2 Corinthiendjé 12 - Mbede Lə Luba Kone Gə Sigi

Ne gə Pɔl o lokiya gə gə ne ꞌkila gəl-e d-ar-ɛ

¹ Kəm kɔsə rɔ ja wa? Tɔgərɔ ja, may lə-a godo. Ngaa m-a pa tar neje gə m-o lokiya gə gə neje gə Mbayɓe kila gəl-e ar-m.

² M-gərə dəw kara gə to njetakagə Kirisi, gə asə ɓal dɔg gə gir-e gə sɔɔ ja ngaa, d-un-e d-aw sə-a saar mə dara gə njekum gə munda gə, d-un-e gə darɔ-ɛ ja ose to gə njil-e ɓa d-un kara, Luba ɓa gərə.

³ Ngaɓa m-gərə to gə dəw nee le d-un-e d-aw sə-a dara ja, ngaa d-un-e gə darɔ-ɛ ose njil-e wa? Luba ɓa gərə;

⁴ d-un-e d-aw sə-a gə dara ngaɓa n-o tarje gə dəw asə pa ang, gə d-ɔgə ɗəw kar dəw pa.

⁵ M-a kuwa dəw gə to gə be ɓa kɔsə ne rɔ-m, ngaa ɔji dɔ ꞌma nama, tɔgə godo lə-m ɓa m-a kɔsə ne rɔ-m.

⁶ To gə ɓo m-njigi kɔsə rɔ-m nama, a to gə kəsə tar ang, mba m-a pa tar gə tɔgərɔ; ngaa m-ɔgə rɔ-m dɔ-ɛ gə, na dəw a kḭ ko-m gə dəw to ɓəəl ya̰ unda ne gə o-m lo ɗ-ɛ gə, ose tar gə o ta-m gə.

⁷ Ngaa mba kar m-ɔsə rɔ-m ɔji dɔ neje gə may ya̰ gə ꞌkila gəl-e d-ar-m le ang ɗaa, d-ula rɔko̰ kara rɔ-m gə, gə ngon njekula lə ꞌSu mba kar tɔsə-m təbə taar-taar mba kar m-ɔsə nee rɔ-m ang.

⁸ Gɔl munda ja m-ɗa Mbayɓe kɔgərɔ kar ɔr-ɛ rɔ-m gə gə ɗangə,

⁹ ngaa n-ila-m kəne na: Mənuji lə-m ja as-i mbagə, mba ɗəw tɔgə godo gə ja ɓa m-tɔji ne singamongə-m. Be ɓa tɔgə godo ja ɓa m-a kɔsə ne rɔ-m, mba kar singamongə Kirisi dəbə ne dɔ-m gə.

¹⁰ Gəl-e gə nee ɓa rɔ-m lələ-m dɔ tɔgə godo gə, dɔ tajije gə, dɔ ndoo neje gə to-m gə, dɔ kula kəm ndoo gə, dɔ nekəmandooje gə gə ɔji dɔ Kirisi, mba logə tɔgə-m godo ja ɓa m-uba singa ɓi.

Neje gə Pɔl njigi ang gə neje uwa m-e

¹¹ M-pa tar to gə dəw gə təl mbə be, sisəy ja ɓa ɔsə-mje ila-mje kəne. Mba sisəy le ja ɓa a paje tar taje ne dɔ-m ang wa? M-to ne ang tɔgərɔ ja, ngaa ne kara ja gə njeka̰ykulaje gə d-o rɔ-je gə dəwje gə to ɓəəl ya̰ nee le nday-m ne godo.

¹² Neje gə tɔji to gə m-to njeka̰ykula gə ngadə le, sisəy oje gə ɗəw kula gə horo-si gə gə go kuwa gədərə dan nena gə, ɗəw netɔjije, ɗəw neje dang-dang gə kəm dəw o ndɔ kara ang ngaɓa gə ɗəw nemisije gə tɔ.

¹³ Ɗi ɓa sisəy ꞌtoje ne dang gə Mbo̰ naa lə njetakagəje gə kɛm wa? To gə m-to nekodo dɔ-si gə le ja baa ang wa? Ɔrəje tar neɗa gə dɔ buguru gə m-ɗa dɔ-m gə.

¹⁴ Oje, m-ar dɔ gɔl-m gə mba kaw gə ɓə lə-si gə gɔl munda lə-a ngaa, ɗaa m-a to nekodo dɔ dəw gə ang; mba ne gə mə ji-si gə ɓa m-sangə ang ngaa darɔ-sisəy ja. Be ɓa to tar lə nganje ɓa mba kar ꞌɓər ne mba nje kuji-jeje ang ngaa to tar lə nje kuji nganje mba kar ꞌɓər ne mba nganje.

¹⁵ Ɔji dɔ-m ꞌma ɗaa a to nerɔləl lə-m mba kar m-a tuji ne dɔ-si gə nəm ngaɓa darɔ ꞌma ja kara m-a nunga kadə mba təbə lə-si. To gə ɓo m-njigi-si al dɔ lo be le, sisəy a njigi-mje njɛ̰ baa ja wa?

¹⁶ Tɔgərɔ ja, m-to nekodo dɔ-si gə ang, ngaa, na m-to ꞌbaburu ɗaa m-unda gusu baa m-ula ne mbə dɔ-si gə!

¹⁷ Se nje gə m-ula-je ɓə lə-si le, m-un dəw kara m-ula ne mbə dɔ-si gə ja wa?

¹⁸ M-ndəji Titə m-ar-ɛ aw ɓə lə-si, m-ar ngon ko̰-si kara aw sə-a, ɗaa Titə ngaɓa ula mbə dɔ-si gə wa? Ja nja gə kəji kara baa, gə ɗəw gə kara baa ja ang wa?

¹⁹ Ləw baa ja le, sisəy əjije to gə j-aw sangə mba to gadə-gadə no sisəy gə. Sisəy gə ja njigi-si ya̰ le, sijee le ja pa tar no Luba gə, gə no Kirisi gə mba kar takagə lə-sisəy mongə ne.

²⁰ Mba m-ɓəəl mba kar logə m-ce ɓə lə-si nama, m-inga-si to gə m-njigi le ang baa, ngaɓa sisəy kara kar inga-mje to gə ꞌnjigije le ang tɔ; m-ɓəəl mba kar neje gə to nee a kḭ to: Mbadə tar ta naa gə, nər mə, wungu mbə, kəji mə bo, pa gə naa, pa tar gə to, kunda kar ngaɓa neje gə wɔr-wɔr.

²¹ M-ɓəəl mba logə m-a ce ɓə lə-si nama Luba a kḭ kila rɔ kul dɔ-m gə mba sisəy, kar man no a ndogo-m ɔji dəwje bula gə kede ꞌto nje gə ɗa neɗaje gə kṵra̰y, ɗaa ꞌturu kəji lə-je dɔ ne gə mina gə ang nəm, gə dɔ kaya gə ang nəm ngaɓa dɔ to bula njagəda gə ang nəm tɔ.