2 Corinthiendjé 9 - Mbede Lə Luba Kone Gə Sigi

¹ Tar gə ɔji dɔ kula la gə njerɔsangəje gə Jerujalɛm le, to kəm kar-m m-ɗa mbede m-ar-si ang ngaa.

² Mba m-gərə ɓo ɗa kula gə to mə-si gə, ye ɓa m-unda ne kar-m no dəwje gə Masedowan na: Nje gə Akayi ꞌgɔl rɔ-je to gə kaal baa ngaɓa kɔsə rɔ ɓad lə-si ndol dəwje bula.

³ M-ula ngan ko̰-sijee ɓə lə-si mba kar gaji sisəy gə j-ɔsə ɔji dɔ ne gə əng le təl to gə ne gə baa ang ɗaa, to gə m-pa ne le, kar isije dɔ gɔl si gə kəgəgə.

⁴ M-ɓəəl ang mba to gə ɓo, nje gə Masedowan d-aw sə-m ɓa d-o to gə sisəy uwaje dɔ gɔl rɔ-si ang nama, to rɔ kul gə a kuwa sijee ja, ngaa a kuwa sisəy nəm tɔ.

⁵ To gə be ɓa, ꞌma m-əji mba ndəji ngan ko̰-sijee kar d-aw no-m gə kede, gə mba kar ꞌgɔl gə si neje gə ɔjije gə mba ɗa le kar-ɛ to dɔ naa gə ko, mba kar to nenuji, ɓo to kula gə d-uwa ne si gə singa ang.

Ndu gə d-un d-ar nje gə d-un ne d-ar

⁶ Oje gə maj-ɛ ɓa, dəw gə dubu ne njɛ̰ a kuja njɛ̰, dəw gə dubu ne ya̰ a kuja ya̰ tɔ.

⁷ May kar na-na kara arə ne to gə əji m-e gə, gə məko̰ ang nəm ngaɓa gə singa ang nəm tɔ, mba Luba njigi dəw gə ar ne gə rɔləl.

⁸ Luba asə kar-si nemayje dang-dang, mba kar ingaje ne ne gə ndɔje tɔ̰y gə a la gə rɔ-si, ngaɓa ye gə nay ji-si gə ya̰ le a kuwaje ne nuji tɔ,

⁹ to gə Mbede lə Luba pa na: N-kay ne, n-cɛ̰ mə ji-a n-arə njendooje; Neɗa gə dana gadə lə-a to gə ndɔ gə ndɔ.

¹⁰ Dəw gə njekun ko kar nje dubu-e, gə nje kar dəw mbə gə nekusa-a le, n-a kun ko le kar-si ngaɓa n-a kar ko le ɔsə dɔ mar-ɛ gə kede-kede, cibi n-a kar kandə neɗa gə dana gadə-gadə lə-si oso dɔ mar-ɛ gə.

¹¹ Be ɓa sisəy a toje njenekingaje ɗəw neje ɓədə-ɓədə gə ɔji dɔ nenujije dang-dang gə a to neɗa oyo Luba, ɗəw gə lə-sijee.

¹² Mba kula nembo̰ nee le la gə njerɔsangəje gə kar-je baa ang, ngaa ɗa ar dəwje d-ar ne oyo Luba ya̰.

¹³ Logə dəwje d-o singa kula gə ꞌɗaje nee ɗaa, d-ila ne riɓar dɔ Luba gə ɔji dɔ kila kuji lə-si dɔ Tar gə May gə lə Kirisi gə ta-je, ngaɓa ɔji dɔ nenuji kar mə kara gə ꞌɗaje gə je, ngaɓa gə dəwje tɔ̰y.

¹⁴ ꞌƊəji Luba mba tar lə-sisəy, ꞌtɔji njigi lə-je ɔji dɔ mənuji lə Luba gə uru dɔ mar-ɛ, gə to dɔ-si gə.

¹⁵ J-arə oyo Luba mba nekarə baa lə-a gə al dɔ lo.