2 Corinthiendjé 6 - Mbede Lə Luba Kone Gə Sigi

¹ Mba sijee ja ɗa kula naa gə kara baa gə Luba, ja ndəji-si mba mənuji lə Luba gə ingaje le, kar oje gə ne gə baa ang.

² Mba ꞌne pa na: Dɔ ndɔ kuba may ɗaa, m-o ndu-si, Dɔ ndɔ kaji le ɗaa, ꞌma m-la gə si. Oje ɓisine ndɔ gə may ya̰, oje ɓisine ndɔ kaji le ngaa.

³ Sijee ja ɗa ne kara kar to jigi no dəw gə mba kar d-a kila ne tar dɔ kula lə-si ang.

⁴ Ngaa sijee ja tɔji rɔ-si mə neje tɔ̰y to gə ngan njekulaje lə Luba ɗəw kuwa gədərə gə dan neməko̰je gə, dan nekəmandoo gə, dan neje mongə si kang, dan neje gə ar mə-si gangə man,

⁵ dan kunda gə kunda-si, gə to kəy kula gə, dan wungu gə lə bula dəwje, kula rɔ ndubu dan kulaje gə, dan ɓi gə naa kəm tasə-tasə, dan tɔl mə ɓo gə,

⁶ ɗəw karə ngadə gə, ɗəw negərə gə, ɗəw kila mə dɔ mar-ɛ gə, ɗəw məmay, ɗəw gə lə Njil Njerɔsangə, ɗəw njigi gə lal tar mula,

⁷ ɗəw pa tar gə tɔgərɔ, ɗəw singamongə gə lə Luba, ɗəw ne ɗɔje lə neɗa gə dana gadə gə kar kila ɗɔ ose kar ta ɗɔ gə,

⁸ dan riɓar gə gə rɔ kul gə, ꞌpa tarje gə kṵra̰y gə yə je gə may dɔ-si gə, ja pa tar gə tɔgərɔ ja ngaa d-o si gə njetar gə ɗəgərəje.

⁹ ꞌGərə sijee gə maj-ɛ ja ngaa d-o si to gə dəwje ꞌgərə-je ang be, j-aw kəm baa ja, ngaa d-o si to gə yo dəwje be, kunda asə-si nag-nag ngaa ꞌtɔl-si ang,

¹⁰ d-ula wungu mə-si gə, ngaa rɔ-si ləl-si gə ndooje tɔ̰y, j-unda dəwje dan may gə ja ngaa d-o si gə njendooje, d-o si to gə dəwje gə ne lə-je godo, ngaa ja to bawje.

Kɔr rɔ mə ne gə kṵra̰y gə

¹¹ Sisəy, nje gə Kɔrɛnt, sijee ja pa gə si tarje tɔ̰y, ngaɓa j-ḭya̰ mə-si yag j-ar-si,

¹² sijee ja tɔji sisəy njigi gə sijee ja njigi-si, ngaa sisəy ḭya̰-je mə-si ar-je sijee ang.

¹³ M-pa gə sisəy tar to gə ngan-m be, ɗaa may kar ḭya̰je mə-si yag ar-je sijee tɔ.

¹⁴ Əw-je rɔ-si mba kum naa gə gə nje məkədərəje mba ɗa gə je kula. Ɗi asə mbo̰ neɗa gə dana gadə gə neɗa gə dɔ buguru naa gə wa? Ose mə kara gə ban ɓa a to horo lokarə gə gə lo ndul gə wa?

¹⁵ Ta Kirisi je gə Belial asə naa to gə ban wa? Ne lə dəw gə dana gadə je gə dəw gə nje məkədərə a to naa gə to gə ban wa?

¹⁶ Kəy lə Luba je gə magəje d-a riya kone to gə ban wa? Mba sijee ja to kəy lə Luba gə Nje kisi kəm baa, to gə Luba pa ne na: M-a kisi gə je ngaɓa m-a nja horo-je gə M-a to Luba lə-je, ngaɓa ꞌjeje d-a to dəwje lə-m.

¹⁷ Gəl-e nee ɓa, Mbayɓe pa na: ꞌCe-je horo-je gə gə gugu, Ɔrəje rɔ-si gə ɗangə, ꞌMbɔ̰bə-je mbɔr ne gə mina ang Ɗaa, m-a kuwa-si gə rɔ-m gə

¹⁸ M-a to bɔ-sijee, Ɗaa sisəy a toje gə ngan-mje gə jingaw gə nje gə jene. Mbayɓe gə njesingamongə pa be.