁹ To ngə̰y ɓa Mbayɓe ngə̰y dɔ tar təl gə lə-a le to to gə nje gə kɛm d-əji ne ang. Ngaa n-ila m-e dɔ mar-ɛ gə ɔji dɔ sisəy ja, mba n-njigi kar dəw kara horo-si gə uba tuji ang, ngaa kar dəwje tɔ̰y ja ꞌturu kəji lə-je.

¹⁰ Ngaa ndɔ lə Mbayɓe le a ɗe to to gə nje ɓogo be. Dɔ ndɔ-ɛ le dara a nday kar kɔr-ɛ a ɓar ɓəgəgə-ɓəgəgə, pər a ro nekundaje gə ndogo dara tɔlɔg-tɔlɔg, ngaɓa nangə gə neje tɔ̰y gə to kəne d-a nday tɔ.

¹¹ Mba neje nee tɔ̰y d-a kaw kunda nangə to gə be le ɗaa, may kar pa nja-si to gə losang-ɛ gə kila kuji dɔ ne gə lə Luba.

¹² Mba aw nginaje dɔ ndɔ ɗe lə Luba le ɗaa, may kar-si ꞌndəbə-je ɓa, to ndɔ gə pər a ko̰ ne dara ja̰rɛ̰ kadə ngaɓa nekundaje gə dara kara pər a ro-je tɔlɔg-tɔlɔg

¹³ Ngaa, ja nginaje gə go ne gə n-uwa dɔ gɔl-ɛ, dara gə sigi je gə nangə gə sigi gə neɗa gə gadə-gadə a ko̰ ɓe kəne.

¹⁴ Gəl-e gə nee ɓa, sisəy gə m-njigi-si ya̰, uwaje rɔ-si ngang ar-ɛje n-ɗe n-inga-si gə rɔ gə arə ngadə ngaɓa kar tar uwa dɔ-si ang mba kar ɗɛgɛgɛ to ne horo-si gə gə Luba.

¹⁵ To gə ngon ko̰-si gə m-njig-e ya̰, Pɔl ɗa ne mbede gə go kəm karə gə d-ar-ɛ le, may kar oje kila mə dɔ mar-ɛ gə lə Mbayɓe le gə ɗəw kaji lə-si.

¹⁶ Ye ja to ne gə n-pa mə mbedeje tɔ̰y gə n-ɗa n-pa ne tar neje nee le. Mə mbedeje gə əng le, tarje gə gərə gəl-e o̰ ya̰ to kəne, ar dəwje gə gərə ang, gə to njetar mulaje d-uwa ndṵrḭ, to to gə ꞌɗa ne gə kɛsə mbedeje gə kɛm mba kar to gəl tuji lə-je.

¹⁷ Ngan ko̰-m gə m-njigi-si ya̰, sisəy le ɗaa, ꞌndəji-si nam, ɗaa ar-je dɔ gɔl-si gə, ar-je nje gərə Luba angje d-ḭ d-ərə-si d-ar ubaje kuwa gədərə lə-si ḭya̰je,

¹⁸ ngaa may kar-si ꞌtɔgəje dɔ mənuji gə gə dɔ gərə Mbayɓe gə Njekaji-si Jeju Kirisi gə gə kede-kede. May kar riɓar to k-ɛ, ɓisine ngaɓa saar-saar gə no! Oyo.