2 Piyɛr 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Simo Piyɛr, njeka̰ykula lə Jeju Kirisi ngaɓa m-to ngon njekula lə-a, m-ɗa mbede nee m-ar nje gə ꞌta kagə gə maj-ɛ to to gə sijee be, ɗəw ne ɗa gə dana gadə-gadə lə Luba lə-si je gə njekaji-si Jeju Kirisi.

² May kar mənuji gə ɗɛgɛgɛ d-ɔsə kudu naa ngug-ngug dɔ-si gə go ɗəw gərə ꞌgərəje Luba gə Mbayɓe lə-si Jeju!

Pa nja lə njetakagə kirisije

³ Ɗəw singamongə gə lə-a ꞌne gə Luba ja ɓa n-ar-si ne ne tɔ̰y gə kar kaw kəm baa ngaɓa kar kila ne kuji dɔ ne gə lə-a, kar j-a gərə ne nje ɓar-si ɗəw rɔnduba gə ɗəw məmay gə lə-a ja.

⁴ Ɗəw gə lə neje gə nee le ɓa, d-uwa ne dɔ gɔl neje gə boy-boy gə may to ɓəəl, mba kar ꞌce ne ta tujije gə, ɗe ɗəw gə lə ɓo neje gə o̰ ɓe dɔ nangə nee, mba kum ne naa gə Luba

⁵ Gəl-e gə nee le ɓa, undaje singa-si dɔ mar-ɛ gə, ar-je neje gə to nee ɔsə kudu naa dɔ takagə lə-si: Pa nja gə may ɔsə kudu takagə lə-si, negərə ɔsə kudu pa nja-si gə may,

⁶ ko̰ dɔ darɔ ɔsə kudu negərə, kuwa gədərə ɔsə kudu ko̰ dɔ darɔ, kila kuji dɔ ne gə lə Luba ɔsə kudu kuwa gədərə,

⁷ nuji gə kuwa gə horo ngan ko̰ naaje gə ɔsə kudu kila kuji dɔ ne gə lə Luba, njigi naa ɔsə kudu nuji gə kuwa horo ngan ko̰ naaje gə.

⁸ Be ɓa ɓo neje gə nee le to mə-si gə ngaɓa ɓo ɔsə dɔ naa gə kede-kede nama, a ɗaje kula kar nduj-e a to mba kar ꞌgərəje ne Mbayɓe Jeju Kirisi;

⁹ ngaa ɓo dəw gə neje nee le godo m-e gə nama to nje kəm tɔ, gə aw mam lo, ɗaa m-e unda pudum dɔ neɗaje gə kṵra̰y gə lə-a gə ləw gə ꞌtogo le.

¹⁰ Gəl-e gə nee ɓa, ngan ko̰-m, undaje singa-si dɔ mar-ɛ gə ɔji dɔ ɓar gə Luba ɓar-si ngaɓa mbərə-si le, ɓo ꞌɗaje to gə be nama a koso-je dan neɗa gə kṵra̰y gə ang.

¹¹ Be ɓa ɓeko̰ lə Mbayɓe lə-si gə Njekaji-si Jeju Kirisi gə to gə ndɔ gə ndɔ le, d-a kɔr t-ɛ kila bəndəng kar-si.

¹² Gəl-e gə nee ɓa, m-a kole mə-si taar-taar dɔ neje gə nee le, to neje gə ꞌgərəje nam ja ngaa mba kar ꞌɓije ne dɔ tar gə tɔgərɔ gə ɓogəne.

¹³ Ɓo m-aw kəm baa ɓi nama to dɔ gɔl-ɛ ja mba kar m-ole mə-si m-ar-si ꞌcibije ne dɔ rɔ-si gə ang,

¹⁴ mba to gə Mbayɓe lə-si Jeju Kirisi pa ne kede ar-m le, m-gərə to gə ndɔ gə darɔ-m a kunda nangə nay ba̰y ang baa.

¹⁵ Ngaa m-ɗa ga kar le m-aw kara ɗəw to ar mə-si ole kəne.

¹⁶ Logə j-ila mbərə ɗe gə Mbayɓe lə-si Jeju Kirisi a ɗe gə singamongə j-ar-si le, to gə ꞌsu gə dəwje d-ɔr gə kəm karə lə-je ɓa j-ɔr j-ar-si ang, ngaa sijee ja j-o-e lo kunda rɔ-ɛ gə to ɓəəl gə kəm-si nda̰-nda̰;

¹⁷ mba logə Luba gə Bɔ ɗɔy-e ngaɓa ula rɔnduba dɔ-ɛ gə gə ndu dəw gə ɓar ɓolong dɔ-ɛ gə na: ꞌNe gə nee le, n-to ngon njigi lə-m, n-to ngira rɔləl lə-m.

¹⁸ Sijee ja j-o ndu dəw gə ḭ dara ɓar nee le gə mbi-si, logə j-ar sə-a dɔ ər gə to losang-ɛ gə.

¹⁹ Ngaɓa takagə lə-si mongə ne gə kede dɔ tar gə pajambərəje ꞌpa kede le, may kar-sisəy kara oje gə maj-ɛ, to to gə pər gə ndogo lo ndul gə, saar kar lo aw arə, ngaɓa duji lokarə ndogo ne mə-si gə.

²⁰ ꞌGərəje kede nam to gə tar gə pajambərəje pa mə mbede gə le, dəw kara ja asə kɔr gəl-e gə kəm karə lə-a ang,

²¹ mba tar gə pajambərəje ꞌpa le, ɗe gə go kəm karə lə dəw kara ang, ngaa Njil Njerɔsangə ɓa ar-je singamongə ꞌpa ne tar gə ndu Luba.