1 Timoce 6 - Mbede Lə Luba Kone Gə Sigi

¹ Dəwje tɔ̰y gə jugu ɓərə to gɔbə-je gə le, may kar je d-ula dɔ-je d-ar ꞌɓəə-jeje ɓa gə mba kar dəwje taji ne ri Luba ang, ose taji ne nendo gə ꞌtɔji-je le ang tɔ.

² Ngaa ɓo ɓərəje gə ꞌɓəə-jeje ꞌto gə njetakagəje nama, may kar d-ila ngon kuji dɔ-je gə mba ꞌto ngan ko̰ naaje gə mə Njil gə. Ngaa may kar ꞌɗa kula gə singa-je d-ar ꞌɓəə-jeje, mba ꞌɓəə-jeje ꞌto njetakagəje gə Luba njigi-je tɔ. Ɓo mba to gə ꞌto gə ngan ko̰ naa gə mə Kirisi gə baa ang. Ye ɓa to neje a tɔji ngaɓa a kula ne jingaw mə-je gə.

Njigi nekinga to yo

³ To gə dəw gə ɗa-ɗa ɓa tɔji ne gə dang baa ose nja mə tar gə lə Mbayɓe Jeju Kirisi, ose nja gə go nendo gə ɔji kila kuji dɔ ne gə lə Luba ang nama,

⁴ n-to dəw gə kunda kar tɔ kəm-e, n-gərə ne kara ang, n-to njema̰y tar ngaɓa n-to nje ndo̰ro̰ tar cibi tɔ. Ye gə nee le ɓa uji kəm kə̰y, tḭ naa, taji kil, nani,

⁵ ma̰y tar gə sṵra̰ godo horo dəwje gə kəji negərə lə-je uy mbudugu, ar tar gə tɔgərɔ godo mə-je gə, ngaɓa d-o tar kila kuji dɔ ne gə lə Luba to gə ɗəw nekuga dɔ ji lə-je.

⁶ Tɔgərɔ ja, kila kuji dɔ Luba gə to ngira nekuga dɔ ji ja to gə j-ɛm mə-si dɔ ne gə to ji-a gə.

⁷ Ngaa ɓo, j-a ɗe dɔ nangə nee gə ji-si baa, a ɓo kar-ɛ asə nama j-a təl bənəng ja tɔ.

⁸ To gə ɓo, j-aw gə nekusa ta-si ngaɓa j-aw gə kubu kula-si nama asə-si mbagə.

⁹ Ngaa, dəwje gə nekinga asə-je ang le d-oso dan kərə gə, dan bandə gə ɓo neje dang-dang gə ɔsə dəwje um-je lo tuji gə.

¹⁰ Gəl-e gə nee ɓa, ngira ne gə kṵra̰y tɔ̰y to njigi lar, dəwje bula gə d-un rɔ-je d-ila kəne le, ꞌtusu takagə lə-je d-ḭya̰ ngaɓa d-oso dan tuji gə badagə tɔ.

¹¹ ꞋI dəw lə Luba le, may kar a̰y neje nee le. May kar ꞌsangə ne gə gadə-gadə, ɗəw kila kuji dɔ ne gə lə Luba, takagə, njigi, kuwa gədərə ngaɓa gə mə gə kul lom.

¹² ꞌƊɔ ɗɔ gə may kar takagə, uwa təbə gə gə ndɔ gə ndɔ gə Luba ɓar-i kəne, ye gə ꞌpa tar-ɛ no njetar najije gə bula.

¹³ ꞌMa, m-un ndu-m m-ar-i no Luba gə to nje kar neje tɔ̰y, təbə ngaɓa no Jeju Kirisi gə pa tar naji lə-a no Po̰s Pilad gə,

¹⁴ ꞌngom ndu gə arə ngadə nee le ɔji dɔ-i ja mba kar dəw ila ne tar dɔ-i gə ang saar ndɔ gə Mbayɓe lə-si Jeju Kirisi a təl ne,

¹⁵ dɔ kar gə Luba ɓa a kɔji. ꞌNe gə kəm kɔsə gaji-ɛ cibi to gə dəw dɔ rɔ-ɛ gə a kɔji kar-ɛ baa, Mbay lə mbayje, gə Mbayɓe lə mbayɓeje,

¹⁶ ꞌNe gə kar-e baa n-to Njekuy ang, ꞌNe gə n-isi dan ndogo gə dəw ila gɔl-ɛ kəne ang. Lo gə dəw o ang ngaɓa dəw a kasə ko ang nəm. Riɓar gə singamongə gə ndɔ gə ndɔ to gə k-ɛ. Oyo.

¹⁷ ꞌNdəji bawje gə dɔ ndɔ gə ɓogəne mba kar d-unda kar-je ang, ngaɓa mba kar d-unda mə-je to dɔ nekinga gə a nday gə ang, ngaa d-unda mə-je dɔ Luba gə. ꞌNe gə to nje kar-si ne gə j-aw ndoo-e gə kobəre mba kar j-a ɗa ne rɔləl.

¹⁸ Ula-je mba kar-je ꞌɗa may, mba kar ꞌto baw neɗaje gə may. D-un ne d-ar gə məmay ngaɓa d-a to gə njekay ne dəwje pə-pə.

¹⁹ Be ɓa, d-a mbo̰ ne nekinga gə lo gə may gə bara mba kinga ne təbə gə tɔgərɔ.

²⁰ ꞋI Timoce, ngom neje tɔ̰y gə d-um ji-i gə, iya̰ go tar gə baa, gə tar gə aw naa gə gə tar lə Luba ang, gə tar ma̰y kar negərə gə baa.

²¹ Nje gə kɛm gə d-un go negərə baa nee le, ꞌtusu takagə lə-je d-ḭya̰. May kar mənuji lə Luba nay gə si!