1 Thessaloniciendjé 4 - Mbede Lə Luba Kone Gə Sigi

Ndəji gə ɔji dɔ sangə rɔ

¹ Ɗudu tar ɗaa, ngan ko̰-sijee, ne gə j-a dəji sisəy ngaɓa j-a ndəji sisəy kəne ɗəw gə lə Mbayɓe Jeju ɓa to nee: pa nja gə dəw a nja ɓa mba ta ne kəm Luba le ꞌndoje rɔ-sijee gə, ɗaa njaje pa nj-ɛ nam ngaa, be ɓa may kar-si ꞌnjaje kəne be dɔ-si gə kede ja ɓi.

² Be ɓa nduje gə j-un j-ar-si ɗəw gə lə Mbayɓe Jeju le, sisəy ꞌgərəje.

³ Ne gə Luba njigi le, to sangə rɔ lə-si, kar ɔsəje kaya ngərəng,

⁴ kar na-na kara gərə sangə rɔ-ɛ ngaɓa ila kuji dɔ darɔ-ɛ gə,

⁵ mba kar ḭya̰ ar ɓo gə darɔ gə o̰ dɔ-ɛ to to gə dəwje gə ꞌgərə Luba ang be ang,

⁶ ɔji dɔ neje gə nee le ɗaa, may kar dəw kara kara mbɔlɛ ne lə ngon ko̰-ɛ ose ɗa kəm kə̰y dɔ ne gə lə-a ang, mba Mbayɓe a dal ba̰a̰ neje gə be le tɔ̰y, j-a pa tar-ɛ j-ar-si nam ja ngaa j-a təl pa ja cibi.

⁷ Mba Luba ɓar-si mba kar j-a to dəwje gə mina ang ngaa kar j-a to gə losang-ɛ.

⁸ Be ɓa dəw gə mbadə nduje gə nee le, to gə dəw ɓa nj-ɛ mbadə tar t-ɛ gə ang ngaa Luba gə nje kar-si Njil Njerɔsangə ɓa nj-ɛ mbad-e.

⁹ Tar gə ɔji dɔ nuji kuwa gə horo-si gə le, sisəy a kaw-je ndoo-e kar dəw ɗa ne mbede ar-si ang, mba sisəy ja kara Luba tɔji-si kar-si ꞌnjigije naa gə yo gə nee.

¹⁰ Ɗaa to ne gə nee le ja tɔ ɓa ꞌɗaje gə ngan ko̰-si gə gə Masedowan tɔ̰y. Be ja kara j-ula jingaw mə-si gə kar ꞌɗaje ya̰ gə kede ja cibi,

¹¹ ar-je kəji sangə ɗəw kisi ɗɛgɛgɛ uwa mə-si, ꞌtɔsəje kəm-si dɔ neje gə lə-si ja ngaɓa ꞌɗaje kula gə ji-si to to gə j-a ndəji-si ne le;

¹² mba kar pa nja-si unja ngadə kəm dəwje gə ɗaga gə ngaɓa kar undaje mə-si dɔ dəw gə ang.

Kuy ɓa ndol

¹³ Ngan ko̰-mje, j-a njigi kar-sisəy isije dɔ mbə gə ɔji dɔ dəwje gə d-aw cibi le ang, mba kar ꞌɗaje ne rɔ-si gə ndoo to to gə dəwje gə ne kunda mə lə-je godo be ang.

¹⁴ Be ɓa, to gə ɓo j-a ta kagə kuy lə Jeju gə ndol lə-a nama, j-a ta kagə to gə dəwje tɔ̰y gə d-aw ꞌcibi le, Luba a kar-je d-a ndol gə Jeju naa gə ja tɔ.

¹⁵ Oje tar gə j-a pa j-ar-si gə go tar lə Mbayɓe ɓa nee: Sijee gə j-aw kəm baa j-aw ngina ndɔ təl lə Mbayɓe le, j-a nday nje gə ꞌcibi le kaw kede ang.

¹⁶ Mba d-a kun ɗəw kar ndu mbay lə anjije a ɓar, gə ndu kuul lə Luba a ɓar, ɗaa Mbayɓe ja gə darɔ-ɛ a kḭ dara ɗe ngaɓa nje gə d-uy gəl Kirisi gə d-a ndol dɔngɔr,

¹⁷ go-e gə ngaɓa sijee gə j-aw kəm baa ɓi le, d-a kodo-si gə ꞌjejee naa gə kara baa kaw gə si mə kil gə lə nji, mba kaw kinga ne Mbayɓe mə ləl gə, be ɓa j-a kisi ne gə Mbayɓe gə dɔbo̰.

¹⁸ Be ɓa ꞌndəjije naa gə yo gə nee gə tarje gə nee le.