2 Corinthiendjé 5 - Mbede Lə Luba Kone Gə Sigi

¹ Be ɓa, sijee j-a gərə gə maj-ɛ to gə darɔ-si gə to kəy kisi gə dɔ nangə gə nee le, to kəy lo gə d-a tḭ, sijee j-aw gə kəy gə Luba ɓa unda gəl-e mə dara gə, to kəy kisi gə a to gə ndɔ gə ndɔ, ɗaa kəy gə nee le ji dəw ɓa ɗa ang baa.

² Cibi, sijee ja suum mə kəy lo gə nee le, ɗaa ɓo kandə mə kəy kisi-si gə dara ɓa uwa mə-si,

³ to gə ɓo kəy gə dara on darɔ-si nama, d-a ko kudu-si dum ang.

⁴ Logə j-isi mə kəy lo gə to dɔ nangə gə nee le ɗaa, ja suum to gə dəw gə odo nekodo gə wɔy be, tɔgərɔ, sijee ja njigi kuba darɔ-si kḭya̰ ang. Ngaa sijee ja njinga rɔ-si mba kula kubu gə dara dɔ-ɛ gə mba kar təbə mbəl ne ye gə a kuy.

⁵ Nje gɔl təbə nee le kar-sijee to Luba. N-ar-sijee Njil gə ne gə d-ɔsə kɔrə.

⁶ Be ɓa, j-unda singa-si dɔ rɔ-si gə gə ndɔ tɔ̰y, ngaɓa j-a gərə to gə lo gə sijee ja nay darɔ gə ɓi le, j-ar əw gə Mbayɓe,

⁷ ja nja gə ɗəw gə lə takagə, ɓo j-a nja gə ɗəw ne gə kəm o ang.

⁸ Tɔgərɔ, j-unda singa-si dɔ rɔ-si gə ja, ngaa ja njigi ya̰ mba kuba darɔ nee le kḭya̰, mba kaw kisi naa gə gə Mbayɓe.

⁹ Gəl-e gə nee ɓa, to gə ɓo j-isi ne mə darɔ-si gə nee, ose ja tusu j-iya̰ kara, ne gə uwa mə-sijee, to gə may ta kəm Mbayɓe gə.

¹⁰ Be ɓa, may kar-sijee tɔ̰y j-ar no ngəndəng gangə tar gə lə Kirisi, mba kar na-na kara inga ne dɔ ji lə-a gə may ose gə kṵra̰y gə ɗa lo gə ye nay nee mə darɔ gə ɓi.

Kula kum naa gə

¹¹ Gəl-e gə nee ɓa, sijee ja gərə ɗəw kila kuji dɔ Mbayɓe gə ɗaa, ja sangə mba kar dəwje d-aw ne go tar gə tɔgərɔ lə-a. Luba gərə gəl-si gə maj-ɛ, m-unda mə-m to gə sisəy kara ꞌgərəje sijee mə kəji gə lə-si tɔ.

¹² Sijee le, j-a təl tɔji rɔ-si to gə ɗangə ang ngaa, ngaa j-un ɗəw j-ar-si mba kar-si undaje kar-si ɔji dɔ sijee ngaɓa gə mba kar ꞌtəl-je ne gə tar ar-je dəwje gə nje kɔsə gaji rɔje-je ja baa, ɓogəne gə to mə-je gə ang baa.

¹³ Be ɓa, to gə ɓo sijee ja to mbəje nama, ja to mbəje lə Luba, ose sijee ja to njekəm karəje nama, ja to njekəm karəje lə-sisəy.

¹⁴ Mba njigi lə Kirisi o̰ dɔ sijee, sijee ja gərə to gə dəw kara baa uy mba dəwje tɔ̰y ɗaa, dəwje tɔ̰y d-uy sə-a ɗəw kara baa;

¹⁵ n-uy mba dəwje tɔ̰y, mba kar nje gə d-isi kəm baa le, d-isi kəm baa ɔji dɔ ꞌjeje ja ang saar, ngaa d-isi kəm baa mba ɔji dɔ dəw gə uy ɓa ndol mba tar lə-je.

¹⁶ Uma kud-e ɓogəne gə kede əng le, j-a gərə dəw gə ɗəw darɔ gə ang ngaa, to gə ɓo kede ja gərə Kirisi gə ɗəw gə darɔ nama, ɓisine j-a gərə to gə bənəng ang ngaa.

¹⁷ To gə ɓo dəw un rɔ-ɛ ar Kirisi nama, to nekunda gə sigi. Neje gə ləw nday, neje tɔ̰y təl to neje gə sigi.

¹⁸ Neje gə nee le ḭ rɔ Luba gə, ꞌne gə n-um naa gə gə sijee ɗəw gə lə Kirisi, ngaɓa n-ar-sijee kula kum dəwje naa gə.

¹⁹ Mba Luba um naa gə gə dəwje tɔ̰y ɗəw gə lə Kirisi, n-a tura ne go kal tar lə-je ang, ɗaa n-um tar kum naa gə ta-sijee gə.

²⁰ Be ɓa, sijee le ja to dəwje gə nje pa tarje ta ne toro Kirisi, ɗəw lə-sijee ɓa Luba ɓar-si ne. Gə ri Kirisi, j-oso kul no-si gə: Umje naa gə gə Luba.

²¹ Kirisi gə ɗa neɗa gə kṵra̰y ang, ngaa Luba odo neɗaje gə kṵra̰y lə-si um dɔ-ɛ gə mba kar-sijee ja təl ja to ne dəwje gə gadə-gadə no Luba.