2 Corinthiendjé 4 - Mbede Lə Luba Kone Gə Sigi

Riɓar je gə rɔ kul

¹ Gəl-e gə nee ɓa, kula gə Luba um ji-si gə go məmay gə lə-a le, sijee j-ila ne kasə ang.

² Ngaa, neje tɔ̰y gə to lokiya gə ngaɓa to nerɔkul lə-sijee le, j-ɔsə ngərəng, sijee j-a tula pa nja-si naa gə ang ngaɓa ja buguru dɔ tar lə Luba ang tɔ. Ngaa, ja kila dɔ tar gə tɔgərɔ gə ɗaga, ja ɗa ne tar naji lə-sijee kar kəji lə dəwje to ne dɔ sijee gə ngadə no Luba gə.

³ Ngaa, to gə ɓo Tar gə May lə-sijee iya rɔ-ɛ nama, iya rɔ-ɛ ɔji dɔ nje gə d-igi,

⁴ ngaɓa ɔji dɔ nje məkədərəje gə magə gə dɔ nangə nee rɛ̰ kəji negərə lə-je badə mba kar d-o ndogo lə Tar gə May kar riɓar lə Kirisi gə ta naa gə Luba le ang.

⁵ Bənəng ang baa, mbərə tar gə j-ila le ɔji dɔ sijee ang, ngaa Jeju kirisi gə to Mbayɓe ɓa j-ila mbər-e. Ngaɓa sijee j-o rɔ-sijee gə ɓərəje lə-sisəy mba Kirisi.

⁶ Mba Luba gə nje pa na: May kar lokarə ndogo dan cil ciməri gə, ꞌne le ja ɓa ndogo mə-sijee gə mba kar j-inga ne negərə gə unja ngadə ɔji dɔ riɓar lə-a gə ndogo ta kəm Jeju Kirisi gə.

⁷ Ngaa nebaw gə nee le, sijee j-odo darɔ-si gə to jo anji gə mba kar singamongə gə asə kuwa kɔji ne mar-ɛ ang nee le to ne kar Luba ɓo to singamongə lə-sijee ang baa.

⁸ Ne singaje dang-dang ce dɔ-si gə ja, ngaa guru singa-si ang. Mə-sijee gangə man ja, ngaa j-ila kasə ang.

⁹ D-ula kəm-si ndoo ja ngaa Luba ḭya̰ si ang. ꞌLagə-si ja, ngaa ꞌbusu-si ang baa.

¹⁰ J-un yo Kirisi dɔ-si gə gə ndɔje tɔ̰y, mba kar darɔ-si tɔji kisi kəm baa lə Jeju gə ɗaga ngadə.

¹¹ Mba sijee gə j-isi kəm baa le, j-a to ta yo gə gə ndɔje tɔ̰y mba Jeju, mba kar kisi kəm baa lə Jeju kila rɔ-ɛ gə ɗaga darɔ-si gə a kuy.

¹² Be ɓa yo o̰ ne ɓe dɔ sijee gə, ngaa sisəy ɗaa, təbə uru gada mə-si gə.

¹³ Kəji takagə lə-si le to kara baa gə ye gə ꞌɗa mə mbede gə na: M-ta kagə, gəl-e gə ne ɓa m-pa ne tar. Sijee kara, ja takagə, gəl-e gə nee ɓa ja pa ne tar.

¹⁴ Sijee ja gərə to gə nje kar Mbayɓe Jeju uy ɓa ndol le a kar-sijee j-uy ɓa ja ndol gə Jeju naa gə kara baa, ɗaa n-a kar-si j-ar-je naa gə no-ɛ gə.

¹⁵ Be ɓa neje tɔ̰y gə ce dɔ sijee gə le, ce mba sisəy, mba kar mənuji ɗa kula mə dəwje gə bula, ngaɓa kar bula bo dəwje ꞌtəl ne gə oyo, gə d-ila ne riɓar dɔ Luba gə.

Kəy kisi gə a to no

¹⁶ Gəl-e nee ɓa, sijee j-ila kasə ang. Ngaa to gə ɓo da kasə rɔ-si gə ɗaga tuji kara, təbə gə to mə-si gə le a təl to sigi gə ndɔ gə ndɔ.

¹⁷ Mba nekəmandooje gə ɗa si dɔ ndɔ gə ɓisine nee le, kur-e a kəw ang, ngaɓa ɔlɛ pɛl-pɛl baa, gə asə kuwa kɔji ne riɓar gə ndɔ gə ndɔ gə to gə ndər-e baa, gə nekəmandooje nee gɔl ɔji dɔ-si.

¹⁸ Neje gə kəm dəwje o ɓa sijee ja tɔsə kəm-si kəne ang baa, ngaa neje gə kəm dəwje o ang; neje gə kəm dəwje o le a nday, ngaa neje gə kəm dəwje o ang le to gə ndɔ gə ndɔ.