2 Jean 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa ngatɔgə, m-ɗa mbede nee m-ar Nembaje gə mbər-e, m-ar ngan-ɛ gə m-njigi-je gə njigi gə tɔgərɔ ngaɓa ꞌma gə kar-m baa ɓa m-njigi-je ang, ngaa dəwje tɔ̰y gə ꞌgərə tar gə tɔgərɔ –

² mba tar gə tɔgərɔ gə to mə-si gə le, a nay gə sijee gə ndɔ gə ndɔ.

³ May kar j-inga mənuji, ko kəmtondoo gə ɗɛgɛgɛ ɗəw gə lə Luba gə Bɔ je gə Jeju Kirisi, Ngon lə Bɔ dəwje mə tar gə tɔgərɔ gə gə njigi.

Njigi gə horo ngan ko̰ naaje

⁴ Rɔ-m ləl-m ya̰ mba m-inga ngan ꞌi d-aw nja mə tar gə tɔgərɔ gə, gə go ndu gə j-inga ji Bɔ-sijee gə.

⁵ Nembaje, ɓisine nee le, m-dəji-i kar j-a njigije naa gə yo gə nee, ɗaa to ndu gə sigi ang baa, ngaa to ye gə to ji-si gə lo kuma kud-e gə dɔngɔr.

⁶ Oje ne gə to njigi le, mba kar j-a nja go ndu gə lə-a. Ye ɓa to ndu gə a ꞌnja-je kəne to gə oje nee tar-ɛ lo kuma kud-e gə dɔngɔr le.

Pajambərəje gə gə mbɔr-ɛ

⁷ Be ɓa, nje kərə dəwje bula ꞌce dɔ nangə nee, ꞌjejee gə ꞌpa na Jeju Kirisi ɗe ɗəw darɔ ang. Oje dəw gə pa ta gə bənəng le to nje kərə dəwje, nje kəm tar lə Kirisi.

⁸ Undaje kəm karə dɔ rɔ-si mba kar kandə kula lə-si tuji ang, ngaa mba kinga ne dɔ ji gə maj-ɛ.

⁹ Dəw gə ɗa-ɗa ɓa ar əw, cibi ngom nendo lə Kirisi ang nəm nama, Luba godo m-e gə. Dəw gə ngom nendo nama Bɔ je gə Ngon d-isi m-e gə.

¹⁰ To gə ɓo dəw ɗe ɓə lə-si gə nendo nee le ang nama, ꞌuwaje gə rɔ-si gə ang nəm ngaɓa ꞌɗa-ɛje m-o-i ɓa ang nəm tɔ.

¹¹ Be ɓa dəw gə ɗ-ɛ m-o-i ɓa ɗaa nj-ɛ ɗa sə-a mə kara dɔ neɗa-ɛje gə kṵra̰y.

¹² Neje bula to kar-m m-ɗa mbede gə m-ar-si ja, m-njigi ɗa mə mbede gə nee ang; ngaa m-gɔl mə-m gə mba kaw ɓə lə-si, ɗaa m-a pa gə si tar gə ndu gə boy, mba kar rɔləl lə-sijee ɔr ne sṵra̰.

¹³ Ngan lə ngon ko̰-i gə jene gə ꞌmbər-e uwa ji-i.