2 Corinthiendjé 1 - Mbede Lə Luba Kone Gə Sigi

Ko naa gə tɔji rɔ

¹ ꞌMa Pɔl, njeka̰ykula lə Jeju Kirisi gə go mə njigi lə Luba, je gə ngon ko̰-si Timoce j-a ɗa mbede nee j-ar Mbo̰ naa lə njetakagəje gə mə ɓe gə Kɔrɛnt, ngaɓa gə njerɔsangəje gə dɔ nangə gə Akayi tɔ̰y nəm tɔ.

² May kar mənuji gə ɗɛgɛgɛ lə Bɔ-sijee Luba je gə Mbayɓe Jeju Kirisi nay gə si.

³ May kar ndu tɔr to kar Luba, gə Bɔ Mbayɓe lə-si Jeju Kirisi gə to Luba gə njeməmay gə njekuul mə dəwje.

⁴ ꞌNe gə n-kul mə-sijee dan ꞌməsərəje gə lə-sijee tɔ̰y, mba kar nekul məje gə sijee j-inga rɔ Luba gə le, sijee kara j-asə kul ne mə dəwje gə d-isi dan ꞌməsərəje gə dang-dang!

⁵ Be ɓa, ɗəw kara baa to gə j-o ko̰ ne gə Kirisi ya̰ le, Kirisi kara to gə be ja tɔ ɓa kul mə-sijee gə dɔ mar-ɛ gə dɔ mar-ɛ gə.

⁶ To gə ɓo j-o ꞌməsərə nama, j-o ꞌməsərə mba kar uwaje ne gədərə dan ꞌməsərə gə ngaɓa gə mba kar ingaje ne kaji nəm tɔ. To gə ɓo mə-sijee kul nama, ye nee le to gə nekul mə lə-sisəy gə a kar-si singa mba kar uwaje ne gədərə dan ꞌməsərə gə kara baa gə sijee kara j-o tɔ.

⁷ Ngaɓa j-uwa ne kunda mə lə-sijee gədərə j-ɔji ne dɔ sisəy mba ja gərə to gə ꞌməsərəje gə oje gə sijee le, ingaje ne nekul mə naa gə kara baa gə sijee tɔ.

KULA NUJI GƏ TO HORO PƆL GƏ GƏ NJE GƏ KƆRƐNT Nejɔgəje gə nday

⁸ Ngan ko̰-m, j-a njigi mba kar-si isije dɔ mbə gə ɔji dɔ ꞌməsərə gə ce dɔ sijee gə dɔ nangə gə Aji gə ang. Kəm-si gə d-ula ndoo, cɛdə gɛ̰ngərɛ̰ sijee ɓəgəgə ar al dɔ singa-si ar-si j-unda mə-si to gə j-a kisi kəm baa be ang.

⁹ Ngaa sijee le, j-a gərə to gə ꞌgangə tar kuy dɔ-si gə ngaa, ngaa to to gə be mba kar-sijee j-unda ne mə-si dɔ rɔ-si gə ja baa ang, ngaa gə mba kar j-unda ne mə-si dɔ Luba gə nje ndol nje gə d-uy ja kara baa.

¹⁰ ꞌNe gə n-ta si ta yo gə to ɓəəl ya̰ gə nee le, n-a ta-si t-ɛ gə ja ɓi. Oyo, ꞌne ja ɓa j-unda mə-si dɔ-ɛ gə ɗaa n-a ta-si ɓi.

¹¹ Sisəy ja kara ꞌlaje gə si dɔ-ɛ gə ɗəw dəji Luba gə tɔ. Be ɓa mənuji gə sijee j-a kinga ɗəw dəji Luba gə lə dəwje bula ɔji dɔ-si le, a təl to ne gə dəwje bula d-a kar ne Luba oyo mba sijee.

¹² Mba gəl ne gə sijee j-unda ne kar-si le, to gə tar naji gə mə kəji lə-si gə to nee: sijee ja nja pa nja gə horo dəwje gə dɔ nangə gə nee, ngaɓa horo-sisəy gə ja dɔ ngɔ, gə kɔsə rɔ ang, ngaɓa gə karə ngadə gə ḭ rɔ Luba gə; ɗaa mənuji lə Luba ɓa ɔr no-si ɓo kəm karə gə darɔ gə ang

¹³ Mba ja ɗa ne gə ɗangə mə mbedeje gə j-ar-si, j-unda mbo kar ye gə sisəy ꞌturaje ose ꞌgərəje le ang. Ngaɓa m-unda mə-m to gə saar lo tɔl t-ɛ gə nama, a gərəje gəl-e ngadə ja ɓi,

¹⁴ to gə sisəy ꞌgərəje tar gə ɔji dɔ sijee njɛ̰ ɗɔdə le, sijee ja to gə ne kunda kar lə-sisəy ɗəw kara baa to gə sisəy kara ꞌtoje ne kar-sijee dɔ ndɔ gə lə Mbayɓe Jeju.

¹⁵ M-gərə tar-ɛ gə maj-ɛ ngaa nee ɗaa, m-njigi ce gə ɗəw dɔ-si gə kede, mba kar ingaje ne mənuji gə njekum gə joo.

¹⁶ Ɗaa, m-a kḭ kaw ɓə lə-si Masedowan, ngaɓa m-a tɔl t-ɛ ɗaa, m-a kḭ Masedowan təl ɗe ɓə lə-si gugu mba kar ꞌlaje sə-m ar-mje m-aw Jude.

¹⁷ Ndu-m gə m-un to gə be nee le se, to gə ne m-ɗa baa gə nangə əng wa? Ose ndu-m gə m-un le, m-un ɗəw darɔ gə baa mba kar tar lə-m to gə oyo ngaɓa ə̰ə̰ə̰ ɓi wa?

¹⁸ No Luba gə njeneɗa gə dana gadə le, tar gə sijee ja pa j-ar-si le to gə oyo ngaɓa ə̰ə̰ə̰ ang baa.

¹⁹ Be ɓa, Ngon lə Luba Kirisi Jeju gə ꞌma, gə Silibɛ̰ gə Timoce j-ila mbərə lə-a horo-si gə le to oyo gə ə̰ə̰ə̰ ang baa, ngaa n-to oyo ja kara baa.

²⁰ Neje tɔ̰y gə Luba uwa dɔ gɔl-ɛ le to oyo ɗəw gə lə-a. Ngaɓa, ɗəw gə lə-a ɓa j-a ɗa ne Luba oyo j-ila ne riɓar dɔ-ɛ gə.

²¹ Dəw gə ula jingaw mə-sijee gə, gə mə-sisəy gə ɗəw gə le Kirisi ngaɓa uwa dɔ sijee gə ubu le to Luba.

²² N-ɔsə bəngə ji-a rɔ-si gə ngaɓa n-ar Njil ta mə-sijee to gə nemayje gə d-ɔsə kɔrə mba sijee.

²³ ꞌMa ɗaa, m-ɓar Luba gə njetar naji lə-m m-uwa ne naji dɔ-m gə. M-təl m-aw Kɔrɛnt gə ang mba m-njigi jɔgə si ang.

²⁴ To kisi ɓa j-isi gina-si gə ɔji dɔ takagə lə-si ang, ngaa sijee ja njigi kore gə sisəy naa gə dɔ rɔləl gə lə-si mba uwaje takagə lə-si gədərə.