2 Corinthiendjé 8 - Mbede Lə Luba Kone Gə Sigi

NEMBO̰ GƏ ƆJI DƆ NJETAKAGƏJE GƏ JERUJALƐM Ne kɔji mar-ɛ lə Mbo̰ naaje lə njetakagəje gə Masedowan

¹ Sisəy ngan ko̰-mje, j-a njigi kar-si ꞌgərəje mənuji lə Luba gə tɔji rɔ-ɛ gə ɗaga horo Mbo̰ naaje lə njetakagəje gə Masedowan.

² Dan nekəmandoo gə ce dɔ-je gə bula ja kara, rɔ-je ləl-je al dɔ lo, d-isi dan ndoo gə to ɓəəl ya̰ ja ne d-ore dɔ-ɛ nangə ꞌcɛ̰ mə ji-je d-un nekingaje lə-je d-ar al dɔ lo,

³ d-ar gə go singa-je, ye gə m-o le, d-un d-ar al dɔ singa-je ja kara nəm, ngaɓa d-un gə mə njigi lə-je ja.

⁴ ꞌDəjije-si ɗəw ngɔɔgɔ-ngɔɔgɔ mba kar j-ḭya̰ ɗəw j-ar-je ꞌmbo̰ ne ne mənuji ꞌla ne gə njerɔsangəje gə Jerujalɛm.

⁵ ꞌƊa-je ne gə al dɔ ye gə j-unda mə-si kəne to gə d-a ɗa. D-un darɔ-je ja d-ar Mbayɓe kede nam ɓa, d-un d-ar sijee ɓi, gə go mə njigi gə lə Luba.

Pɔl dəji nje gə Kɔrɛnt kar d-ula ji-je

⁶ Be ɓa, j-ula jingaw mə Titə gə mba kar tɔl ta kula mənuji ɓə lə-si, to gə n-uma ne kud-e le.

⁷ Ɗəw kara baa, to gə sisəy ꞌtoje baw dɔ neje gə tɔ̰y nee: takagə nəm, tar pa nəm, negərə nəm, ndəbə sər dɔ neje gə gə loe-loe ngaɓa njigi gə njigi-je sijee nəm, may kar ꞌɗaje kula mənuji gə nee le ar-je uru gada.

⁸ M-pa tar gə nee le m-un ne gə ndu ɓa m-ar-si ang, ngaa m-pa tar ndəbə sər lə nje gə kɛm gə ne kɔji mar-ɛ mba kar-sisəy tɔjije ne njigi lə-si gə tɔgərɔ.

⁹ Be ɓa, sisəy ꞌgərə-je mənuji lə Mbayɓe lə-sijee Jeju Kirisi, gə to baw ja ngaa, ɗa rɔ-ɛ gə njendoo mba kar ɗəw ndoo gə lə-a ɗaa sisəy a toje nebawje.

¹⁰ To tar kəji ɓa m-ila dɔ mar-ɛ gə m-ar-si, to tar gə ɔji dɔ-si, mba mə ɓal gə nday gə əng le, sisəy ja ꞌtoje dəwje gə dɔngɔr gə gɔl mə-je gə mba mbo̰ ne baa ang, ngaa dəwje gə dɔngɔr gə ꞌnjigi mbo̰ ne.

¹¹ Ɓisine ɗaa, may kar ꞌtɔlje ta kula nee le, mba kar gə go ne gə asə dɔ singa-si ɗaa, ye gə ꞌtɔl-je t-ɛ asə naa gə ye gə əji-je gə maj-ɛ mə-si gə.

¹² To gə ɓo dəw gə kəji lə-a to gə maj-ɛ, ɓa un ne gə ji-a gə ar nama, Luba ɓar Tar gə May dɔ-ɛ gə, ɓo ɔji dɔ ye gə godo ji-a gə ang baa.

¹³ M-pa m-ar-si mba kar odoje nekingaje lə-si tɔ̰y ar-je nje gə kɛm mba kar ꞌtəlje ne gə njendooje ang, ngaa mba kar mə-si asə ne naa.

¹⁴ Mə kar gə nee ɗaa, ne gə ingaje ar-je al dɔ ji-si le a kudu bolo ye gə lal nje gə kɛm mba kar ndɔ gə ɗangə ɓa ɓo, ye gə ꞌjejee d-a kinga al dɔ ji-je nama a kudu bolo ye gə lal sisəy tɔ. Be ɓa mə-si a kasə ne naa.

¹⁵ Ɗəw kara baa to gə Mbede lə Luba pa nena: Dəw gə dam ne ya̰ le inga ar al dɔ-ɛ ang, ngaɓa dəw gə dam ne njɛ̰ baa kara ne lal-ɛ ang tɔ.

Nje kaw mbo̰ neje gə Kɔrɛnt

¹⁶ May kar oyo Luba gə ɗa kula mə Titə gə ar-ɛ ndəbə kəgəgə ɔji dɔ-si to gə ꞌma be.

¹⁷ Be ɓa, n-o tar ndəji lə-sijee ɗaa, gə mə njigi lə-a ja, n-njigi gə tɔg-e baa mba kaw gə ɓə lə-si əng.

¹⁸ J-ula ngon ko̰-si j-ar aw sə-a naa gə, ngon ko̰-si nee le to dəw gə Mbo̰ naaje lə njetakagəje dang-dang d-ɔsə gaji-ɛ mba ne gə n-ɗa ɔji dɔ Tar gə May,

¹⁹ cibi, Mbo̰ naaje lə njetakagəje d-unda ndu-je naa gə d-ɔr-ɛ gə njebalokaw mbaa gə-sije ɔji dɔ kula mənuji. J-un kula nee le mə ji-sijee gə ja mba kila ne riɓar dɔ Mbayɓe gə nəm ngaɓa mba tɔji ne kəji məmay gə to mə-sijee gə.

²⁰ Sijee ja njigi kar dəw ila tar dɔ sijee gə ɔji dɔ nembo̰ gə bo gə d-um kula-a mə ji-sijee gə nee ang,

²¹ mba sijee ja sangə mba may ne ta kəm Mbayɓe gə baa ang, ngaa ta kəm dəwje gə tɔ.

²² J-ula ngon ko̰-sijee gə ɗan kara ɓi gə je tɔ, ꞌne to dəw gə ja gər-e gə maj-ɛ ngaɓa tar ɗa kula o̰-ɛ ya̰, ɓisine gə nee ja kara, ɓo ɗa kula ɗ-ɛ ya̰ mba n-unda m-e dɔ sijee gə.

²³ Be ɓa, Titə le to nje baa lo kaw lə-m nəm ngaɓa to nje baa kula lə-m horo-si gə. Ye gə ɔji dɔ ngan ko̰-sijee ɗaa, ꞌto njeka̰ykulaje lə Mbo̰ naaje lə njetakagəje, gə to riɓar lə Kirisi.

²⁴ ꞌTɔjije-je to gə ꞌnjigije-je tɔgərɔ jaa, mba kar Mbo̰ naaje lə njetakagəje ꞌgərə, ngaɓa ꞌtɔji-je gəl kɔsə gə j-ɔsə gaji rɔ-sijee ɔji dɔ sisəy no ꞌjeje gə tɔ.