1 Timoce 4 - Mbede Lə Luba Kone Gə Sigi

Nduje gə Pɔl ar Timoce

¹ Be ɓa Njil pa arə ngadə ja na: dɔ ndɔ gə gugu le, dəwje gə kɛm d-a tusu takagə lə-je kḭya̰ mba kuwa go kəji gə baa nəm gə netɔjije lə njilje gə kṵra̰y.

² Tar mula lə njeɗəgərəje gə d-unja ndəji kəji lə-je gə du.

³ D-ɔgə dəwje lo ta naa gə jingaw gə jene, d-ɔgə kar d-usa neje gə kɛm, nekusaje tɔ̰y nee le Luba ja ɗa. A ɓo, njetakagəje gə gərə tar gə tɔgərɔ tɔr nduje dɔ-ɛ gə nama d-a kusa gə oyo.

⁴ Tɔgərɔ, neje tɔ̰y gə Luba ɗa le to ne gə may ja. Ne gə kar mbadə godo, ngaa ɓo Tar gə May ja ꞌɓar dɔ-ɛ gə nama d-a kusa gə oyo,

⁵ mba tar lə Luba gə dəji Luba le ꞌtogo-e nam ngaa.

⁶ To gə ɓo ꞌi tɔji tar nee le no ngan ko̰-ḭje ɗaa, ꞌi a to njekula lə Jeju Kirisi gə horo njetakagə gə gə maj-ɛ, Ye ɓa ꞌi a tɔji to gə tar takagə gə nendo gə tɔgərɔ gə ꞌi ndoo le ɗusu mə-i.

⁷ Əw rɔ-i kunda mə-i dɔ tar gə baa gə gə ɓuga jeneje d-aw tura rad-rad. May kar ꞌi ja ila kuji dɔ ne gə lə Luba.

⁸ May kḭya̰ rɔ-i mə ji Luba gə, mba kula rɔ ndubu may ja ngaa, kila kuji dɔ ne gə lə Luba may unda neje tɔ̰y, be ɓa Luba gɔl təbə gə ɓogəne gə ye gə bara ar dəw gə ḭya̰ rɔ-ɛ mə ji-a gə.

⁹ Tar nee le to tar gə tɔgərɔ ja ɗaa may ta kum mə dɔ gə:

¹⁰ to gə ɓo ja ɗaje kula gə singa-si cibi ja ɗɔje mba j-unda mə-si dɔ Luba gə nje kisi kəm baa gə nama, ꞌne gə n-to Njekaji dəwje tɔ̰y, ngaa njetakagəje ja ɓa.

¹¹ Ye ɓa to ndu gə ꞌi a kun kar-je ngaɓa to tarje gə ꞌi a ndoje.

¹² May kar dəw dab-i dasəra dɔ basa̰ gə lə-i ang; ngaa may kar-i ꞌto ne kɔji mar-ɛ mba tar lə njetakagəje, ɗəw tar pa gə, ɗəw pa nja gə, ɗəw njigi gə, ɗəw takagə gə, gə ɗəw ngom rɔ gə.

¹³ Kede nam ɓa kar-m m-ɗe m-inga-i ɗaa, ula rɔ-i mbiriri lo tura Mbede gə lə Luba, lo kula jingaw mə-je ngaɓa lo netɔji gə tɔ.

¹⁴ Əw rɔ-i ndam gə gusu mənuji gə aw nee, ye gə Luba ar-i ɗəw gə pajambərəje pa nee tar-ɛ dɔ ndɔ gə ngatɔgəje d-ila nee ji-je dɔ-i gə.

¹⁵ Iya̰ rɔ-i yag mə kula gə nee mba kar dəwje d-o kand-e

¹⁶ May kar-i ngom rɔ-i ngaɓa ngom nendo lə-i. Ore kəm-i kəne. Ngaa ɓo, ꞌɗa be nama, ꞌi a kaji rɔ-i nəm ngaɓa nje gə d-o tar ta-i gə nəm tɔ.