2 Corinthiendjé 13 - Mbede Lə Luba Kone Gə Sigi

Ndəjije gə ko naa

¹ M-aw gə ɓə lə-si gə njekum gə gɔl munda ngaa. Neje tɔ̰y j-a gɔl gə go tar naji lə dəwje joo ose munda.

² Logə m-ga̰ ne horo-si gə gə njekum gə gɔl joo ja m-pa tar-ɛ nam, ngaɓa ɓogəne m-godo horo-si gə kara m-təl m-pa ja cibi m-ar nje gə kede, ꞌto gə njeneɗaje gə kṵra̰y ngaɓa gə nje gə kɛm ja tɔ̰y: To gə ɓo m-ce ɓə lə-si nama m-a kɔr kəm dəw ang.

³ Mba sisəy ꞌsangəje ne gə tɔji to gə Kirisi pa tar ɗəw gə lə-m ɗaa, ꞌne gə n-ɗa kula rɔ-si gə le n-mbɔrɛ ang, ngaa n-tɔji singamong-e horo-sisəy gə.

⁴ Mba ꞌɓər-e kagə dəsə gə mba mbɔr-ɛ lə-a, ngaa n-aw kəm baa gə go singamongə lə Luba; sijee kara ja mbɔr-ɛ ɗəw gə lə-a tɔ, ngaa j-a kaw sə-a kəm baa mba sisəy ɗəw singamongə gə lə Luba.

⁵ May kar ꞌtənje mə-sisəy ja so-so oje, se uwaje takagə gədərə ja wa? ꞌNaje darɔ-sisəy ja oje. ꞌGərəje to gə Jeju Kirisi ga̰ mə-si gə ang wa? Ose na mə lə-sisəy le tɔji ne gə baa wa?

⁶ Kar-sijee le ɗaa, ja njigi tɔji kar-si a gərəje to gə sijee le j-asə mbagə ja.

⁷ J-a dəji Luba mba kar ꞌɗaje ne gə kṵra̰y kara ang, mba kar tɔji ne to gə kudu tar lə-sijee arə ang, ngaa mba kar ꞌɗaje ne ne gə may ta kəm dəwje gə, le na mə gə ɔji dɔ sijee unda ne rɔ-ɛ gə ne gə baa.

⁸ Mba ne kara gə ja kasə ɗa gə tar gə tɔgərɔ godo; ngaa kula ja baa ja ɗa mba tar gə tɔgərɔ.

⁹ Logə sisəy ubaje singa ɓa singa sijee godo le, j-a ɗa rɔləl, ngaɓa ne gə ja njinga lo dəji Luba gə lə-sijee to gə may pɛdə lə-sisəy tɔ.

¹⁰ Gəl-e gə nee ɓa, m-godo ɓi ja m-ɗa mbede nee le mba kar logə m-a ce nama, m-ɗa m-ar kədərə ang, gə go singa gə Mbayɓe ar-m ɓa tɔji-si ne kar-si awje ne kəm-si gə kede ɓo mba tuji-si ne ang.

¹¹ Be ɓa, ngan ko̰-mje, ɗudu tar ɗaa, ꞌɗaje rɔləl, awje gə dɔ-si gə may pɛdə, gə ꞌkulje mə naa, ar-je kəji lə-si to kara baa, awje dan ɗɛgɛgɛ gə, ngaɓa Luba gə nje gəl njigi gə nje gəl ɗɛgɛgɛ a nay gə si.

¹² Oje naa gə yo gə nee, ꞌtoje mbi naa pu-pu gə rɔsangə. Njerɔsangəje tɔ̰y ja na m-o-si m-ar-je.

¹³ May kar mənuji lə Mbayɓe Jeju Kirisi, njigi lə Luba ngaɓa mə kara lə Njil Njerɔsangə nay gə si tɔ̰y!