2 Corinthiendjé 7 - Mbede Lə Luba Kone Gə Sigi

¹ Sisəy gə m-njigi-si ya̰, mba d-uwa dɔ gɔl neje gə to gə be d-ar-si naa gə kara baa le ɗaa, ar-je si ja togoje ne gə mina gə darɔ-si gə, gə mə njil gə mba kar sangə rɔ aw nee ɗɔ-ɛ gə kede-kede tɔl ne t-ɛ bugum dan ɓəəl Luba gə.

Turu kəji lə nje gə Kɔrɛnt gə rɔləl lə Pɔl

² Ar-je mə-si uy dɔ sijee ang. Sijee ja mbɔlɛ ne lə dəw ang, ja tuji ne lə dəw ang nəm ɓa j-ula mbə dɔ dəw gə kara ang nəm tɔ.

³ M-pa tar gə nee le mba kila ne tar dɔ-si gə ang, mba m-pa kede nam to gə j-uy ose j-aw ne kəm baa kara mə-sijee a kuy dɔ sisəy ndɔ kara ang.

⁴ M-ḭya̰ mə-m yag m-ar-si, rɔ-m ndɔɔ ya̰ dɔ si gə, mə-m oso nangə pɔ̰, rɔləl ɗusu mə-m dan ꞌməsərəje gə j-o gə.

⁵ Mba ndɔ gə ja ce Masedowan ja, lo kar j-uwa kɔr-si njɛ̰ be kara godo, ngaa ne ꞌməsərəje dang-dang inga si. Ɗɔje gugu dɔ si ngaɓa ɓəəl ɗusu mə-si tɔ.

⁶ Ngaa Luba gə njekuul mə dəwje gə njekula dɔ-je ngulumje, kul mə-si ɗəw ɗe gə lə Titə,

⁷ ɗe lə Titə baa ɓa ula jingaw mə-sijee gə ang, ngaa to jingaw gə sisəy ula-je m-e ꞌne gə ɓa ar-sijee singa tɔ. Titə ɔr gəl mal ko sijee gə ɗa sisəy, tar man no gə ɗe kəm-si gə ɔji dɔ sijee, mə-si gə to dɔ-m gə. Neje nee le ar-m rɔləl gə al dɔ lo cibi.

⁸ Be ɓa to gə ɓo mbede gə m-ula ne m-ar-si le, ɗa ar kəm-si to ndoo kara ɓisine jɔgə-m ang. To ne a jɔgə-m ja ngaa logə m-əji ɗaa m-o to gə tuji mə-si kur-e əw ang baa.

⁹ Ɓisine ɗaa m-ɗa rɔləl, mba kəm-sisəy gə ɗa ndoo ang ngaa mba ɗa gə ɗa ar ꞌturu-je ne kəji lə-si. Mba kəm-sisəy gə to ndoo le ɗe gə go mə njigi lə Luba, be ɓa sijee j-a ɗa gə sisəy ne gə kṵra̰y kara be ang.

¹⁰ Mba kəm gə to ndoo gə may ta kəm Luba gə le, ɗe gə turu kəji gə ce dɔ kaji gə ngaɓa jɔgə dəw ang, ngaa kəmtondoo gə dɔ nangə gə nee le uji yo.

¹¹ Be ɓa, oje neje gə kəmtondoo gə nje kara baa gə may ta kəm Luba gə, uji mə-sisəy gə le ɓa nee: kisi kəgəgə, pa tar dɔ rɔ gə, rɔ kul neɗa gə kṵra̰y, ɓəəl, tar ko-m gə o̰-sisəy, tar ɗa kula gə o̰-sisəy, kɔsə ne gə kṵra̰y ngərəng. Sisəy ꞌtɔjije gə darɔ-si ja to gə ꞌtoje dəwje gə may pɛdə mə neje gə nee le.

¹² Be ɓa, to gə ɓo m-ɗa mbede m-ar-sisəy nama, m-ɗa mba nje gə ꞌɗa ne gə kṵra̰y ang nəm, mba dəw gə ꞌɗa sə-a kṵra̰y ang nəm, ngaa mba tɔji ta kəm-sisəy gə ja, gə ta kəm Luba gə, to gə tar dɔ sijee o̰-sisəy ya̰.

¹³ Ɗəw neje gə nee le ɗaa, j-uba ne singa. Ngaa ore go singa gə j-uba ɗaa, rɔ-sijee ləl-si ya̰ ja cibi ɔji dɔ rɔləl gə Titə inga horo-si gə gə tar kəji lə-a gə ɗaje ar-ɛje oso nangə po̰.

¹⁴ Kɔsə gə m-ɔsə gaji rɔ-m ɓəəl no Titə gə ɔji dɔ-si, rɔ kul uwa-m ang. Ngaa to gə sijee ja pa ne tar gə tɔgərɔ j-ar-si gə ndɔje tɔ̰y le, ɓo j-ɔsə gaji rɔ-sijee no Titə gə nama, to tar gə tɔgərɔ ja,

¹⁵ ngaɓa logə m-e ole dɔ kila kuji gə lə-si tɔ̰y, gə kuwa gə uwa-aje gə rɔ-si gə gə kula dɔ ngulum, gə ɓəəl gə kisa ɗaa njigi lə-a gə ɔji dɔ sisəy le ɓar mii gə kede-kede ja cibi.

¹⁶ Rɔ-m ləl-m ya̰ mba kar m-unda mə-m dɔ-si dan neje gə tɔ̰y.