1 Timoce 2 - Mbede Lə Luba Kone Gə Sigi

Dəji Luba mba dəwje tɔ̰y

¹ Dɔngɔr kede ɗaa, m-dəji neje gə nee: may kar ꞌdəjije Luba, ꞌpaje sə-a tar, ꞌɗaje ndoo rɔ-ɛ gə nəm, ngaɓa ꞌɗaje oyo Luba mba dəwje tɔ̰y,

² mba mbayje, gə nje gə d-um ɓeko̰ mə ji-je gə mba kar j-isi nee gə dɔ si taar ɗɛgɛgɛ gə mə kul lom, gə kila kuji dɔ Luba gə nəm ngaɓa ɗəw pa nja gə gə maj-ɛ tɔ.

³ Ye gə nee le ɓa to ne gə may ngaɓa to ne gə to ngira rɔləl lə Luba, Njekaji-si.

⁴ ꞌNe gə n-njigi kar dəwje tɔ̰y d-inga kaji ngaɓa kar dəwje ꞌtəl gərə tar gə tɔgərɔ.

⁵ Gəl-e gə nee ɓa, Luba le kara baa. Ɗaa, njekar horo dəwje gə gə Luba le kara kara baa tɔ, n-to dəw, Kirisi Jeju,

⁶ gə iya̰ rɔ-ɛ to nekuga dɔ dəwje. Ye ɓa to tar naji gə Luba tɔji dɔ kar gə Luba ɔji.

⁷ Kudu tar-ɛ gə nee le ɓa, Luba təl-m ne to gə njetɔji tar ngaɓa to njeka̰ykula, mba kar m-tɔji tar dəwje gə ꞌgərə Luba ang ɗəw takagə gə ɗəw tar gə tɔgərɔ gə. M-pa tar gə tɔgərɔ ɓo m-ɗəgərə ang.

⁸ Be ɓa, m-njigi kar dəwje pa tar gə Luba gə lo tɔ̰y, d-odo nee ji-je gə may tɔ̰y gə dara. D-a ɗa gə wungu ang nəm ngaɓa d-a kaw gə kəji tɔsə tar ang nəm tɔ.

Kula gə jeneje d-a ɗa

⁹ Ɗəw kara baa, may kar jeneje d-ula kubu lə-je gə maj-ɛ. D-a kula kubu gə a kila kuji dɔ-je gə, cibi d-a kuwa dɔ gə bar-ɛ yaw ɓo d-a kula ne mbi maa ang nəm gə d-a kum mər ngɔbəje gə ang, ngaɓa d-a kula kubuje gə gə go ɗəb-e ɓa.

¹⁰ Ngaa d-a tɔji mandə lə-je gə go ɗəw kula ɗa-je gə gə maj-ɛ. Ye ɓa to gə ndu kun lə jeneje gə d-ila kuji dɔ Luba gə.

¹¹ May kar jene ndo ne t-ɛ munduru baa, gə kəji kula dɔ.

¹² M-un ɗəw m-ar jene kar tɔji ne ose o̰ dɔ jingaw ang. To tar lə-a kar n-isi t-ɛ munduru baa.

¹³ Gəl-e gə nee le ɓa, Luba ɗa Adam kede nam ɓa, ɗa Ɛbə ɓi.

¹⁴ Cibi, to Adam ɓa ꞌSu ər-e ang, ngaa jene ɓa oso dan nekərə gə ɗaa n-mbadə ne torondu Luba.

¹⁵ Be ja kara, n-a kinga kaji ɗəw gə lə nganje gə n-a kujije, to gə n-ngom takagə gə n-njigi dəwje, sangə rɔ-ɛ ngaɓa n-ɗa ne gə mə Luba njigi.