1 Timoce 1 - Mbede Lə Luba Kone Gə Sigi

Ko naa

¹ ꞌMa, Pɔl gə Kirisi Jeju ɗa-m gə njeka̰ykula lə-a, gə go ndu lə Luba Njekaji-si je gə Kirisi Jeju gə to ne kunda mə dɔ gə lə-si,

² ɓa m-ɗa mbede nee m-ar-i, Timoce, ꞌi gə m-o-i to gə ngon njigi lə-m gə tɔgərɔ gə ɗəw takagə gə. M-dəji Luba gə Bɔ je gə Kirisi Jeju gə to Mbayɓe lə-si mba kar d-ar-i mənuji, ꞌɗa sə-i məmay ngaɓa d-ar-i ɗɛgɛgɛ tɔ.

Pɔl aw pa tar nendoje gə may ang ar Timoce

³ To gə m-pa nee m-ar-i, isi mə ɓe gə Epɛs mba kɔgə dəwje gə kɛm ɗəw tɔji nendo gə ɗangə ang, to gə m-pa nee m-ar-i kede nam ɓa kar m-ɔdə m-aw ne dɔ nangə gə Masedowan le.

⁴ Ulaje ar d-ḭya̰ kɔr suje ose gə tura gəl kuji dəwje mba to ne gə a ɗe gə tar ma̰y ja baa horo-je gə ɓo a kɔsə kudu kula lə Luba gə go ɗəw takagə ang baa.

⁵ ꞌI a kun ndu nee le mba kar dəwje njigi naa gə yoo gə nee, njigi gə ḭ mə gə arə ngadə, kəji gə to gə maj-ɛ ngaɓa gə takagə gə tɔgərɔ.

⁶ Lo gə nje gə kɛm d-ḭya̰ ɗəw gə nee le ɗaa, d-al d-uru dan ma̰y tar gə baa gə.

⁷ ꞌƊaje rɔ-je to gə njekɔr gəl toronduje lə Moyijije ngaa ꞌgərəje mə tar gə d-aw tɔji ang nəm, ngaɓa ꞌgərə gəl tar gə d-aw pa gə singa le ang nəm tɔ.

⁸ Ngaa J-a gərə-je gə maj-ɛ to gə torondu le may ja logə dəw ɗa nee kula gə go ɗəb-e,

⁹ ngaɓa j-a gərə-je to gə Luba un torondu le mba dəw gə gadə-gadə ang. Ngaa n-un torondu nee le mba njekal tarje, nje dɔ ngangəje, njeməndulje gə njeneɗaje gə kṵra̰y, dəwje gə ꞌɓəəl Luba ang, dəwje gə ꞌɓəəl ne le Luba ang, nje tɔl bɔ-jeje gə ko̰je-je ngaɓa gə nje tɔl dəwje,

¹⁰ bula jagədaje, jingawje gə njeto gə naaje gə jeneje gə njeto gə naaje, dəwje gə njeɗabə ɓərəje, njeɗəgərəje, njetuga najije ngaɓa mba dəwje gə ɗa ne gə tila kəm nendo gə tɔgərɔ.

¹¹ Nendo nee le to Tar gə May kar riɓar lə Luba, gə kɔsə gaji to dɔ-ɛ gə, Luba um ji-m gə to gə tɔgərɔ.

¹² M-ar oyo Kirisi Jeju, Mbayɓe lə-si gə ar-m singa ngaɓa tura-m gə dəw gə gadə-gadə ɓa ɓar-m mə kula gə lə-a,

¹³ dɔ ndɔ gə kede le, ꞌma, m-to njetaji Luba, m-to nje ɗa singa gə njetakagəje ngaɓa m-to nje kula kəm-je ndoo nəm tɔ. Ɗaa Luba ɗa sə-m məmay nəm mba m-ɗa ne dɔ mbə gə baa, gə məkədərə baa ja tɔ.

¹⁴ Ngaa mənuji lə Mbayɓe lə-si gə ɔji dɔ-m le al dɔ-m, m-ta kag-e ngaɓa m-inga njigi ḭ rɔ Kirisi Jeju gə nəm tɔ.

¹⁵ Tar gə tɔgərɔ gə kəm ta ji joo le ɓa nee: Jeju Kirisi le ɗe dɔ nangə gə nee mba kaji njeneɗaje gə kṵra̰y, ɗaa ꞌma ja m-to dɔngɔr dəw to gə tɔgərɔ.

¹⁶ Ngaa Ye gə be ɓa, Luba ɗa sə-m məmay mba kar ꞌma gə to dəw gə dɔngɔr le, Jeju Kirisi tɔji kore mə ndəng lə-a dɔ-m gə. Ye ɓa a to ne kɔji mar-ɛ kar nje gə d-a ta kag-ɛ mba kinga nee təbə gə gə ndɔ gə ndɔ.

¹⁷ May kar dəwje tɔ̰y gə dɔ nangə nee d-ila kuji dɔ Luba gə, ngaɓa d-ila riɓar dɔ-ɛ gə gə ndɔ gə ndɔ. N-to Mbay gə Njeko̰ ɓe gə isi kəm baa, gə uy ang, gə dəw o-e ndɔ kara ang, N-to Luba gə kara baa ɗəgədə! Oyo.

¹⁸ Ngon-m Timoce, tar ndəji gə m-a pa kar-i ɓa nee, to tar ndəji gə aw ɗəw kara baa gə tar gə pajambərəje pa ɔji dɔ ndo-ɛ gə kede le. Ye ɓa a kula jingaw mə-i gə kar ꞌɗa nee ɗɔ kəm ngon gə jingaw,

¹⁹ kar uwa nee takagə ji joo ngaɓa aw nee gə kəji gə gə maj-ɛ. Kəji gə nee le ɓa nje gə kɛm ꞌtusu d-iya̰, ɗaa d-oso ɗəw takagə gə lə-je to gə to gə njuyi man be.

²⁰ Horo dəwje gə nee le, Imene je gə Alɛgəjandərə kara ꞌga̰ kəne tɔ. M-iya̰-je mə ji ꞌSu gə mba kar ndoje ɗəw taji ne Luba ang.