2 Piyɛr 2 - Mbede Lə Luba Kone Gə Sigi

Tar lə njenetɔjije gə gə mbɔr-ɛ baa

¹ Be ɓa kede ləw kara pajambərəje gə gə mbɔr-ɛ ꞌga̰ horo dəw mə ɓeje gə, ɗəw kara baa, horo-sisəy gə kara njenetɔjije gə gə mbɔr-ɛ ꞌtɔji neje gə baa gə kar kuba tuji ngaɓa ꞌturu gir-je d-ar Mbayɓe gə ndogo-je, mba kar tuji uba-je ne nangə bus.

² Dəwje bula d-a kum mə-je naa gə dɔ neɗa dɔ godo gə lə-je, ɗaa mba sijee ja, d-a taji ne ɗəw tar gə tɔgərɔ.

³ Gə go ɓo lar gə uwa-je ɓərə gə ja, d-a kərə ne si gə tar gə ta-je gə, mba kinga ne neje ji-si gə, ngaa tar uwa dɔ-je ləw baa ngaɓa d-a kuba tuji ɓisine baa.

⁴ Mba to gə ɓo Luba ɔr kəm anjije gə ɗa neɗa gə kṵra̰y ang, ngaa ɔsə-je um-je dan cil ciməri gə mə buwa wəl gə sṵra̰ godo, ar ꞌto d-aw ꞌngina gangə tar,

⁵ to gə ɓo nekundaje gə dɔ ndɔ gə kede ləw kara n-ɔr kəm-je ang, dɔ ndɔ gə n-ar man bələm ta ne nekundaje gə ta kəm-e ang. Ngaa dəwje ji nay jo baa ɓa n-gom-je, gə dəw kara horo-je gə ri-a na Nowe, njekila mbərə ne gə gadə-gadə.

⁶ To gə ɓo n-tuji ɓeboje gə Sɔdom je gə Gɔmɔr gə pər mba kar to nekɔji mar-ɛ mba nje ɓəəl Luba angje gə ndɔ gə bara,

⁷ ngaa to gə ɓo Lɔd gə to dəw gə gadə-gadə, gə kəji lə-a turu buguju dɔ pa nja gə kṵra̰y gə lə nje tɔl dəwje gə nee le, n-ɔr-ɛ n-ce sə-a

⁸ mba ꞌne gə dəw gə gadə-gadə gə n-isi horo-je gə nee le, logə n-o neɗaje gə kṵra̰y lə-jə gə kəm-e ose gə mbi-a gə ndɔ-ndɔ ɗaa njil-e oso nangə ang.

⁹ Be ɓa Mbayɓe gərə ɗəw gə a ta ne dəwje gə nje kila kuji dɔ ne gə Luba je ta nena gə ngaɓa ḭya̰ ne njeneɗaje gə kṵra̰y ngina ne ndɔ gangə tar mba bɛ̰ ne ta-je,

¹⁰ ꞌJejee gə gə go mal neje gə mina, ꞌsangə ne go rɔləl gə darɔ gə ɗaa ꞌdabə ne singamongə lə Mbayɓe dasəra ja ɓa a kədərə gə je. ꞌTo nje mə bo nekusaje, nje gasəraje, ꞌɓəəl taji nekundaje gə dara gə riɓar to dɔ-je gə ang,

¹¹ Anjije gə singaje gə singamongə lə-je al dɔ lo ja kara pa tar taji nekundaje nee le gə gangə tar no gɔl Mbayɓe gə ang.

¹² Ngaa ꞌjejee nee le, ꞌto to gə gə daje gə kəji lə-je godo be, gə ꞌto kar tuwa-je gə tɔl-je, be ɓa ꞌtaji ne ne gə ꞌgərə ang, ɗaa d-a busu to gə daje busu ne be tɔ,

¹³ d-a kinga kuga neɗa gə dɔ buguru. ꞌTɔl ta ɓo neje gə uwa-je ɓərə gə dan kara. ꞌƊa nerɔkul ngaɓa ꞌto gə jigi tuga gɔl, d-usa gə si ne naa gə gə rɔləl d-ərə ne kəm-si.

¹⁴ Kəm-je to kəm sangə jeneje dɔro ngaɓa d-ɔr kəm neɗa gə kṵra̰y ang, d-ərə dəwje gə njeməmbɔrɛje ngaɓa kəm kə̰y kinga ne ɓa uwa mə-je; ꞌjejee nee le ꞌto nganje gə ndɔɔl uwa dɔ-je.

¹⁵ Logə d-uba ɗəw gə dana gadə-gadə d-ḭya̰ gə tɔg-ɛ baa ɗaa, ꞌndəəm-je d-un ɗəw go dəw gə nje njigi kuga gə gə dɔ buguru, ri-a na Balam, ngon lə Bosor,

¹⁶ ngaa Balam təl inga kuga kal tar gə darɔ-ɛ ja, ar ngon da gə pa tar ndɔ kara ang ja, pa tar ar pajambərə nee le unda ne ngangə neɗa mbə lə-a.

¹⁷ ꞌJejee nee le, ꞌnay to gə buwa man gə ii, gə nji gə ḭ gə ləl ɔr, ɗaa lo gə ndul gə cil ciməri oso kəne ɓa d-uwa dɔ gɔl-ɛ ꞌngina-je.

¹⁸ ꞌPa tarje gə baa ja d-ɔsə ne rɔ-je ngaɓa gə go ɓo neje gə darɔ gə d-ərə ne nje gə kar be ɓi ɓa ꞌkɔdɛ rɔ-je d-ɔr ji njendəəmje gə;

¹⁹ ꞌJejee nee ja kara kəji neɗa gə kṵra̰y uwa-je ɓərə gə, mba na-na ja kara to ɓərə lə ne gə o̰ ɓe dɔ-ɛ gə, ngaa ꞌpa d-ar nje gə əng, na d-a kar-je d-inga dɔ to dɔy.

²⁰ Be ɓa to gə d-ɔr rɔ-je mə neje gə mina gə dɔ nangə nee gə go ɗəw gərə gə ꞌgərə Jeju Kirisi gə Mbayɓe lə-si ngaɓa gə Njekaji-si nam, ngaɓa ꞌtəl d-andə kəne to gə sigi d-ar o̰ dɔ-je nama, a to gə je kṵra̰y ya̰ unda ye gə dɔngɔr.

²¹ Mba kar ꞌgərə ɗəw gə may nee kede ang le ja, may ya̰ unda ye kar ꞌgərə nam ɓa ꞌtəl d-uba ndu gə to gə losang-ɛ gə d-ar-je d-ḭya̰.

²² Jejee le ɗaa ko̰ tar gə tɔgərɔ nee ɓa ce dɔ-je gə: Bisi ɓa təl o̰ tomɛ lə-a ngaɓa bərə ɓa ndogo man nama təl andə bɔy gə.